Ciyubunuzyo 4:1-11
4 Nozyakamana zyintu eezyi ndakalanga akubona mulyango uujalukide kujulu, mpoonya ijwi lyakusaanguna ndindakamvwa lyakali mbuli kulila kwamweembo, ilyakaambaula andime, kaliti: “Tanta uboole kuno, eelyo ndilakutondezya zyintu zyeelede kucitika.”
2 Mpoonya aawo ndakaba munguzu zyamuuya: eelyo ndakabona cuuno cabwami aabusena bwancico kujulu, alimwi acuuno cabwami eeco kuli umwi uukkede mpawo.
3 Lino ooyo uukkede aawo ulibonya mbuli bbwe lyajasipa ambuli bbwe liyandisi lisalala, alimwi cuuno cabwami cizingulukidwe fulicoongo uulibonya mbuli bbwe lyaemalodi.
4 Mpoonya ikuzinguluka cu-uno cabwami eeco kuli zyuuno zyabwami zili makumi obilo azine, alimwi azyuuno zyabwami eezyi ndakabona baalu bali makumi obilo abane ibakakkede alinzizyo kabasamide zisani zyaatala zituba alimwi kumitwe bakasamide misini yangolida.
5 Lino kucuuno cabwami eeco kuzwa ndabo, imajwi alimwi amizumo; alimwi kuli malambe aamulilo aali ciloba aayaka kumbele lyacuuno cabwami, eelyo aaya aiminina myuuya ya Leza iili ciloba.
6 Kumbele lyacuuno cabwami kuli cilibonya mbuli lwizi luŋaima mbuli gilazi, mbuli bbwe libalangala.
Mpoonya akati kacuuno cabwami alimwi akuzinguluka cuuno cabwami kuli zilenge zyuumi zyone izijisi meso koonse-koonse, kumbele akusyule.
7 Lino cilenge cuumi cakusaanguna cilibonya mbuli syuumbwa, cilenge cuumi cabili cilibonya mbuli poho uucili mwana, cilenge cuumi catatu cili abusyu bulibonya mbuli bwamuntu, mpoonya cilenge cuumi cane cilibonya mbuli sikwaze wuuluka.
8 Lino ikujatikizya zilenge zyuumi zyone, cimwi acimwi kucigama cijisi mababa aali cisambomwi; mababa aaya ajisi meso koonse-koonse, atala alimwi amukati. Alimwi syikati amasiku tazileki pe kwaamba kuti: “Ulasalala, ulasalala, ulasalala Jehova Leza, Singuzuzyoonse, ooyo wakaliko, uuliko alimwi uuboola.”
9 Alimwi kufwumbwa leelyo zilenge zyuumi eezyi nozipa bulemu alulemeko alimwi akulumba kuli Yooyo uukkede acuuno cabwami, Ooyo uupona lyoonse mane kukabe kutamani,
10 ibaalu bali makumi obilo abane balaliwaala ansi kumbele lya Yooyo uukkede acuuno cabwami akumukomba Ooyo uupona lyoonse mane kukabe kutamani, alimwi bawaala misini yabo kumbele lyacuuno cabwami, kabaamba kuti:
11 “Uleelela, Jehova, O Leza wesu, ikutambula bulemu alulemeko alimwi anguzu, nkaambo nduwe wakalenga zyintu zyoonse, alimwi akaambo kakuyanda kwako zyakabako alimwi zyakalengwa.”
