Lyabulwazi bwa COVID-19, bakwesu alimwi abacizyi bakacinca nzila yakukambauka mulumbe wuumbulizya wamu Bbaibbele. Muciindi cakutola lubazu mubukambausi bwakubuleya naa bwakuŋanda aŋanda, balikukambauka kwiinda mukubelesya nzila yakutuma mafooni alimwi akulemba magwalo. a Bantu banji balumba kapati akaambo kanzila eezyi, alimwi zilongezyo zya Jehova zyalibonya. (Tusimpi 16:3, 4) Amubone zyakuluula zikulwaizya kuzwa kucisi cimwi icili ansumbu.

 Kabutanatalika bulwazi, lyoonse ba Helen bakali kuswaya mukaintu umwi alimwi bakali kumwaambila zyabubambe bwakwiiya Bbaibbele. Pele lyoonse mukaintu ooyu wakali kukaka kwiiya. Nokuba boobo, buzuba bwakuti buzuba butobela bantu balajalilwa akaambo kabulwazi, ba Helen bakamwaabila Bbaibbele alimwi abbuku lyakuti Ncinzi Bbaibbele Ncolituyiisya? Muciindi eeci, ba Helen alimwi bakamwaambila zyabubambe bwakwiiya, akumupanduluda kuti ciiyo cakali kuyoosololelwa afooni. Aciindi eeci, mukaintu ooyu wakazumina kwiiya Bbaibbele. Wakaikkomanina kapati mibandi alimwi tiilyakalampa wakalomba ba Helen kuti kabaiya abuzuba! Kuyungizya waawo, mukaintu ooyu wakatalika kujanika kumiswaangano ya Bunakristo lyoonse kwiinda mukubelesya fooni. Kunze lyaboobo, ulazibelesya nzyaiya alimwi ulaambila abamwi kujatikizya nzizyo.

 Bakamboni bakubusena bumwi bakabelesya nzila yakulemba magwalo. Aboobo bakalembela bakapokola bamucilawo cabo akubalumba akaambo kamilimo njobabeleka canguzu. Bakapokola bakagambwa kapati nobakabona magwalo aaya. Kapokola umwi wakaambila mwaalu wamumbungano ulaazina lyakuti Jefferson kuti, “Ndakali kuyeeya kuti Bakamboni ba Jehova tababayandi bakapokola.” Ba Jefferson bakamupandulwida kuti makani aaya tanaakali aamasimpe. Bakapokola bakakkomana kapati amagwalo aaya cakuti bakaabikka mobasikila bantu. Kapokola uumwi wakati, “eeci cilakonzya kugwasya bamwi kuba amizeezo mibotu kujatikizya ndiswe.”

 Ba Edna alimwi aba Ednalyn mbapainiya baciindi coonse. b Akaambo kakuti tabajisi intaneti aŋanda, tiibakali kucikonzya kujoina kumiswaangano yambungano. Aboobo bakatumina simukobonyina watakali Kamboni kulomba kuti naa inga babelesya Wi-Fi yakwe alimwi bakalilibambilide kubbadela mali. Mukaintu ooyo wakabazumizya kuti bacite kkonekiti kakunyina kubbadela. Ciindi ba Edna alimwi aba Ednalyn nobakamutamba mukaintu ooyo kumiswaangano, wakazumina. Lino mwanaakwe umwi alimwi abazyukulu bakwe bobilo balaiya Bbaibbele a Bakamboni alimwi lyoonse balajanika kumiswaangano ya Bunakristo.

 Bakwesu alimwi abacizyi bakubusena oobu bakatamba basimukobonyina, babelesinyina, alimwi abamwi buyo kumakani aabuleya aakali kuyoopegwa kwiinda mukubelesya videoconference. Ba Ellaine, ibabeleka kucibbadela, kumatalikilo bakali kuwayawaya kutamba babelesinyina. Bakali kuyeeya kuti bamadokota bamwi bakali amizeezo mibi kujatikizya Bakamboni. Nokuba boobo, bakabatuma tugwalo twaafooni kutamba bamadokota. Kwaambisya ba Ellaine bakali kuwayawaya kutamba bamadokota bobilo banabukwetene. Ciindi nobakayeyeesya makani aaya alimwi akwaapailila, bakabalembela kagwalo kaafooni kakubatamba. Mukaintu wakati: “Sena muyanda kuti ndibe umwi wa Bakamboni ba Jehova?” Ba Ellaine bakati, kufwumbwa muntu ulakozya kujanika kumiswaangano, kutali buyo Bakamboni ba Jehova. Buzuba bwakatobela, ba Ellaine bakagambwa kubona banabukwetene aaba kuti bajoina kumiswaangano cakufwambaana! Bakati: “Kaitanamana miswaangano, ndatambula kagwalo kaafooni kuzwa kumukaintu ooyu wakati: ‘Eeci nciindi cakusaanguna kujanika kumiswaangano ya Bakamboni ba Jehova. Yali mibotu. Ndilikkomene. Ndalumba akaambo kakunditamba.’”

 Ba Ellaine bakatamba bamadokota bali 20 kumiswaangano alimwi bakakkomana kubona bali 16 ibakajanika. Kuzubulula majwi aamwaapostolo Paulo, bakati: “Ndilikkomene kuti ndakaba ‘sicamba’ kuti ndaambilizye ‘makani mabotu a Leza’ kuli babelesima.”—1 Batesalonika 2:2.

 Lyabulwazi oobu zintu zyali ziyumu kumuntu uuli woonse. Pele bakwesu alimwi abacizyi baku nsumbu eeyi alimwi abakumasena aamwi bacikonzya kuzumanana kujana lukkomano alimwi akuba amizeezo mibotu kwiinda mukucita zyoonse nzyobakonzya kutegwa baumbulizye alimwi akugwasya bamwi.—Milimo 20:35.