Luka 24:1-53
24 Pele mubuzuba bwakusaanguna bwansondo, bakafwuma kuboola kucuumbwe, ikuleta tununkilizyo ntobakalibambilide.
2 Nokuba boobo, bakajana bbwe lyakunkulisyigwa kuzwa kucuumbwe,
3 alimwi nobakanjila mukati, tiibakaujana mubili wa Mwami Jesu.
4 Kabacigambidwe amakani aaya, amubone! Akati kabo kwakalibonya baalumi bobilo basamide zisani zinyengema.
5 Bamakaintu aaba bakayoowa alimwi bakazumanana kusintama, aboobo ibaalumi aabo bakati kuli mbabo: “Nkaambo nzi ncomulangaula Muntu uupona akati kabafwu?
6 [[Tamo muno pe, pele wabusyigwa.]] Amuyeeye mbwaakamwaambila naakacili ku Galilaya,
7 naakaamba kuti Mwana wamuntu weelede kwaabwa kubantu basizibi akugagailwa acisamu, pele mubuzuba bwatatu uyoobuka.”
8 Aboobo bakaayeeya majwi aakwe,
9 eelyo bakapiluka kuzwa kucuumbwe akuyoolwiida bali kkumi aumwi abamwi boonse zyintu eezyi zyoonse.
10 Aaba bakali ba Maliya Magadalene, Jowana alimwi a Maliya banyina Jakobo. Abalo bamakaintu bamwi boonse mbobakali limwi bakali kwaambila batumwa zyintu eezyi.
11 Pele makani aaya akalibonya kuba aabufwubafwuba kuli mbabo, eelyo tiibakabasyoma bamakaintu aabo.
12 [[Pele Petulo wakanyamuka akubalikila kucuumbwe, eelyo naakasondela wakabona buyo milembo ilikke. Aboobo wakazwa ooko kagambidwe kujatikizya cakacitika.]]
13 Pele amubone! Ibuzuba mbubonya oobo, basikwiiya bobilo bakali kuya kumunzi uutegwa Emau uulampa makkilomita aainda kukkumi alyomwe kuzwa ku Jelusalemu,
14 alimwi bakali kubandika akati kabo kujatikizya zyintu eezyi zyoonse zyakacitikide.
15 Lino nobakali kubandika, Jesu lwakwe kumugama wakasika akutalika kweenda ambabo,
16 pele nokuba kuti bakalimubwene, tiibakamuzyiba pe.
17 Wakababuzya kuti: “Ino makani nzi aaya ngomwaambaula nomuyaabweenda?” Mpoonya bakaima kabauside.
18 Mukwiingula ooyo uutegwa Kiliyopa wakati kulinguwe: “Sena uli mweenzu uukkede alikke mu Jelusalemu aboobo tozyi zyintu zyali kucitika mulinguwo mazuba aaya?”
19 Eelyo wakati kuli mbabo: “Izyintu nzi?” Bakati kulinguwe: “Izyintu zijatikizya Jesu waku Nazaleta, ooyo wakaba musinsimi singuzu mumilimo amumajwi kuli Leza akubantu boonse,
20 alimwi basilutwe babapaizi abaleli besu mbobakamupa mulandu wakuti ajaigwe ambobakamugagaila acisamu.
21 Pele twakali kulangila kuti ooyu muntu ngonguwe ooyo wakeelede kunununa Isilayeli; inzya, alimwi kunze lyazyintu zyoonse eezyi, obuno mbuzuba bwatatu kuzwa nozyakacitika zyintu eezyi.
22 Kunze lyaboobo, bamakaintu bamwi akati kesu batugambya abalo nkaambo balifwumide kuunka kucuumbwe,
23 pele tiibaujana mubili wakwe alimwi baboola kabati babona acilengaano cabangelo, ibaamba kuti muumi.
24 Kunze lyaboobo, abamwi mbotwali limwi baluunkide kucuumbwe, alimwi baakucijana mbubonya oobo mbuli bwali kwaamba bamakaintu, pele walo mwini tiibamubona pe.”
25 Mpoonya wakati kuli mbabo: “Nywebo nobafwubafwuba abasimyoyo iimuka kusyoma zyintu zyoonse nzyobakaamba basinsimi!
26 Sena tiicakali kuyandika kuti Kilisito apenge zyintu eezyi akunjila mubulemu bwakwe?”
27 Eelyo kutalikila kuli Musa alimwi a Basinsimi boonse, wakabapandulwida zyintu zyaamba nguwe mu Magwalo oonse.
28 Muciindi bakasika afwaafwi amunzi nkobakali kuunka, pele walo wakacita mbuli kuti ulaindilila.
29 Pele bakamusinikizya kuti ataunki, balaamba: “Kokkala buyo andiswe nkaambo kuyanda kuba kumangolezya alimwi buzuba bwamana kale.” Aboobo wakanjila akukkala ambabo.
30 Lino naakakkede ambabo kuti batalike kulya, wakabweza cinkwa, wakacileleka amane wakacikomoona akutalika kubapa.
31 Naakacita boobo meso aabo akajalulwa eelyo bakamuzyiba, mpoonya wakazimaana.
32 Alimwi bakaambauzyanya balaamba: “Sena myoyo yesu tiiyali kupya ciindi naali kwaambaula andiswe munzila, anaali kutupandulwida Magwalo?”
33 Eelyo aciindi nciconya eeco, bakanyamuka akupiluka ku Jelusalemu, okuya bakajana bali kkumi aumwi alimwi abaabo bamwi mbobakabungene limwi,
34 kabati: “Masimpe Mwami wabusyigwa alimwi walibonya kuli Simoni!”
35 Lino abalo bakaluula zyakacitika munzila ambobakamuzyiba naakakomoona cinkwa.
36 Nobakali kubandika zyintu eezyi walo mwini wakalibonya akati kabo [[akubaambila kuti: “Amube aluumuno.”]]
37 Pele bakaankamana alimwi bakayoowa, kabayeeya kuti babona muuya.
38 Mpoonya wakati kuli mbabo: “Nkaambo nzi ncomupenga kapati mumizeezo alimwi nkaambo nzi ncomudonaika mumyoyo yanu?
39 Amubone maanza amaulu aangu, musinizye kuti ndendime ncobeni; amundijate-jate mubone, nkaambo muuya tuujisi nyama azifwuwa mbuli eezyi nzyomubwene nzyondijisi mebo.”
40 [[Eelyo naakali kwaamba boobu wakabatondezya maanza amaulu aakwe.]]
41 Pele kabatanasyoma akaambo kakukondwa kapati akugambwa, wakababuzya kuti: “Sena kuli cakulya ncomujisi aano?”
42 Mpoonya bakamupa cibeela canswi iiyokedwe,
43 eelyo wakatambula akucilya kumbele lyabo.
44 Lino wakabaambila kuti: “Aaya ngamajwi ngendakamwaambila nindakacili andinywe ikutegwa zyintu zyoonse zilembedwe mu Mulawo wa Musa amu Basinsimi amu Intembauzyo kujatikizya ndime zileelede kuzuzikizyigwa.”
45 Mpoonya wakajalula mizeezo yabo kutegwa bamvwisye ncaamba Magwalo,
46 alimwi wakabaambila kuti: “Munzila eeyi kulilembedwe kuti Kilisito wakali kuyoopenga alimwi akubuka kubafwu mubuzuba bwatatu,
47 alimwi kwiinda muzyina lyakwe, kweempwa kutegwa zibi zilekelelwe kwakali kuyookambaukwa muzisi zyoonse—kutalikila mu Jelusalemu.
48 Muyooba bakamboni bazyintu eezyi.
49 Alimwi amubone! Ndilamutumina eeco ncaakasyomezya Taata. Pele nywebo amukkale mumunzi kusikila mukatambule nguzu zizwa kujulu.”
50 Pele wakabasolweda kusikila munsi-munsi aku Betaniya, alimwi ooko wakatambika maanza aakwe akubaleleka.
51 Naakali kubaleleka wakaandaanizyigwa ambabo alimwi wakatalika kutolwa kujulu.
52 Eelyo bakamufwugamina bamane bakapiluka ku Jelusalemu kabakondedwe kapati.
53 Alimwi lyoonse bakali mutempele kabatembaula Leza.
