Ba Yanmei, Bakamboni ku Asia, bakagwasya mukaintu moofwu wazina lya Mingjie kutegwa asotoke mugwagwa.  aBa Mingjie bakaamba kuti: “Ndalumba kapati. Leza amulongezye!” Kumane, ba Yanmei bakabuzya ba Mingjie naa inga bayanda kwiiya Bbaibbele. Nokwakainda ciindi ba Mingjie bakaamba kuti bakali kupaila buzuba abuzuba kutegwa Leza abasololele kumbungano yakasimpe. Ino nkaambo nzi ncobakali kupailila boobu?

 Ba Mingjie bakapandulula kuti mu 2008 bakatambwa amulongwe wabo moofwu kucikombelo cakali kugwasya bantu balema. Nobakamana kuswiilila mulumbe wakali kukananwa, ba Mingjie bakabuzya mupaizi kuti aambe nkwaakali kuzubulula makani ngaakali kwaamba. Mupaizi wakavwiila kuti mu Jwi lya Leza Bbaibbele. Ba Mingjie bakaba aluyandisisyo lwakulibala. Aboobo bakalomba Bbaibbele lyamuci Chinese lyaboofwu mpoonya akubala mavolyumu aali 32 mumyezi iitandila ku 6. Ba Mingjie bakazumanana kulibala Bbaibbele aboobo bakazyiba kuti njiisyo ya Butatu njobakali kwiiya kucikombelo, njakubeja alimwi akuti Leza ulijisi zina lyakwe, lyakuti Jehova.

 Mukuya kwaciindi, ba Mingjie bakausa kapati akaambo kabukkale mbobakajisi basicikombelonyina. Bakabona kuti tiibakali kupona kweelana ancobakali kubala kuzwa mu Bbaibbele. Mucikozyanyo, boofwu bakali kupegwa cakulya icakali kucaalila kakuli bamwi bakali kupegwa cakulya cili kabotu. Cakabacisa kapati ba Mingjie akaambo kakuteendelezyegwa kabotu. Aboobo bakatalika kuyandaula cikombelo cimbi. Nkakaambo kaako ba Mingjie ncobakali kupaila kuti bajane cikombelo ca Bunakristo cakasimpe.

 Akaambo kaluzyalo ndobakabatondezya ba Yanmei, ba Mingjie bakazumina kuti kabaiya Bbaibbele ambabo. Mukuya kwaciindi, ba Mingjie bakajanika kumiswaangano ya Bakamboni ba Jehova ciindi cakusaanguna. Bakaamba kuti: “Tandikalubi muswaangano uulya wakusaanguna. Bakwesu alimwi abacizyi bakandaanzya cakukondwa. Yakandeenda misozi. Nokuba kuti ndili moofwu, ookuya ndakalumvwa luyando lwakutasalulula.”

 Ba Mingjie bakayaambele alimwi bakatalika kujanika kumiswaangano lyoonse. Bakali kuyandisya kwiimba nyimbo zya Bwami, nokuba boobo cakali kubayumina akaambo kakuti tiibakajisi bbuku lyanyimbo lyaboofwu. Aboobo kwiinda mukugwasyigwa abasimbungano, ba Mingjie bakalipangila bbuku lyabo. Cakabatolela mawoola aali 22 kuti bazilembe nyimbo zyoonse izili 151! Mu April 2018, ba Mingjie bakatalika kutola lubazu mumulimo wakukambauka kubuleya alimwi kuzwa waawo bakatalika kubeleka mawoola aatandila ku 30 amwezi mubukambausi.

 Kutegwa babagwasye ba Mingjie kulibambila lubbapatizyo, ba Yanmei bakailekkooda mibuzyo alimwi atupango twamu Bbaibbele zili mubbuku lya Bakamantene Mukucita Kuyanda kwa Jehova. Mu July 2018, ba Mingjie bakabbapatizyigwa. Bakaamba kuti: “Luyando ndobakanditondezya bakwesu abacizyi kumuswaangano uulya lwakandisika amoyo. Ndakakkomana kapati cakuti misozi yakandeenda akaambo kakuti lino ndakaba mumbungano yakasimpe ya Leza.” (Johane 13:34, 35) Ba Mingjie lino, balo ibayanda kutondezya bamwi luyando ndobakatondezyegwa abalo, balabeleka mulimo wabukambausi waciindi coonse.