“Majwi buyo taakonzyi kwaamba mbocakandikkomanisya kubelekela kubusena bubulide!” Mbobalimvwa oobo ba Joshua, ibakkala ku United States pele ibakabelekela kucisi ca Guyana kwaciindi cili mbocibede. Bakamboni banji ibakabelekela mucisi eeci caku South America, kwalo bantu banji nkobayanda kwiiya kujatikizya Jehova, balimvwa mbubonya mbobalimvwa ba Joshua. a Ino ncinzi ncotukonzya kwiiya kuli Bakamboni aaba ibakabelekela kubusena bubulide? Ino inga mwalibambila buti kuyoobelekela kucisi cimbi ikuti kamuyanda kucita oobo?

 Katanaunka ku Guyana, mukwesu wazina lyakuti Linel wakabelekela mucilawo mutavwuli kukambaukilwa kucisi cokwabo, mu United States. Mukwesu wakaamba kuti, “Twakali 20 notwakaambilwa kuyoobelekela muminzi yaku West Virginia. Mulimo wakukambauka alimwi akuyanzana abakwesu kwansondo zyobilo okuya wakacinca buumi bwangu! Cakandikulwaizya kuti ndiyungizye mulimo wangu kuli Jehova kusikila mpondigolela.”

 Banabukwetene ba Garth alimwi aba Erica bakaba amakanze aakubelekela kucisi cimbi, mpoonya bakasala cisi ca Guyana. Nkaambo nzi? Ba Erica bakapandulula kuti, “Kuli banabukwetene ibakaunka kuyoobelekela nkuko mbotwakazyi. Busungu aluyando lwabo kumulimo ngobakali kucita zyakatukulwaizya andiswe kuyoobelekela nkuko.” Ba Garth aba Erica bakabeleka kwamyaka yotatwe kabakkomene mumulimo ooyu ngobakali kuyanda kapati. Ba Garth bakaamba kuti: “Twakaulabila mulimo wakubelekela kucisi cimbi alimwi twakabona kuti mubotu.” Nokwakainda ciindi bakaunka ku Cikolo ca Gileadi, mazuba aano babelekela kucisi ca Bolivia.

 Njiisyo zyamu Bbaibbele zitukulwaizya kuubya-ubya buumi bwesu. (Bahebrayo 13:5) Bbaibbele alimwi litukulwaizya kulanga-langa zintu zijatikizyidwe notuyanda kusala cintu cimwi mubuumi. (Luka 14:26-33) Eeci cilabikkilizya anotusala kuyoobelekela kucisi cimbi! Ba Garth bakaamba kuti: “Katutanaunka kucisi ca Guyana, mebo abakaintu bangu twakeelede kuubya-ubya buumi bwesu. Eeci cakali kwaamba kuleka makwebo eesu oonse, kusambala ŋanda yesu alimwi azintu zyoonse izyatakali kuyandika kapati izyakali muŋanda yesu. Eeci cakatola myaka iili mbwiibede. Pele twakazumanana kuyeeya makanze eesu aakuyoobelekela kucisi ca Guyana alimwi amwaka twakali kuunka kucisi eeci.”

 Cintu cimwi cakulanga-langa kwakujana mali aakubelesya. Bantu ibaunka kubusena bubulide mumasi aamwi balabeleka mulimo wakumubili ikuti mulawo kaubazumizya kucita oobo. Bamwi balazumanana kubeleka mulimo ngobakali kubeleka kucisi cabo kwiinda mukubelesya kkompyuta. Bamwi basala kujokela kucisi cabo kwaciindi cisyoonto kutegwa bakabeleke ookuya. Banabukwetene ba Paul alimwi aba Sinead bakali kupiluka ku Ireland ciindi comwe amwaka kuyoobeleka. Kucita boobo cakabagwasya kubelekela kucisi ca Guyana kwamyaka iili 18 iikkomanisya, kubikkilizya amyaka iili 7 kuzwa ciindi mwanaabo naakazyalwa.

 Intembauzyo 37:5 yaamba kuti: “Bikka nzila yako mumaanza aa Jehova; komusyoma, eelyo walo ulakugwasya.” Ba Christopher aba Lorissa ibakkala ku United States lyoonse bakali kupaila kujatikizya makanze aabo aakuyoobelekela kucisi cimbi. Kuyungizya waawo, aciindi nobakali kukomba mumukwasyi, bakali kulanga-langa ncobakali kukonzya kucita kutegwa bazwidilile amakanze aabo, alimwi akulemba bubotu abuyumuyumu bwakulongela kubusena bubulide. Akaambo kakuti bakali kuyanda kuyoobelekela kubusena nkobatakali kuyanda kwiiya mwaambo uumbi, bakasala cisi ca Guyana, kwalo nkobavwula kubelesya Cikuwa.

 Kumane bakatobela njiisyo iijanika kulugwalo lwa Tusimpi 15:22: “Makanze alanyongana ikuti kakunyina kubandika, pele ikuti kakuli basikulaya banji kulaba kuzwidilila.” Bakalembela ofesi yamutabi iilanganya mulimo kucisi ca Guyana, b kubaambila ciindi ncobakalibambilide kuyoobeleka alimwi abukkale bwabo. Kuyungizya waawo, bakabuzya-buzya kujatikizya makani aabusilisi, kucinca-cinca kwaziindi zyaamwaka alimwi azilengwa zyakubusena ooko. Bakumutabi bakaingula mibuzyo yabo alimwi akupa kuti bazyibane akabunga kabaalu bakubusena nkobakali kuyoobelekela.

 Ba Linel, ibaambwa kale, lino mbalangizi babbazu ku Guyana. Kabatanaunka okuya, abalo bakaitobela njiisyo iijanika ku Tusimpi 15:22. Bakaamba kuti, “Kunze aakuyobola mali akuyoobelesya, ndakabandika abamwi ibakabelekela kucisi cimbi. Ndakaambila banamukwasyi kujatikizya makani aaya, baalu mumbungano alimwi amulangizi wabbazu. Kuyungizya waawo, ndakabala zyoonse nzyondakali kukonzya mumabbuku eesu kujatikizya kubelekela kubusena bubulide.”

 Ibanji ibayanda kuyoobelekela kucisi cimbi, cabusongo basala kuyooswaya cakusaanguna. Banabukwetene ba Joseph aba Christina, bakaamba kuti, “Ciindi cakusaanguna notwakaunka kucisi ca Guyana, twakakkala ookuya kwamyezi yotatwe. Eeci cakatugwasya kubona bantu mbobapona ookuya. Mpoonya twakapiluka kuŋanda akulibambila ziyandika kumane twakalonga.”

 Kutegwa bazwidilile kubelekela Leza kucisi cimbi, aabo bayanda kuyoobelekela kubusena bubulide beelede kuba amuuya wakulyaaba alimwi beelede kuti kabalibambilide kutobela zilengwa zyakubusena ooko. Mucikozyanyo, aabo ibazwa kubusena butontola kapati kuunka kubusena bukasaala bajana tuuka twiindene-indene mumaanda mobalongela. Ba Joshua ibaambwa kale bakaamba kuti, “tiindakazizyibilide nsanya, alimwi zyaku Guyana zyakali kulibonya kuti nzipati! Pele mukuya kwaciindi ndakazizyibila. Alimwi ndakajana kuti inga zyamana-mana ikuti muŋanda kamusalazyigwa lyoonse. Eeci cilabikkilizya akusanzya mitiba, kusowa tombe, alimwi akupyaanga muŋanda lyoonse.”

 Kucinca buumi kulakonzya kubikkilizya akulya zyakulya nzyomutazyi kabotu alimwi akwiiya mbozijikwa. Ba Joshua bakaamba kuti, “Mebo amukwesu ngotwakali kukkala limwi twakalomba bakwesu abacizyi kutegwa batuyiisye mbokujikwa zyakulya zyakubusena ooko. Notwakayiiya mbokujikwa, twakali kutamba bakwesu bamwi mumbungano kutegwa tuzoolide antoomwe. Eeyi yakali nzila mbotu yakubazyiba kabotu bakwesu alimwi akuyumya cilongwe ambabo.”

 Kujatikizya zilengwa zyakubusena ooko, ba Paul alimwi aba Kathleen bakaamba kuti: “Twakeelede kwiiya ncobakali kubona kuti mbulemu alimwi akusama zisani zyeelela zyakubusena ooko, eeci cakali cintu cipya kulindiswe. Aboobo twakeelede kulicesya alimwi akucinca, pele kakunyina kusotoka njiisyo zyamu Bbaibbele. Kuzyibila zilengwa zyakubusena ooko zyakatugwasya kutegwa katumvwana abasimbungano alimwi cakapa kuti tubeleke kabotu mumulimo wakukambauka.”

 Ba Joseph aba Christina bakatondezya banji mbobakalimvwa ciindi nobakaamba kuti: “Kuli zilongezyo zinji kwiinda buyumuyumu. Kuubya-ubya buumi bwesu kwakatugwasya kubuzyibila bukkale bupya. Zintu nzyotwakali kubona kuti zilayandika kapati kulindiswe taziciyandiki kapati. Kufwumbwa buyumuyumu mbotwakali kujana bwakatukulwaizya kuzumanana kucita zyoonse nzyotwakali kukonzya kubelekela Jehova. Twakaba bantu bakkutila ncobeni.”

 Ba Erica, ibaambidwe kumatalikilo, bakaamba kuti: “Kubelekela kubusena bubulide kwakapa kuti mebo abalumi bangu tumvwisye ncocaamba kusyoma Jehova. Twakalibonena janza lyakwe mbolyakatugwasya munzila njotutanabwene. Alimwi kuba azyakuluula zipya antoomwe cakapa kuti cikwati cesu ciyume.”