2 Batesalonika 2:1-17
2 Pele bakwesu, ikujatikizya ciindi cakubako kwa Mwami wesu Jesu Kilisito akuyobololwa kwesu antoomwe kulinguwe, tumulomba
2 kuti mutafwambaani kulekela mizeezo yanu kunyonganizyigwa naa kuzwa moyo, kube kwiinda mumajwi aasololelwa amuuya, naa mumulumbe wakumulomo naa mulugwalo luboneka mbuli kuti lwakazwa kulindiswe, izyaamba kuti buzuba bwa Jehova bulisikide kale.
3 Kutabi muntu uumuunina akumusowa munzila iili yoonse, nkaambo buzuba oobo tabukasiki pe ccita kusaanguna lukasike luleyo alimwi amuntu mubi akayubununwe, nkokuti mwana walunyonyooko.
4 Ooyu ngusikukazya alimwi ulalisumpula kwiinda woonse waambwa kuti “nguleza” naa cintu cikombwa, cakuti ukkala mutempele lya Leza, kalyaamba kubuleya kuti nguleza.
5 Sena tamuyeeyede kuti, nondakacili andinywe ndakali kumwaambila zyintu eezyi?
6 Aboobo lino mwacizyiba cikasyide kuti ayubununwe, nkutegwa akayubununwe aciindi ceelede.
7 Masimpe, imaseseke aabubi oobu nkwaali alabeleka kale; pele anoobeleka kusikila buyo leelyo ooyo lino uubukasya aakuzwa.
8 Mpoonya ciindi eeco, similimo mibi uyooyubununwa ncobeni, ooyo Mwami Jesu ngwayoolobya amuuya wakumulomo wakwe akumunyonyoona kwaakulibonya kubako kwakwe.
9 Pele kubako kwasimilimo mibi kulacitika kwiinda mukubeleka kwa Saatani ikulibonya mumilimo mipati iili yoonse azitondezyo zyakubeja alimwi azyintu zigambya,
10 kabelesya nzila zyoonse zitaluleme ikweena baabo ibanyonyooka, kuti cibe cisubulo cabo akaambo kakuti tiibakatondezya kuti balakayandisya kasimpe kutegwa bafwutulwe.
11 Aboobo nkakaambo kaako Leza ncalekelede kuti beenwe akulubizya, kutegwa basyome bubeji,
12 ikutegwa boonse bakabetekwe nkaambo tiibakakasyoma kasimpe pele bakakkomanina zitaluleme.
13 Nokuba boobo, lyoonse tweelede kumulumba Leza akaambo kandinywe, bakwesu nomuyandwa a Jehova, nkaambo Leza wakamusala kuzwa kumatalikilo kuti mukafwutulwe kwiinda mukumusalazya amuuya wakwe alimwi akaambo kalusyomo lwanu mukasimpe.
14 Wakamwiitila kulufwutuko oolu kwiinda mumakani mabotu ngotwaambilizya, ikutegwa mukajane bulemu bwa Mwami wesu Jesu Kilisito.
15 Aboobo bakwesu, amwiime nji akujatisya zyintu* nzyomwakayiisyigwa, kunyina makani naa zyakali mumulumbe wakumulomo naa mulugwalo lwakazwa kulindiswe.
16 Kunze lyaboobo, Mwami wesu Jesu Kilisito lwakwe a Leza Taateesu, ooyo wakatuyanda akutupa luumbulizyo lutamani abulangizi bubotu kwiinda muluzyalo lwakwe,
17 abakkazyike myoyo yanu akumuyumya mumilimo mibotu iili yoonse alimwi amajwi.
Bupanduluzi buyungizyidwe
^ Mu Chigiliki, “tunsiyansiya.”
