2 Batesalonika 3:1-18
3 Lino kumamanino bakwesu, amuzumanane kutupailila, kutegwa ijwi lya Jehova lizumanane kumwaigwa cakufwambaana akulemekwa mbubonya mbocibede akati kanu;
2 akuti tuvwunwe kubantu basiluciso alimwi babi, nkaambo tabali bantu boonse ibajisi lusyomo pe.
3 Pele Mwami ulasyomeka, eelyo uyoomuyumya akumukwabilila kumubi.
4 Kunze lyaboobo, tuli alusyomo mu Mwami kujatikizya ndinywe, kuti mulazicita alimwi muyoozumanana kuzicita zyintu nzyotumulailila.
5 Lino Mwami azumanane kweendelezya myoyo yanu munzila yeelede, kuti muyande Leza akuliyumya akaambo ka Kilisito.
6 Lino tumupa malailile bakwesu, muzyina lya Mwami Jesu Kilisito, kuti mumutantamuke mukwesu uuli woonse weenda cakupilingana ikutali kweelana azyintu* nzyomwakatambula kuzwa kulindiswe.
7 Nkaambo nywebo lwanu mulizyi mbomweelede kutwiiya, nkaambo tiitwakalilemeka munzila iipilingene akati kanu
8 naa kulya cakulya camuntu uuli woonse kakunyina kucibbadelela. Pele, masiku asyikati twakoonda mulimo canguzu akuminwa kutegwa tutapi muntu naba omwe akati kanu mukuli uuminya.
9 Takuli kuti tiitwakeelede kutambula zyintu kulindinywe, pele twakacita boobo kutegwa tube cikozyanyo ncomweelede kutobela.
10 Alimwi notwakali andinywe, twakali kumupa mulawo ooyu wakuti: “Ikuti naa umwi muntu katayandi kubeleka, akulya atalyi pe.”
11 Nkaambo tumvwide kuti kuli bamwi beenda cakupilingana akati kanu, ibatayandi kubeleka abuniini pele ibaide kulinjizya mumakani aatabajatikizyi.
12 Bantu aabo tubapa mulawo akubalailila mu Mwami Jesu Kilisito kuti beelede kubeleka caluumuno akulya cakulya ncobalijanina lwabo beni.
13 Pele nywebo bakwesu, mutalengaani pe kucita zibotu.
14 Pele ikuti naa umwi kataaswiilili majwi eesu aali mulugwalo oolu, amumucenjelele* kapati ooyo alimwi amuleke kuyanzana anguwe, kutegwa afwe nsoni.
15 Nokuba boobo, mutamuboni mbuli kuti ngusinkondonyoko, pele amuzumanane kumulaya mbuli munyoko.
16 Lino Mwami waluumuno mwini amupe luumuno lyoonse munzila zyoonse. Mwami abe andinywe nyoonse.
17 Mebo nde Paulo, ndamulembela kwaanzya kwangu ooku ajanza lyangu ndemwini, icili ncitondezyo mumagwalo aangu oonse; oobu mbondilemba.
18 Iluzyalo lwa Mwami wesu Jesu Kilisito alube andinywe nyoonse.
Bupanduluzi buyungizyidwe
^ Mu Chigiliki, “amumubikke caando.”
