2 Batesalonika 1:1-12
1 Mebo nde Paulo, nendili antoomwe a Siluvano alimwi a Timoteyo ndalembela ndinywe nombungano ya Batesalonika iikamantene a Leza Taateesu alimwi a Mwami wesu Jesu Kilisito kuti:
2 Amube aluzyalo alimwi aluumuno ikuzwa kuli Leza Taateesu aku Mwami wesu Jesu Kilisito.
3 Lyoonse tweelede kumulumba Leza akaambo kandinywe, bakwesu. Tuleelede kucita boobo nkaambo lusyomo lwanu luyaabukomena kapati alimwi aluyando umwi aumwi wanu ndwajisi kumweenzinyina luyaabuvwula.
4 Nkakaambo kaako tulamulumbaizya kumbungano zya Leza akaambo kakuliyumya kwanu, alimwi alusyomo lwanu mukupenzyegwa kwanu koonse kubikkilizya amapenzi aamujisi.
5 Zyoonse eezyi zitondezya kuti Leza ubeteka cabululami, aboobo eeci ciyoopa kuti mukabonwe kuti muleelela kunjila mu Bwami bwa Leza, oobo mbomupengela kapati.
6 Lubeta lwa Leza oolu luliluleme nkaambo ubweedezya mapenzi kuli baabo ibamupenzya nywebo.
7 Pele nywebo nomupenzyegwa lino, Leza uyoomupa kukatalukwa antoomwe andiswe aakuyubunuka Mwami Jesu kuzwa kujulu abangelo bakwe basinguzu
8 mumulilo uuvwilima, eelyo aakusubula baabo batamuzyi Leza abaabo bataswiilili makani mabotu aa Mwami wesu Jesu.
9 Aaba mbambabo ibayoopegwa cisubulo calubeta lwakunyonyweedwa limwi kukabe kutamani akugusyigwa kumbele lya Mwami akubulemu bwanguzu zyakwe,
10 aciindi eeco aakuboola kuti alemekwe antoomwe abasalali bakwe, alimwi mubuzuba oobo boonse aabo ibakatondezya lusyomo uyoobalamya, nkaambo mwakabusyoma bumboni mbotwakamupa.
11 Akaambo kaceeco, lyoonse tulamupailila kuti Leza wesu amubone kuti mweelela bwiite bwakwe akumucitila munguzu zyakwe izibotu zyoonse nzyayanda alimwi amilimo yalusyomo lwanu.
12 Eeci cili boobo kutegwa izyina lya Mwami wesu Jesu lilemekwe mulindinywe, akuti andinywe mulemekwe antoomwe anguwe, kweelana aluzyalo lwa Leza wesu alwa Mwami Jesu Kilisito.
