1 Timoteyo 1:1-20
1 Ndime Paulo, imutumwa wa Kilisito Jesu kwiinda mukulaililwa a Leza Mufwutuli wesu alimwi a Kilisito Jesu, ibulangizi bwesu,
2 nendalembela nduwe Timoteyo, omwanaangu mwini-mwini mulusyomo kuti:
Iluzyalo, luse alimwi aluumuno ikuzwa kuli Leza Taata akuli Kilisito Jesu Mwami wesu azibe anduwe.
3 Mbubonya mbondakakukulwaizya kuti ukkale mu Efeso nindakali afwaafwi kutalika lweendo lwangu lwakuya ku Makedoniya, ndakwaambila mbubonya alino, ikutegwa ubalailile bamwi kuti baleke kuyiisya njiisyo zimbi,
4 naa kubikkila maano kutwaano twakubeja alimwi amakani aamilongo yamazyalani. Izyintu eezyi zinyina mpindu abuniini, pele ziletela buyo mibuzyo iipa kukazyanya muciindi cakupa zyintu zizwa kuli Leza iziyumya lusyomo.
5 Mubwini, imakanze aamalailile aaya ngakuti tube aluyando luzwa mumoyo uutuba amanjezyeezya mabotu alimwi alusyomo lwini-lwini lutali lwakuupaupa ameso.
6 Kwiinda mukuleya kuzyintu eezyi, bamwi bakeenwa akutalika kwaamba makani aabuyo.
7 Bayanda kuba bamayi bamulawo, pele kabatazizyi nzyobaamba noziba zyintu nzyobakakatide kwaamba kuti zililuzi.
8 Lino tulizyi kuti Mulawo uli kabotu kufwumbwa kuti muntu kautobela bweelede
9 kazyi kuti mulawo taubikkilwi muntu mululami pe, pele ubikkilwa bantu bataswiilili alimwi ibazangi, basampaula Leza abasizibi, batasyomeki,* basampaula zyintu zisalala, basikujaya bamausyi abasikujaya bamanyina, abaabo bajaya bantu,
10 basibwaamu, baalumi boona baaluminyina, basikubba bantunyina, babeji, basikukonka cakubeja, acintu cimbi cili coonse cikazyanya anjiisyo mbotu
11 yeendelana amakani mabotu aabulemu aazwa kuli Leza uukkomene, aayo ngondakapegwa.
12 Ndilamulumba Kilisito Jesu Mwami wesu, ooyo wakandipa nguzu, nkaambo wakandibona kuti ndilasyomeka kwiinda mukundipa mulimo wakucita,
13 nokuba kuti musyule ndakali sikusampaula Leza asikupenzya bantu bakwe alimwi asikasampusampu. Nokuba boobo, ndakafwidwa luse, nkaambo ndakacita zyintu cakutazyiba alimwi ndakanyina lusyomo abuniini.
14 Pele luzyalo lwa Mwami wesu lwakavwula kapati antoomwe alusyomo alimwi aluyando muli Kilisito Jesu.
15 Majwi aaya alasyomeka alimwi ayelede kutambulwa cakumaninina: Kilisito Jesu wakaboola munyika kuti afwutule basizibi. Ali baaba mebo ndime ndiindide.
16 Nokuba boobo, ndakafwidwa luse ikutegwa kwiinda mulindime, mebo ndesizibi kwiinda boonse, Kilisito Jesu atondezye kukkazyika moyo kwakwe koonse kutegwa ndibe citondezyo kuli baabo ibanoojisi lusyomo mulinguwe akuyoojana buumi butamani.
17 Lino ku Mwami walyoonse alyoonse, ooyo uutafwi alimwi uutalibonyi, alimwi uuli ngo Leza alikke, akube lulemeko abulemu lyoonse mane kukabe kutamani. Ameni.
18 Malailile aaya ndakupa kuti waatobele mwanaangu, Timoteyo, kweelana azyakasinsimwa kujatikizya nduwe, kutegwa kwiinda mulinzizyo uzumanane kulwana nkondo mbotu;
19 ujatisye lusyomo amanjezyeezya mabotu, eezyo bamwi nzyobasowela ambali, eelyo lusyomo lwabo lwanyonyooka mbuli bwato bwaloba mulwizi.
20 Humenayo alimwi a Alekizanda bali akati kabaaba, alimwi ndabaaba kuli Saatani kutegwa baiye kwiinda mukusubulwa kuti tabeelede kusampaula Leza.
Bupanduluzi buyungizyidwe
^ Naa, “batakwe luzyalo.”
