Baroma 8:1-39
8 Aboobo aabo bakamantene a Kilisito Jesu tabajisi mulandu.
2 Nkaambo mulawo wamuuya ooyo uupa buumi muli Kilisito Jesu wamwaangununa kumulawo wacibi awalufwu.
3 Eeco nciwakaalilwa kucita Mulawo akaambo kakuti wakanyina nguzu akaambo kakutalondoka kwabantu, Leza wakacicita kwiinda mukutuma Mwanaakwe mwini muciimo cabantu basizibi alimwi akujatikizya cibi, wakasinganya cibi cili mumubili,
4 ikutegwa ceelelo ca Mulawo ciluleme cizuzikizyigwe mulindiswe, swebo notweenda kweelana amuuya ikutali kweelana azisusi zyamubili.
5 Nkaambo aabo ibeendelezyegwa amubili bayeeya buyo zyintu zyamubili, pele aabo beendelezyegwa amuuya bayeeya zyamuuya.
6 Nkaambo kubikkila maano zyamubili caamba lufwu, pele kubikkila maano zyamuuya caamba buumi aluumuno;
7 nkaambo kubikkila maano zyamubili caamba businkondonyina a Leza, nkaambo mubili tuulibombyi kumulawo wa Leza alimwi kunyina buya nuunga wacita oobo.
8 Aboobo aabo beendelezyegwa amubili tabakonzyi kumukkomanisya Leza.
9 Pele nywebo tamweendelezyegwi amubili, mweendelezyegwa amuuya ikuti muuya wa Leza kuukkede ncobeni mulindinywe. Pele ikuti muntu katajisi muuya wa Kilisito, imuntu ooyu tali wakwe pe.
10 Pele ikuti Kilisito kakamantene andinywe, nkokuti mubili ulifwide akaambo kacibi, pele muuya mbuumi akaambo kabululami.
11 Lino ikuti muuya wayooyo wakabusya Jesu kuzwa kubafwu kuukkede mulindinywe, ooyo wakabusya Kilisito Jesu kuzwa kubafwu uyoopa mibili yanu iifwa ayalo kuba abuumi kwiinda mumuuya wakwe uukkede mulindinywe.
12 Aboobo bakwesu, tulijisi mulimo ngotweelede kucita, ikutali kumubili kutegwa tweendelezyegwe amubili;
13 nkaambo ikuti kamweendelezyegwa amubili muyoofwa ncobeni; pele ikuti mwajaya micito yamubili kwiinda mumuuya, muyoopona.
14 Nkaambo boonse aabo beendelezyegwa amuuya wa Leza mbana ba Leza.
15 Nkaambo tiimwakatambula muuya wabuzike uumupa kuyoowa alimwi pe, pele mwakatambula muuya uumupa kuba bana ba Leza, muuya ooyo uutupa koompolola kuti: “Abba, Taata!”
16 Muuya ooyo wini upa bumboni antoomwe amuuya wesu kuti tuli bana ba Leza.
17 Aboobo ikuti katuli bana, nkokuti alimwi tuli basikukona: basikukona lukono kuzwa kuli Leza, pele tuli basikukonanyina a Kilisito kufwumbwa kuti twapenga anguwe kutegwa tukapegwe bulemu antoomwe anguwe.
18 Lino ndibona kuti mapenzi ngotujisi kuciindi cino taakwe mbwaabede pe kweelana abulemu ibuyooyubununwa mulindiswe.
19 Nkaambo zilenge zilalangila cakuyandisisya kuyubununwa kwabana ba Leza.
20 Nkaambo izilenge zyakaba abuumi bwabuyo, ikutali kuti zyakaliyandila buya pe, pele nkaambo kayooyo wakayanda kuti kube boobo akaambo kabulangizi
21 bwakuti zilenge azyalo ziyooangununwa kubuzike bwakubola akuba alwaanguluko lwabulemu bwabana ba Leza.
22 Nkaambo tulizyi kuti zilenge zyoonse zilatongela lyoonse akuba amacise caantoomwe kusikila lino.
23 Kunze lyaboobo, aswebo notujisi micelo mitaanzi, nkokuti muuya, inzya tulatongela mumyoyo yesu, eelyo notulindila cakuyandisisya kuba bana ba Leza, akwaangununwa kwamibili yesu acinunuzyo.
24 Nkaambo twakafwutulwa katujisi bulangizi oobu; pele bulangizi ibwalibonya tabucili bulangizi pe, nkaambo ikuti naa muntu wacibona cintu, sena inga ucicilangila?
25 Pele ikuti katulangila cintu ncotutaboni, tulazumanana kucilindila cakuliyumya.
26 Mbubonya buyo muuya awalo ulatugwasya mukulezya kwesu; nkaambo penzi ndyakuti nokuba kuti tuleelede kupaila tatuzyi pe mbotweelede kupaila, pele muuya wini ulatukombelezyezya kujatikizya kutongela nkotukakilwa kwaamba cakupozya.
27 Nokuba boobo, ooyo uulingula myoyo ulizyizyi ncozyaamba zikombelezyegwa amuuya nkaambo ukombelezyezya basalali kweelana akuyanda kwa Leza.
28 Lino tulizyi kuti Leza upa kuti milimo yakwe yoonse ibelekele antoomwe kububotu bwabaabo bamuyanda Leza, aabo bali mbambabo bakaitwa kweelana amakanze aakwe;
29 nkaambo aabo mbaakasaanguna kubikkila maano alimwi wakabasalila limwi kuti babe mbuli cikozyanyo ca Mwanaakwe, kutegwa abe mutaanzi kuzyalwa akati kabanabokwabo banji.
30 Kunze lyaboobo, aabo mbaakasalila limwi mbambabo alimwi mbaakaita; alimwi aabo mbaakaita mbambabo alimwi mbaakaamba kuti baliluleme. Mpoonya aabo mbaakaamba kuti baliluleme mbambabo alimwi mbaakalemya.
31 Aboobo ino twaambe nzi kujatikizya zyintu eezyi? Ikuti Leza kali andiswe, ino nguni uukonzya kutulwana?
32 Ikuti naa tanaakalesya Mwanaakwe mwini kupenga, pele wakamulekela kuti afwide ndiswe toonse, sena alimwi antoomwe anguwe takatupi zyintu zimbi zyoonse?
33 Nguni uunga wabapa mulandu basale ba Leza? Leza mwini ngonguwe uubaamba kuti mbalulami.
34 Ino nguni uunga wabapa mulandu? Kilisito Jesu ngonguwe wakafwa, atwaambe kuti iwakabusyigwa kuzwa kubafwu lino uuli kujanza lyalulyo lya Leza, ooyo alimwi uutukombelezyezya.
35 Ino nguni uunga watwaandaanya kuluyando lwa Kilisito? Sena mapenzi, naa kukatazyigwa, naa kupenzyegwa, naa nzala, naa mantanda, naa zyintu ziyoosya, naa panga?
36 Mbubonya mbokulembedwe kuti: “Akaambo kanduwe tuli muntenda yakujaigwa ciindi coonse, tubonwa mbuli mbelele ziyanda kujaigwa.”
37 Muciindi caboobo, muzyintu zyoonse eezyi tulazunda cakumaninina kwiinda muli yooyo wakatuyanda.
38 Nkaambo ndilisinizyide kuti lube lufwu, naa buumi, naa bangelo, naa mfwulumende, naa zyintu ziliko lino, naa zilangilwa kumbele, naa nguzu,
39 naa zyintu zili mujulu, naa zili ansi, naa cilenge cimbi cili coonse tazikonzyi kutwaandaanya pe kuluyando lwa Leza luli muli Kilisito Jesu Mwami wesu.
