2 Timoteyo 3:1-17
3 Pele kozyiba kuti, kumazuba aamamanino kuyooba ziindi zikatazya ncobeni.
2 Nkaambo bantu bayooba basikuliyanda, bayandisya mali, basikulidunda, basikulisumpula, basikusampaula, batamvwidi bazyali, batalumbi, batasyomeki,
3 batajisi luyando lwakuzyalwa andulo, batanyoneki, basikubejelezya, batalilesyi, bakali, batayandi bubotu,
4 basikwaaba bamwi, batalaiki, basikulitukumuna, bayandisya zyakulikondelezya kwiinda kuyandisya Leza,
5 ibalibonya mbuli kuti balilyaabide mubukombi, pele nguzu zyambubo balazikazya; eelyo ibantu bali boobu kobatantamuka.
6 Nkaambo kubantu bali boobo nkokuzwa baalumi baunka cabucenjezu kuyooena bantu mumaanda aabo akubacita kuba bazike babo bamakaintu ibatajisi nguzu alimwi ibalemedwe zibi, ibeendelezyegwa azisusi ziindene-indene,
7 ibaiya lyoonse pele ibatakonzyi kuba aluzyibo lwini-lwini lwakasimpe.
8 Lino mbubonya Jane a Jambule mbobakamukazya Musa, abalo aaba balazumanana kukazya kasimpe. Ibantu bali boobu balinyongene mizeezo cakumaninina, tabeeleli makani aalusyomo.
9 Nokuba boobo, kunyina nkobaya pe, nkaambo bufwubafwuba bwabo buyoolibonya kubantu boonse, mbubonya mbobwakalibonya bufwubafwuba bwabaalumi bobilo aabo.
10 Pele yebo wakabikkila maano kapati kukuyiisya kwangu, kubukkale bwangu, kumakanze aangu, kulusyomo lwangu, kukukkazyika moyo kwangu, kuluyando lwangu, kukuliyumya kwangu,
11 kukupenzyegwa alimwi akumapenzi aangu mbuli yaayo aakandicitikila ku Antiyokeya, ku Ikoniyo, ku Lusitulo. Ndakaliyumya nindakali kupenzyegwa alimwi Mwami wakandivwuna mumapenzi aaya oonse.
12 Mubwini, boonse aabo bayanda kupona buumi bwakubelekela Leza cakulyaaba mukuyanzana a Kilisito Jesu abalo bayoopenzyegwa.
13 Pele bantu babyaabi abasilweeno bayoobija akubijila limwi, banooena bamwi alimwi akweenwa lwabo beni.
14 Pele yebo, kozumanana kuzitobela zyintu nzyookayiisyigwa alimwi nzyookagwasyigwa kusyoma camoyo woonse, nkaambo ulibazyi aabo ibakakuyiisya nzizyo
15 akuti kuzwa kubuvwanda ulaazyi malembe aasalala, aayo aakonzya kukupa kuti ube musongo kutegwa ukafwutuke kwiinda mulusyomo muli Kilisito Jesu.
16 Magwalo oonse akasololelwa a Leza alimwi alagwasya mukuyiisya, mukusinsa, mukululamika, mukulaya cabululami,
17 kutegwa muntu wa Leza aelele ncobeni, kalibambilide cakumaninina kubeleka mulimo mubotu uuli woonse.
