Luka 14:1-35
14 Aciindi cimwi wakanjila muŋanda yaumwi wabeendelezi baba Falisi mu Sabata kuyoolya cakulya, eelyo bakali kumulangisya.
2 Lino amubone! Kumbele lyakwe kwakali muntu umwi wakazimbide mubili.
3 Aboobo Jesu wakabuzya baabo bazyi Mulawo aba Falisi kuti: “Sena cilizumizyidwe kuponya mu Sabata naa pe?”
4 Pele bakaumuna buyo. Mpoonya wakajata muntu ooyo, wakamuponya akumwaambila kuti aunke kwabo.
5 Mpoonya wakababuzya kuti: “Nguni akati kanu uutakonzyi kumugusya ndilyonya mwanaakwe naa ŋombe yakwe ikuti yawida mumukalo mubuzuba bwa Sabata?”
6 Pele tiibakali kukonzya kumwiingula kutwaambo toonse ootu.
7 Mpoonya naakabona kuti ibantu bakatambwa bakali kulisalila masena aakukkala aalemenede, wakabaambila cikozyanyo. Wakati:
8 “Umwi muntu naakutamba kupobwe lyalukwatano, utakkali mubusena bulemenede kapati. Nkaambo ambweni simeenzu wako wakatamba aumwi uulemenede kwiinda nduwe,
9 aboobo ooyo wakakutamba amuntu ooyo bayoosika akukwaambila kuti, ‘Akukkale yooyu abusena oobu.’ Eelyo uyoonyamuka akweenda kofwide nsoni kuyookkalila kubusena bwakumamanino.
10 Pele nowatambwa, koya ukakkalile kubusena bwakumamanino, kutegwa muntu ooyo wakutamba asika akwaambile kuti, ‘Mweenzuma, koya ukkalile kumbele.’ Eelyo uyooba abulemu kumbele lyabeenzunyoko boonse.
11 Nkaambo woonse uulisumpula uyoocesyegwa alimwi woonse uulicesya uyoosumpulwa.”
12 Mpoonya alimwi wakaambila muntu ooyo wakamutamba kuti: “Wabamba cisusulo naa cilalilo, utaiti beenzinyoko, banabokwanu, basazinyoko, naa basimukobonyoko bavwubide. Nkaambo ambweni kumbele abalo bayookutamba, eelyo ooko inga kwaba kukupilusizya.
13 Pele nowabamba pobwe, tamba bantu bacete, basunkuta, balema, aboofwu,
14 eelyo uyookkomana mbwaanga tabajisi cakukupilusizya. Nkaambo uyoolumbulwa mububuke bwabaluleme.”
15 Naakamvwa makani aaya, umwi akati kabeenzunyina wakamwaambila kuti: “Ulikkomene ooyo uulya cakulya mu Bwami bwa Leza.”
16 Jesu wakamwaambila kuti: “Umwi muntu wakali kubamba cilalilo citalikomeneni, mpoonya wakatamba bantu banji.
17 Eelyo wakatuma muzike wakwe awoola lyacilalilo kuyooambila bakatambidwe kuti, ‘Katuya, nkaambo zyintu zyabambwa lino.’
18 Pele boonse bakatalika kulitamizya. Wakusaanguna wakamwaambila kuti, ‘Ndakaula muunda aboobo ndeelede kuunka kuyooubona; Ndalomba kuti undijatile.’
19 Aumwi wakati, ‘Ndakaula zipani zyabasune zyosanwe alimwi nduunka kuyoobona mbobabede; Ndalomba kuti undijatile.’
20 Alimwi umbi wakati, ‘Ndakazwa akukwata onoono, aboobo nsikonzyi kuboola.’
21 Aboobo muzike wakapiluka akwaambila simalelo wakwe zyintu eezyi zyoonse. Mpoonya mwiniŋanda wakakalala akwaambila muzike wakwe kuti, ‘Fwambaana koya mumigwagwa amunzila zyamumunzi ukalete bantu bacete abasunkuta aboofwu abalema.’
22 Mukuya kwaciindi muzike wakati, ‘Simalelo wangu, ndacita mbubonya mbowalailila, pele masena nkwaacili.’
23 Mpoonya simalelo wakaambila muzike kuti, ‘Koya munzila amutuzila twiinda musyokwe, ukabasungilizye bantu kuti baboole ikutegwa ŋanda yangu izule.
24 Nkaambo ndimwaambila kuti: Kunyina naba omwe akati kabantu aabo bakatambidwe uuyoolabila cilalilo cangu.’”
25 Lino makamu-makamu aabantu akali kweenda anguwe, eelyo wakacenguluka akubaambila kuti:
26 “Ikuti umwi waboola kulindime pele katasulaiki bausyi, banyina, mukaintu wakwe, bana, abanabokwabo basankwa abasimbi, inzya, alimwi mane abuumi bwakwe bwini, takonzyi kuba sikwiiya wangu.
27 Kufwumbwa uutanyamwide cisamu cakwe cakupenzyezya akunditobela takonzyi kuba sikwiiya wangu.
28 Mucikozyanyo, nguni wanu uuyanda kuyaka ngazi uutasaanguni kukkala ansi akubona mali aayandika, kutegwa azyibe naa ulijisi mali aakkwana kuyasya alimwi akumanizya ngazi eeyo?
29 Buyo-buyo, ulakonzya kuyaka ntalisyo ilikke akukakilwa kwiimanizya, mpoonya basikulangilila boonse bayootalika kumuseka,
30 kabati: ‘Muntu ooyu wakatalika kuyaka, pele cakamwaalila kumanizya.’
31 Naa, ino mwami nzi uujisi basikalumamba bali 10,000 uuya kukulwana nkondo amwami umbi, uutasaanguni kukkala ansi kuyeeya akulomba lulayo kuli bamwi kubona naa inga wacikonzya kulwana mwami uujisi basikalumamba bali 20,000?
32 Ikuti wabona kuti inga tacikonzyi, imwaminyina ooyo kacili kule, ulatuma baiminizi bakwe kuyoobandika makani aaluumuno anguwe.
33 Mbubonya buyo, kunyina muntu akati kanu uutasiyi lubono lwakwe loonse uukonzya kuba sikwiiya wangu.
34 “Mubwini munyo mubotu. Pele nouba munyo, ikuti wasampuka, ino inga wacitwa buti kuti utalike kulula alimwi?
35 Inga tuucigwasyi pe kuubikka mubulongo nomuba mumbolezi. Bantu bausowela buyo anze. Ooyo ujisi matwi aaswiilila, aaswiilile.”
