Baroma 3:1-31
3 Aboobo ino ba Juda babainda buti bamwi, naa ino bupalule bujisi mpindu nzi?
2 Munzila zinji kapati alimwi ziindene-indene. Ikusaanguna, nkaambo bakapegwa mukuli wakulanganya makani aasetekene aa Leza.
3 Aboobo se-na kuli mulandu aawa? Ikuti bamwi tiibakajisi lusyomo, sena ikubula lusyomo kwabo inga kwapa kuti kusyomeka kwa Leza kube kwabuyo?
4 Peepe! Pele Leza ngwamasimpe lyoonse, nokuba kuti bantu mbabeji, mbubonya mbokulembedwe kuti: “Kutegwa kuzyibwe kuti uliluleme mumajwi ngokanana akuti ulazunda nobetekwa.”
5 Pele ikuti kutalulama kwesu kwapa kuti bululami bwa Leza butondezyegwe antangalala, ino inga twaamba nzi? Sena inga twaamba kuti Leza taluleme akaambo kakutondezya bukali bwakwe? (Ndaambaula mbobaambaula bantu.)
6 Peepe! Ikuti Leza taluleme, ino uyooibeteka buti nyika?
7 Pele ikuti akaambo kabubeji bwangu ikasimpe ka Leza kazyibwa kapati akupa kuti alemekwe, ino nkaambo nzi ncondicibetekwa mbuli muntu sizibi?
8 Alimwi ino nkaambo nzi ncotutaambi mbobatubejelezya bantu bamwi kuti mbotwaamba kuti: “Atucite zyintu zibi kutegwa kuboole zyintu zibotu”? Lubeta iluyoopegwa bantu aabo luleendelana abululami.
9 Aboobo ino muyeeya buti? Sena swebo toba Juda tuli acoolwe kwiinda bamwi? Peepe! Nkaambo musyule twaamba kale kuti ba Juda aba Giliki boonse beendelezyegwa acibi;
10 mbubonya mbokulembedwe kuti: “Kunyina muntu uululeme, kunyina naba omwe pe;
11 kunyina muntu uumvwisya, kunyina uuyandaula Leza.
12 Bantu boonse baleya, boonse antoomwe tabacikwe mpindu; kunyina muntu siluzyalo, kunyina naba omwe pe.”
13 “Igoyooyo* lyabo lili mbuli cuumbwe cikwazeme, beena bamwi amilaka yabo.” “Kunsi aamilomo yabo kuli buyoka bwanzoka.”
14 “Alimwi mukanwa mwabo muzwide kusinganya abukali.”
15 “Maulu aabo abalikila kukutila bulowa.”
16 “Kuli lunyonyooko amapenzi munzila mobainda,
17 alimwi kunyina nobaizyi inzila yaluumuno.”
18 “Kunyina nobamuyoowa Leza naaceya.”
19 Lino tulizyi kuti zyintu zyoonse zyaambwa mu Mulawo zyaambilwa baabo beendelezyegwa a Mulawo, ikutegwa milomo yabantu boonse imumwe akuti nyika yoonse yeelele kupegwa cisubulo cizwa kuli Leza.
20 Aboobo kumbele lyakwe kunyina muntu uunga waambwa kuti mululami akaambo kakuti utobela mulawo, nkaambo mulawo upa kuti muntu acizyibe kabotu cibi.
21 Pele lino calibonya kuti kuba mululami kuli Leza kulakonzyeka kakunyina kutobela Mulawo. Aaka nkakaambo ikakaambwa amwalo mu Mulawo amu Basinsimi,
22 inzya muntu ulakonzya kuba mululami kuli Leza kwiinda mukusyoma Jesu Kilisito, alimwi kulakonzyeka kubantu boonse ibasyoma. Nkaambo kunyina lwiindano luliko akati kabantu boonse.
23 Nkaambo boonse bakabisya alimwi balalezya kubulemu bwa Leza,
24 pele Leza muluzyalo lwakwe wakabapa cipego cabuyo cakuti babe balulami kwiinda mukubaangununa acinunuzyo ca Kilisito Jesu.
25 Leza wakamutuula kali cituuzyo cakumanya zibi akuyanzanisya baabo basyoma mubulowa bwakwe. Wakacita boobo ikutegwa atondezye kuti wakaliluleme, nkaambo Leza wakali kukkazyika moyo akulekelela zibi zyakacitika kaindi.
26 Wakacita boobo kutegwa atondezye kuti uliluleme nokuba kuciindi cino nabona muntu woonse uusyoma Jesu kuti uliluleme.
27 Aboobo ino kulidunda kuli kuli? Kwagusyigwa. Ino kwagusyigwa amulawo uuli? Sena mulawo wamilimo? Peepe, pele nkwiinda mumulawo walusyomo.
28 Nkaambo tulizyi kuti muntu waambwa kuti mululami akaambo kalusyomo ikutali milimo yamulawo.
29 Sena ngu Leza waba Juda balikke na? Sena abalo bamasi tali Leza wabo? Inzya, abalo bamasi ngu Leza wabo.
30 Mbwaanga Leza ngumwi, bantu bapalwidwe uyoobaamba kuti baliluleme akaambo kalusyomo abantu batapalwidwe kuti baliluleme kwiinda mulusyomo lwabo.
31 Aboobo sena tujaya mulawo akaambo kalusyomo lwesu? Peepe! Muciindi caboobo, tusimya mulawo.
Bupanduluzi buyungizyidwe
^ Naa, “cikulumino, aamoyo.”
