Bahebrayo 10:1-39
10 Lino mbwaanga Mulawo ncimvwule buyo cazyintu zibotu ziboola, pele ikutali zyintu eezyo zini-zini, bantu tabakonzyi kwiinda mukuzumanana kutuula zipaizyo nzimunya mwaka amwaka kubapa kulondoka aabo baboola kuli Leza.
2 Ikuti nocali boobo, sena zipaizyo nozyatakaleka kutuulwa? Nkaambo aabo babeleka mulimo uusetekene ibakasalazyigwa ciindi comwe buyo nobatali kuzumanana kupenga mumizeezo akaambo kazibi.
3 Muciindi caboobo, zipaizyo eezyi nciibalusyo cazibi mwaka amwaka,
4 nkaambo bulowa bwabapoho abwampongo tabukonzyi kugusya zibi pe.
5 Aboobo naakaboola munyika wakaambila Leza kuti: “‘Zipaizyo alimwi azituuzyo tiiwakaziyanda pe, pele wakandibambila mubili.
6 Tiiwakazikkomanina pe zituuzyo zyuumpwa zyuumbulu azituuzyo zyacibi.’
7 Mpoonya ndakati, ‘Bona! Ndaboola, (mubbuku lyakuvwunga kulilembedwe kujatikizya ndime) kuti ndicite kuyanda kwako, O Leza.’”
8 Kusaanguna naakamana kwaamba kuti: “Tiiwakaziyanda nokuba kuzikkomanina zipaizyo azituuzyo alimwi zituuzyo zyuumpwa zyuumbulu azituuzyo zyacibi—izipaizyo zituulwa kweelana a Mulawo—
9 mpoonya waamba kuti: “Bona! Ndaboola kuti ndicite kuyanda kwako.” Wagusya bubambe bwakusaanguna kutegwa atalisye bubambe bwabili.
10 Kwiinda mu “kuyanda” ooko, twakasalazyigwa kwiinda mucituuzyo camubili wa Jesu Kilisito ciindi comwe buyo kukabe kutamani.
11 Alimwi, mupaizi woonse ulaima abusena bwakwe buzuba abuzuba kuti abeleke mulimo alimwi akutuula zipaizyo nzizyonya lyoonse, eezyo zitakonzyi kugusya zibi cakumaninina.
12 Pele muntu ooyu wakatuula cipaizyo cazibi ciindi comwe buyo kukabe kutamani akuyookkala kujanza lyalulyo lya Leza,
13 kuzwa ciindi eeco wali kulindila kusikila basinkondonyina bakabikkwe kuba cilyatilo camaulu aakwe.
14 Nkaambo kwiinda mucituuzyo cacipaizyo comwe aabo basalazyigwa wabapa kulondoka kukabe kutamani.
15 Kunze lyaboobo, muuya uusalala awalo ulapa bumboni kulindiswe, nkaambo nowamana kwaamba kuti:
16 “‘Eeci ncecizuminano ncendiyoobamba ambabo aakwiinda mazuba aayo,’ mbwaamba Jehova. ‘Ndiyoobikka milawo yangu mumyoyo yabo, alimwi ndiyooilemba mumizeezo yabo,’”
17 mpoonya waamba kuti: “Alimwi kunyina pe nondiyooziyeeya limbi zibi zyabo alimwi amicito yabo iitaluleme.”
18 Lino ikuti eezyi zyalekelelwa, kunyina cituuzyo cacibi ciciyandika.
19 Aboobo bakwesu, mbwaanga tulijisi busicamba bwakweenda munzila iikonzya kutunjizya mubusena busalala akaambo kabulowa bwa Jesu,
20 eeyo njaakatujalwida kiili nzila mpya alimwi iipona iyiinda mumulembo wakusitilizya, nkokuti mubili wakwe,
21 alimwi mbwaanga tulijisi mupaizi mupati uulanganya ŋanda ya Leza,
22 atumusikile Leza amyoyo iituba alimwi alusyomo luyumu nta, mbwaanga myoyo yesu yakasalazyigwa* kumanjezyeezya mabyaabi alimwi mibili yesu yakasanzyigwa amaanzi aasalala.
23 Atucijatisye coolwe ncotujisi cakwaambilizya bulangizi bwesu antangalala kakunyina kuzungaana, nkaambo ooyo wakasyomezya ulasyomeka.
24 Alimwi katubikkilana maano ikutegwa tukulwaizyanye kutondezya luyando akucita milimo mibotu,
25 tutanooleki kuswaangana antoomwe, mbuli bamwi ibajisi ciyanza eeci, pele katuyumizyanya umwi amweenzinyina, alimwi atuzumanane kucita boobo ikapati mbomubwene kuti buzuba bwaswena afwaafwi.
26 Nkaambo ikuti katucita cibi acaali notwamana kutambula luzyibo lwini-lwini lwakasimpe, kunyina cipaizyo cimbi cazibi cili coonse cicisyeede pe,
27 pele kuli buyo bulangizi bwalubeta buyoosya alimwi abukali buyaka mulilo ibuyoonyonyoona baabo ibakazya.
28 Kufwumbwa muntu uunduluzya mulawo wa Musa ulajaigwa kakunyina kufwidwa lubomba, ikuti kakuli bumboni bwabantu bobilo naa botatwe.
29 Aboobo ino muyeeya kuti cinooli cipati buti cisubulo ncayoopegwa muntu ooyo iwalyataula Mwana wa Leza alimwi iwabona bulowa bwacizuminano oobo mbwaakasalazyigwa ambubo kuti bunyina mpindu, alimwi iwanyemya akutukana muuya waluzyalo lwa Leza?
30 Nkaambo tulimuzyi ooyo wakaamba kuti: “Cisubulo ncicangu; ndime nendiyoopilusya cibi”; alimwi akuti: “Jehova uyoobabeteka bantu bakwe.”
31 Cilayoosya kuwida mumaanza aa Leza uupona.
32 Nokuba boobo, amuzumanane kuyeeya mazuba aakaindi, kuti eelyo nomwakamana kumunikilwa, mwakaliyumya akupenga mumasukusyo mapati.
33 Zimwi ziindi mwakali kusampaulwa akupenzyegwa antangalala,* alimwi aziindi zimwi mwakali kupengela antoomwe abaabo ibakali kucitikilwa zyintu zili boobo.
34 Nkaambo mwakabeetelela aabo ibakali muntolongo alimwi cakukondwa mwakazumina kunyangwa lubono lwanu akaambo kakuzyiba kuti nywebo mujisi lubono lwiinda kubota alimwi lutamani.
35 Aboobo mutalusowi pe lwaanguluko lwanu lwakwaambaula cakutayoowa, oolo iluyoomuletela bulumbu bupati.
36 Nkaambo muyandika kuliyumya, ikutegwa mwamanizya kucita kuyanda kwa Leza, mukatambule zyintu eezyo izyakasyomezyegwa.
37 Nkaambo kusyeede buyo “kaindi kaniini,” eelyo “ooyo uuboola ulasika alimwi takoomuka pe.”
38 “Pele mululami wangu uyoopona akaambo kalusyomo,” alimwi, “ikuti naa wapiluka cifwuteesule, mebo tandibotelwi anguwe pe.”
39 Lino swebo tatuli baabo ibapiluka cifwuteesule, eeco citola kulunyonyooko, pele tuli baabo ibajisi lusyomo oolo lutola kulufwutuko lwabuumi bwesu.
Bupanduluzi buyungizyidwe
^ Mu Chigiliki, “yakasansailwa,” nkokuti, abulowa bwa Jesu.
^ Mu Chigiliki, “mbuli mubbuwa lyazisobano.”
