Ciyubunuzyo 19:1-21
19 Nozyakamana zyintu eezyi, ndakamvwa icakali kulimvwisya mbuli kuti ndijwi pati lyankamu mpati kujulu. Bakati: “Amutembaule Ja!* Ilufwutuko, bulemu alimwi anguzu nzizya Leza wesu,
2 nkaambo imbeta zyakwe nzyamasimpe alimwi zililuleme. Nkaambo wamubeteka mukaintu muvwuule mupati iwakasofwaazya nyika abwaamu bwakwe, alimwi wapilusya bulowa bwabazike bakwe alinguwe.”
3 Alimwi ndilyonya eelyo kwaciindi cabili bakati: “Amutembaule Ja! Alimwi busi buzwa kukupya kwakwe* bunoosuka lyoonse mane kukabe kutamani.”
4 Mpoonya baalu ibali makumi obilo abane antoomwe azilenge zyuumi zyone bakaliwaala ansi akukomba Leza, ooyo wakakkede acuuno cabwami, akwaamba kuti: “Ameni! Amutembaule Ja!”
5 Alimwi kucuuno cabwami kwakazwa jwi lyakati: “Kamumutembaula Leza wesu nywebo nobazike bakwe boonse, nomumuyoowa, nobaniini anobapati.”
6 Mpoonya ndakamvwa icakali kulimvwisya mbuli kuti ndijwi lyankamu mpati alimwi mbuli kuvwuuma kwamaanzi manji alimwi mbuli mizumo yanguzu. Bakati: “Amutembaule Ja, nkaambo Jehova Leza wesu, Singuzuzyoonse, watalika kulela kali Mwami.
7 Atusekelele akukondwa kapati, alimwi atumupe bulemu, nkaambo lukwatano lwa Mwanaambelele lwasika alimwi mukaintu wakwe walibambila kale.
8 Inzya, wazumizyigwa kusama cisani cibotu cuuba-uba, ciŋaima, citakwe tombe—nkaambo eeco cisani cibotu cuuba-uba ciiminina milimo iiluleme yabasalali.”
9 Mpoonya wakandaambila kuti: “Lemba kuti: Balikkomene aabo batambidwe kucilalilo calukwatano lwa Mwanaambelele.” Alimwi wakandaambila kuti: “Aaya majwi aa Leza aamasimpe.”
10 Eelyo ndakaliwaala ansi kumaulu aakwe kuti ndimukombe. Pele wakandaambila kuti: “Utaciti oobo pe! Mebo ndili muzike buyo mbubonya mbuli nduwe abanabokwanu ibajisi mulimo wakucitila Jesu bumboni. Komba Leza; nkaambo kucitila Jesu bumboni ngomulimo* wabusinsimi.”
11 Alimwi ndakabona julu kalijalulwa, eelyo amubone kwakali bbiza lituba. Lino ooyo uutantide alindilyo wiitwa kuti Uusyomeka alimwi Wamasimpe, alimwi ulabeteka akulwana mubululami.
12 Meso aakwe mulilo uuvwilima, alimwi kumutwe ujisi misini minji. Uli azyina lilembedwe litazyibidwe amuntu uuli woonse ccita buyo walo mwini,
13 alimwi usamide cisani caatala cisansaidwe bulowa, alimwi wiitwa zyina lyakuti, Jwi lya Leza.
14 Kunze lyaboobo, impi zyabasikalumamba bakujulu bakali kumutobela kabatantide mabbiza aatuba, alimwi bakasamide zisani zyuuba-uba, zituba, zitakwe tombe, zibotu.
15 Alimwi mukanwa lyakwe muzwa panga damfwu libosya, lyakuti aumye masi, alimwi uyoobeembela ankoli yabutale. Kunze lyaboobo, ulalyataula mucikandilo camasaansa cabukali bwakunyema kwa Leza Singuzuzyoonse.
16 Lino acisani cakwe caatala, inzya, mpocili acibelo, ulembedwe zyina lyakuti Mwami wabami alimwi Simalelo wabasimalelo.
17 Alimwi ndakabona mungelo kaimvwi muzuba, mpoonya wakoongolola ajwi pati ikwaambila bayuni boonse bauluka mumulengalenga kuti: “Amuboole kuno, mubungane antoomwe kucilalilo citalikomeneni ca Leza,
18 kutegwa mulye nyama yabami, nyama yabeendelezi babasikalumamba, nyama yabantu bayumu, nyama yamabbiza ayabaabo batantide alingawo, nyama yabantu boonse, yabantu baangulukide abazike, baniini alimwi abapati.”
19 Lino ndakabona munyama abami bamunyika ampi zyabo zyabasikalumamba kababungene antoomwe kuti balwane yooyo uutantide bbiza alimwi ampi yakwe yabasikalumamba.
20 Mpoonya munyama wakajatwa, antoomwe amusinsimi wakubeja ooyo wakali kucita zitondezyo kumbele lyakwe eezyo nzyaakali kubelesya kweena baabo bakatambula caando camunyama abaabo bakomba cikozyanyo cakwe. Kabacili baumi, boonse bobilo bakawaalwa muzyiba lyamulilo liyaka asulufa.
21 Pele aabo boonse bakasyaala bakajaigwa apanga damfwu eelyo lyakali kuzwa mukanwa lyayooyo uutantide abbiza. Mpoonya bayuni boonse bakakkuta nyama yabo.
Bupanduluzi buyungizyidwe
^ Naa, “Aleluya.” Mu Chihebulayo icaamba kuti, “Amutembaule Jehova.”
^ Nkokuti, kwa Babuloni Mupati.
^ Naa, “ngomuuya.”
