2 Bakorinto 8:1-24
8 Lino bakwesu tuyanda kumuzyibya luzyalo lwa Leza ilwakatondezyegwa kumbungano zyaku Makedoniya,
2 kuti bantu bamumbungano eezyi nobakali kusunkwa kapati mumapenzi, lukkomano lwabo lutalivwulili abucete bwabo butaambiki zyakapa kuti buuya bwabo buvwule kapati.
3 Nkaambo bakapa kweelana ambobakali kukonzya, inzya, ndilakonzya kubacitila bumboni kuti, bakacita boobo kwiindilila ambobakali kukonzya.
4 Cakulisungula bakazumanana kutulomba akutukombelezya kapati kuti bazumizyigwe kuba acoolwe cakupa alimwi akutola lubazu mumulimo wakugwasya basalali.
5 Alimwi ikutali buyo kweelana ambotwakali kulangila pe, pele cakusaanguna bakalipa ku Mwami mpoonya akulindiswe kwiinda mukuyanda kwa Leza.
6 Aboobo twakayumya-yumya Tito kuti, mbwaanga nguwakautalisya mulimo ooyu wakupa cabuuya akati kanu, ngonguwe weelede akuumanizya.
7 Nokuba boobo, mbubonya mbomuli bavwubi muzyintu zyoonse, mulusyomo, mukwaambaula, muluzyibo, mubusungu boonse alimwi amuluyando ndotujisi kulindinywe, amube bavwubi amumulimo ooyu wakupa cabuuya.
8 Tandaambi boobu kuti ndimubikkile mulawo pe, pele kutegwa ndimuzyibye busungu bwabamwi akuti ndibone mboluli lwini-lwini luyando ndomujisi.
9 Nkaambo muliluzyi luzyalo lwa Mwami wesu Jesu Kilisito, kuti nokuba kuti wakali muvwubi, wakaba mucete akaambo kandinywe, ikutegwa mube bavwubi kwiinda mubucete bwakwe.
10 Alimwi mukaambo aaka ndimupa muzeezo ooyu: eeci cigwasya ndinywe, mbwaanga mwaka wamana tiimwakatalika buyo kucita mulimo pe, pele alimwi mwakatondezya kuti mulayandisisya kuucita.
11 Aboobo lino, amuumanizye mulimo ooyo ngomwakatalika kucita, ikutegwa muzuzikizye eeco ncomwakalibambilide kucita kweelana anzyomujisi.
12 Nkaambo ikuti kusaanguna muntu kalibambilide, eeco ncapa cilatambulika ikapati kuti wacipa kweelana anzyajisi ikutali kweelana anzyatajisi.
13 Nkaambo tandiyandi kuti bamwi zibaubile, pele nywebo zimuyumine pe;
14 pele ndiyanda kuti zyintu ziindilide nzyomujisi lino zizulizye kubulizya kwabo, ikutegwa baakuba aziindilide abalo bakazulizye kubulizya kwanu, ikutegwa kube kweelana.
15 Mbubonya mbokulembedwe kuti: “Imuntu wakajisi zinji tanaakajisi zinji kapati, amuntu wakajisi zisyoonto tanaakajisi zisyoonto kapati.”
16 Lino aalumbwe Leza akaambo kakuti wapa moyo wa Tito kuba abusungu mbubonya mbotujisi aswebo kulindinywe,
17 nkaambo mubwini tanaatobela buyo kuyumya-yumya kwesu, pele alimwi cakuyandisisya, walisungula lwakwe mwini kuboola kulindinywe.
18 Pele antoomwe anguwe twatuma mukwesu umwi uulumbaizyigwa mumbungano zyoonse akaambo kamilimo njacita kujatikizya makani mabotu.
19 Kutali buyo boobo, pele alimwi mbungano zyakamusala kuti keenda andiswe notweendelezya bwaapauzi bwazipego zyabuuya kutegwa Mwami apegwe bulemu alimwi akutondezya kuti tulilibambilide kugwasya bamwi.
20 Aboobo tatuyandi muntu uuli woonse kutupa mulandu mumulimo wazyakusanga zyabuuya zinji nzyotweendelezya.
21 Nkaambo “zyoonse tulazilanganya cakusyomeka ikutali buyo kumbele lya Jehova, pele alimwi akumbele lyabantu.”
22 Kunze lyaboobo, antoomwe ambabo twatuma mukwesu aumwi ooyo bunji bwaziindi ngotwabona kuti musungu muzyintu zinji, pele lino iwasungwaala kwiindilila akaambo kakuti ulamusyoma kapati.
23 Pele ikuti kamujisi kudooneka kuli koonse kujatikizya Tito, amuzyibe kuti ngomweenzuma alimwi ngusimilimoma uubelekela ndinywe; naa ikuti mbakwesu mbomudooneka, amuzyibe kuti mbatumwa mumbungano alimwi mbulemu bwa Kilisito.
24 Aboobo amutondezye luyando ndomujisi akubatondezya kaambo ncotwakalilumbaizya kujatikizya ndinywe kumbungano zyoonse.
