2 Timoteyo 2:1-26
2 Aboobo, yebo mwanaangu, kozumanana kujana nguzu muluzyalo lwa Leza ilujanwa akaambo kakukamantana a Kilisito Jesu,
2 alimwi izyintu nzyookamvwa kulindime izyakasinizyigwa abakamboni banji, zyintu eezyi kozibikka mumaanza aabantu basyomeka, kutegwa abalo beelele ncobeni ikuyiisya bamwi.
3 Mboli sikalumamba mubotu wa Kilisito Jesu kolibambila kupenga mumapenzi.
4 Muntu uubeleka mulimo wabusikalumamba tatoli lubazu mumakwebo aabuumi obuno, kutegwa akkomanisye yooyo wakamunjizya busikalumamba.
5 Kunze lyaboobo, nomuba muzisobano, imuntu woonse uuzundana mulinzizyo tasamikwi musini ccita buyo kuti waitobela milawo yamuzundano.
6 Imulimi uubeleka canguzu nguweelede ikusaanguna kulya micelo.
7 Kozibikkila maano lyoonse nzyondaamba eelyo Mwami uyookugwasya kumvwisya zyintu zyoonse.
8 Koyeeya kuti Jesu Kilisito wakabusyigwa kuzwa kubafwu alimwi wakali waluzubo* lwa Davida, ikweelana amakani mabotu ngondikambauka;
9 aayo ngondipengela alimwi akubikkwa muntolongo mbuli sizibi. Nokuba boobo, ijwi lya Leza talyaangidwe pe.
10 Akaambo kaceeci ndilazumanana kuliyumya muzyintu zyoonse akaambo kabasale, kutegwa abalo bakajane lufwutuko kwiinda muli Kilisito Jesu akupegwa bulemu butamani.
11 Alasyomeka majwi aakaambwa aakuti: Ncobeni ikuti naa twakafwa anguwe, tuyoopona anguwe mbubonya;
12 ikuti naa twazumanana kuliyumya, andiswe tuyoolela anguwe katuli bami; ikuti naa twamukaka, awalo uyootukaka;
13 nokuba kuti katutasyomeki, walo ulasyomeka lyoonse, nkaambo takonzyi kulikaka mwini pe.
14 Kozumanana kubaibalusya zyintu eezyi, kobalailila* kumbele lya Leza kuti kabatalwanini majwi buyo, calo citagwasyi naaba aniini nkaambo cinyonyoona baabo baswiilila.
15 Kosungwaala kulitondezya kuti uli muntu uutambulika kuli Leza, simulimo uutakwe cintu cimuusya nsoni, uuyiisya akupandulula ijwi lyakasimpe cakulomya.
16 Pele koasosoloka majwi aabuyo aayo aasofwaazya zisalala; nkaambo bantu baambaula majwi aaya banooya bwiindila kutayoowa Leza,
17 alimwi majwi aabo ayoomwaika mbuli donda liyandilila ilibozya mubili. Humenayo alimwi a Fileto bali akati kabaabo
18 ibaleya kukasimpe, kabaamba kuti bubuke bwabafwu bwakacitika kale; alimwi bayaabunyonyoona lusyomo lwabamwi.
19 Nokuba boobo, intalisyo njumu ya Leza iciimvwi kiijisi cidinto cilembedwe kuti: “Jehova ulibazyi aabo babalilwa kulinguwe,” akuti: “Ooyo wiita zyina lya Jehova akukake kutalulama.”
20 Lino muŋanda mpati kuli zibelesyo, ikutali buyo zyangolida ansiliva pe, pele azyacisamu abulongo, alimwi zimwi zibelesyegwa mulimo uulemekwa pele zimwi zibelesyegwa mulimo uutakwe bulemu.
21 Aboobo ikuti muntu walitantamuna kuzibelesyo zyamulimo uutakwe bulemu, unooli cibelesyo camulimo uulemekwa, cisalazyidwe, ciyandika kuli mukamwini, cibambilidwe kubeleka mulimo mubotu uuli woonse.
22 Aboobo kozitija zisusi zyabukubusi, pele kosungwaala kutobela bululami, lusyomo, luyando, aluumuno antoomwe abaabo ibaita Mwami amoyo uutuba.
23 Kunze lyaboobo, koikaka mibandi yakukazyanya eeyo yabufwubafwuba alimwi iitondezya kubula luzyibo, nkaambo ulizyi kuti ibusya nkondo.
24 Nkaambo muzike wa Mwami teelede kulwana pe, pele weelede kuba amoyo mutete kubantu boonse, uukonzya kuyiisya kabotu, uulijata nacitilwa zyintu zibyaabi,
25 uubombede moyo nalailila baabo bakazya; kutegwa ambweni Leza inga wabapa kucinca moyo* ikutola kuluzyibo lwini-lwini lwakasimpe,
26 eelyo inga baliyeeya akuzwa mukakole ka Diabolosi, nobazyiba kuti wakabajata kabalanga ikutegwa bacite kuyanda kwakwe.
Bupanduluzi buyungizyidwe
^ Naa, “lunyungu.”
^ Mu Chigiliki, “kobapa bumboni cakulomya.”
^ Naa, “kweempwa.”
