2 Bakorinto 2:1-17
2 Nkaambo ndasala kuti nditabooli kulindinywe alimwi mubuusu.
2 Nkaambo ikuti naa ndimupa kuusa nywebo, ino nguni umbi uunoondikkomanisya kunze lyayooyo ngondakapa kuusa?
3 Aboobo ndakamulembela boobo ikutegwa ndaakusika ooko, aabo ibeelede kundikkomanisya batakandipi kuusa; nkaambo ndili aalusyomo lwakuti eeco cindipa kukondwa mebo ncecimupa kukondwa andinywe nyoonse.
4 Nkaambo kwiinda mumapenzi manji akupenga kapati mumoyo ndakamulembela amisozi minji, ikutali kuti ndimupe kuusa, pele kutegwa muzyibe mboluli lupati luyando ndondijisi kulindinywe.
5 Lino ikuti naa umwi wacita cintu cipa kuusa, tandili buyo ndime nduusa pe, pele andinywe nyoonse alimwi bamwi balaindila kuusa—nokuba kuti tandisoli kumunyemena nondaamba majwi aaya.
6 Cisubulo eeci ncaakapegwa abanabunji cilizulide kumuntu ooyo,
7 aboobo lino mweelede kumulekelela akumuumbulizya kutegwa munzila imwi muntu ooyo atamenenwi limwi akaambo kakuusa kapati.
8 Aboobo ndimukulwaizya kuti mutondezye luyando lwanu kulinguwe.
9 Nkaambo eeci ncendakamulembela: ikutegwa ndisinizye naa mulaswiilila muzyintu zyoonse.
10 Ikuti mwalekelela muntu cibi cili coonse, andime ndamulekelela mbubonya. Atwaambe kufwumbwa cibi mebo ncendakalekelela, (ikuti kakuli cibi cimwi ncendakalekelela) ndakacita boobo kutegwa mugwasyigwe kumbele lya Kilisito,
11 kutegwa tutazundwi a Saatani, nkaambo tulizizyi nzila zyakwe zyabucenjezu.
12 Lino nindakasika ku Tulowa kuyooambilizya makani mabotu kujatikizya Kilisito, alimwi nondakajalwidwa mulyango mu Mwami,
13 moyo wangu tiiwakakkalikila pe akaambo kakuti tiindakamujana mukwesu Tito. Aboobo ndakabalaya bakwesu bakooko akuunka ku Makedoniya.
14 Pele aalumbwe Leza ooyo lyoonse uutusololela notweenda mbuli nkamu yazunda antoomwe a Kilisito alimwi uupa kuti bweema bwaluzyibo bumwaike koonse-koonse kwiinda mulindiswe!
15 Nkaambo kuli Leza tuli bweema bubotu bwa Kilisito akati kabaabo ibafwutulwa alimwi abaabo ibanyonyoonwa;
16 kuli baabo ibanyonyoonwa mbweema bwalufwu ibutola kulufwu, kuli baabo ibali mukufwutulwa mbweema bwabuumi ibutola kubuumi. Alimwi ino nguni weelela ncobeni kucita zyintu eezyi?
17 Ndiswe; nkaambo tatuli basambazi bajwi lya Leza mbuli bantu bamwi banji pe, pele tulaamba camoyo woonse mukukamantana a Kilisito, inzya, mbuli baabo bakatumwa a Leza alimwi ibalangililwa a Leza.
