2 Bakorinto 3:1-18
3 Sena tweelede kutalika kulilumbaizya alimwi? Naa sena tuyandika magwalo aatulumbaizya kulindinywe naa aazwa kulindinywe mbuli mbobacita bamwi?
2 Nywebo nobeni ndendinywe lugwalo lwesu, ilulembedwe mumyoyo ye-su alimwi luzyibidwe akubalwa abantu boonse.
3 Nkaambo nywebo mutondezya kuti muli lugwalo lwa Kilisito lwakalembwa andiswe mbotuli babelesi. Tiilwakalembwa ainki pe, pele lwakalembwa amuuya wa Leza muumi, alimwi talulembedwe amabwe meni pe, pele lulembedwe amabwe aanyama, aamyoyo.
4 Lino kwiinda muli Kilisito tujisi lusyomo oolu muli Leza.
5 Swebo lwesu tatukonzyi kulibona kuti tuleelela ncobeni kucita cintu cili coonse, pele kweelela kwesu kuzwa kuli Leza.
6 Masimpe walo nguwatupa kuti tweelele ncobeni kuba babelesi bacizuminano cipya, ikutali ba Mulawo uulembedwe pe, pele bamuuya; nkaambo Mulawo uulembedwe uletela lufwu, pele muuya upa buumi.
7 Kunze lyaboobo, ikuti Mulawo ooyo uuletela lufwu alimwi wakasimbidwe bbala abbala amabwe, wakaletwa abulemu, cakuti bana ba Isilayeli tiibakakonzya kumulangisisya kubusyu Musa akaambo kabulemu mbwaakajisi kubusyu, ibulemu oobo ibwakali kuyoozimaazyigwa,
8 ino nkaambo nzi ikupegwa kwamuuya ncokutakonzyi kwiinda kuba abulemu?
9 Nkaambo ikuti naa mulawo iwakajisi mulimo wakupa bantu mulandu wakali abulemu, nkokuti mulimo wakubalulamika wakali kunooinda kuba abulemu.
10 Ncobeni, nouba mulawo ooyo wakapedwe bulemu musyule wanyangwa bulemu bwawo nkaambo kabulemu oobo buwiinda.
11 Nkaambo ikuti naa mulawo ooyo iwakali kuyoozimaazyigwa wakaletwa abulemu, nkokuti ooyo uukkalilila wakali kunooinda kuba abulemu!
12 Aboobo, mbwaanga tujisi bulangizi buli boobu, tulaambaula cakutayoowa abuniini,
13 alimwi tatuciti bwakacita Musa naakali kulivwumba cisani kubusyu kutegwa bana ba Isilayeli bataalangisisyi mamanino aabulemu oobo ibwakali kuyoozimaazyigwa.
14 Pele bakaba akazilukwa mukuyeeya kwabo. Nkaambo kusikila sunu cisani eeci tacivwumbulwi nokubalwa cizuminano* cakaindi, nkaambo cigusyigwa buyo kwiinda muli Kilisito.
15 Masimpe, kusikila sunu kufwumbwa nobabala mabbuku aa Musa, cisani eeco nkocili amyoyo yabo.
16 Pele eelyo muntu nasandukila kuli Jehova, cisani eeco cilagusyigwa.
17 Lino Jehova Muuya; alimwi ooko kuli muuya wa Jehova, kuli lwaanguluko.
18 Alimwi toonse, eelyo busyu bwesu butavwumbidwe cisani nobutondezya bulemu bwa Jehova mbuli zimbonimboni, tulasandulwa kuba mucinkozya cakwe, alimwi tulazumanana kuzwa mubulemu bumwi kuya mubulemu bumbi mbubonya Jehova walo uuli ngo Muuya mbwatupa kusanduka.
Bupanduluzi buyungizyidwe
^ Amubone Makani Aayungizyidwe 10.
