Ba Danielle, Bakamboni ba Jehova ibakkala ku South Africa bakajana bbeeke iyakalubwa mucintoolo mobasambala kkofi. Mukati kwakali kakwama kakajisi mali alimwi atukkaadi twakubbanki. Ba Danielle bakaliyandide kubajolela bamukamwini bbeeke, aboobo bakatalika kuyandaula adilesi naa namba yafooni yabo pele bakajana buyo izina lyabo. Aboobo bakasola kubayandaula kwiinda mukubuzya kubbanki pele tiibakazwidilila. Nokuba boobo, tiibakatyompwa, aboobo bakatumina namba yaba dokota njobakajana alisiiti. Mpoonya mukaintu iwakavwiila wakazumina kubweza namba yaba Danielle akupa bamukamwini bbeeke.

 Bamukamwini bbeeke bakagambwa kutambula fooni kuzwa kuofesi yaba dokota babo, kubaambila kuti ba Danielle bakaijana bbeeke yabo alimwi bakali kuyanda kubapilusyila. Nobakaunka kubweza bbeeke, ba Danielle abausyi bakakkomana kubabona. Bakapandulula kaambo ncobakasolekesya kubayandaula. Mbwaanga Mbaakamboni ba Jehova, balasolekesya kupona kweelana anjiisyo zyamu Bbaibbele. Nkakaambo kaako lyoonse balasolekesya kusyomeka.—Bahebrayo 13:18.

 Nokwakainda mawoola masyoonto, bamukamwini bbeeke bakatuma meseji kuli ba Danielle abausyi, kubalumba akaambo kakupilusya bbeeke akakwama. Bakalemba kuti: “Ndamulumba kapati akaambo kakusolekesya kundiyandaula. Ndalumba kapati kumuzyiba antoomwe amukwasyi wanu alimwi ndinoomuyeeya lyoonse akaambo kaluzyalo lwanu alimwi abulongwe. Kutondezya kulumba ndiyanda kusanga. Ndilizyi kuti mwakalyaaba kutegwa mubelekele Leza. Ncomwacita catondezya kuti muli bantu bali kabotu. Eeci calibonya mukusyomeka kwaba Danielle. Aboobo ndalumba kapati alimwi Leza azumanane kuulongezya mulimo wanu.”

 Nokwakainda myezi iili mbwiibede, bausyi baba Danielle bakabonana alimwi abamukamwini bbeeke. Aboobo bakabaambila kuti caino-ino nobakali kuula zintu, bakagoma kapeesi. Ciindi nobakamujana mukamwini kapeesi alimwi akumujolela, bakapandulula cakabakulwaizya kuti bacite oobo. Bakati nkaambo kakuti musyule muntu uumwi wakasyomeka akubajolela kakwama kabo. Bakaamba kuti: “Kusyomeka mutuntu tusyoonto alimwi akutondezya luzyalo kupa kuti abamwi kabacita mbubonya, calo cipa kuti buumi kabukkomanisya kubantu boonse mucilawo.”