Marko 12:1-44
12 Mpoonya wakatalika kubaambila muzikozyanyo ulaamba: “Muntu umwi wakalima muunda wamisaansa akuuyakila lubaya, wakasya dindi lyakukandila masaansa akuyaka ngazi; amane wakuupa kubalimi akuunka kucisi cimbi.
2 Cisike ciindi cakutebula wakatuma muzike wakwe kubalimi kutegwa akamubwezele micelo iili mbwiibede yamumuunda kubalimi.
3 Pele bakamujata, bamuuma akumutanda acinkwamaanza.
4 Alimwi wakatuma aumbi muzike, ooyo bakamuuma amutwe akumusampaula.
5 Mpoonya wakatuma umbi, ooyo bakamujaya, alimwi wakatuma abambi banji, bamwi bakabauma kakuli bamwi bakabajaya.
6 Limwi kumamanino wakasyaazya buyo mwana ngwayandisya ngwaakabatumina kati, ‘Bayoomulemeka mwanaangu.’
7 Pele balimi aabo bakalyaambauzya kuti, ‘Ooyu ngosikukona. Amuboole tumujaye, eelyo lukono lulaba lwesu.’
8 Aboobo bakamujata, bamujaya akumusowela kunze aamuunda wamisaansa.
9 Ino ncinzi ncaya kucita mukamwini muunda wamisaansa? Uyooboola akunyonyoona balimi aaba, eelyo muunda uyakuupa bambi.
10 Sena taakwe nomwakabala lugwalo oolu lwaamba kuti: ‘Ibbwe ndibakakaka bayaki lyaba bbwe liyandika kapati lyakukaswi.
11 Ngu Jehova wapa kuti cibe boobo, alimwi ncibotu mumeso eesu’?”
12 Bamvwe boobo bakatalika kuyandaula nzila yakumujata, pele bakali kuyoowa nkamu yabantu, nkaambo bakazyiba kuti wakali kwaamba mbabo mucikozyanyo. Aboobo bakamuleka, bakaunka.
13 Kumane bakamutumina bamwi ba Falisi abankamu ya Heloda kutegwa bamujanine kaambo kumajwi aakwe.
14 Nibakasika aaba bakamwaambila kuti: “O Mwiiyi, tulizyi kuti lyoonse waamba masimpe alimwi tolibotezyi kumuntu uuli woonse, nkaambo tolangi ciimo camuntu, pele uyiisya nzila ya Leza mukasimpe: Sena cilizumizyidwe kutela mutelo kuli Kaisala naa pe?
15 Tutele naa tutateli?” Mbwaanga wakakuzyiba kuupaupa ameso kwabo, wakabaambila kuti: “Nkaambo nzi ncomundisunkila? Amundipe dinali ndibone.”
16 Bakamuletela dinali lyomwe. Eelyo wakababuzya kuti: “Ino eeci ncikozyanyo cani, alimwi eeli ndizyina lyani?” Bakati: “Nzizya Kaisala.”
17 Jesu wakabaambila kuti: “Amupe Kaisala zyintu zya Kaisala, pele zyintu zya Leza amupe Leza.” Lino majwi ngaakaamba akabagambya kapati.
18 Lino ba Saduki ibaamba kuti kunyina bubuke bakaboola kuli Jesu akumubuzya kuti:
19 “O Mwiiyi, Musa wakatulembela kuti, ikuti munyina wamuntu umwi wafwa akusiya mukaintu pele tanaasiya mwana, imwanookwabo weelede kumubweza mukaintu ooyo akuzyalila imunyina bana kumukaintu ooyo.
20 Kwakali babunyina bali ciloba, eelyo wakusaanguna wakakwata, pele naakafwa tanaakasiya mwana.
21 Eelyo wabili wakamubweza, pele wakafwa kakunyina kusiya mwana, awatatu ncimwi buyo.
22 Boonse bali ciloba kunyina naba omwe wakasiya mwana. Mpoonya awalo mukaintu wakafwa.
23 Mububuke, ino uyooba mukaintu wani? Nkaambo boonse bali ciloba bakalimukwete.”
24 Jesu wakabaambila kuti: “Mulisweekede nkaambo tamuzyi Magwalo naa nguzu zya Leza.
25 Nkaambo baakubuka, baalumi tabakwati abalo bamakaintu tabakwatwi, pele bali mbuli bangelo kujulu.
26 Pele kumakani aakuti bafwide bayoobuka, sena tiimwakabala mubbuku lya Musa mucibalo caamba citewo camamvwa, kuti Leza wakamwaambila kuti: ‘Ndime Leza wa Abulahamu a Leza wa Izaka a Leza wa Jakobo’?
27 Tali Leza wabafwu, pele ngwabaumi. Mulisweekede kapati.”
28 Umwi wabalembi iwakaliko akumvwa mbobakali kukazyanya, naakabona kuti wakabaingula kabotu wakamubuzya kuti: “Ino mulawo nzi mupati kumilawo yoonse?”
29 Jesu wakaingula kuti: “Wakusaanguna ngwakuti, ‘Swiilila O Isilayeli, Jehova Leza wesu ngu Jehova omwe buyo,
30 alimwi weelede kuyanda Jehova Leza wako amoyo wako woonse, abuumi bwako boonse, amizeezo yako yoonse alimwi anguzu zyako zyoonse.’
31 Wabili ngwakuti, ‘Weelede kuyanda simukobonyoko mbubonya mbuli mboliyanda omwini.’ Kunyina mulawo mupati uumbi wiinda yeeyi.”
32 Mulembi ooyu wakamwaambila kuti: “Mwiiyi, waamba camasimpe, ‘Leza ngumwi buyo alimwi kunyina uumbi kunze lyakwe,’
33 alimwi eeci cakuti muntu kamuyanda amoyo wakwe woonse, amaano aakwe oonse, anguzu zyakwe zyoonse alimwi akuyanda simukobonyina mbubonya mbwaliyanda mwini cilayandika kapati kwiinda zituuzyo zyuumpwa zyuumbulu azipaizyo zyoonse.”
34 Lino Jesu naakabona kuti wakaamba cabusongo, wakamwaambila kuti: “Toli kulamfwu a Bwami bwa Leza.” Pele boonse bakayoowa kumubuzya mubuzyo uumbi.
35 Pele Jesu naakazumanana kuyiisya mutempele, wakababuzya kuti: “Nkaambo nzi balembi ncobaamba kuti Kilisito mwana wa Davida?
36 Kwiinda mumuuya uusalala, Davida lwakwe wakati, ‘Jehova wakaambila Mwami wangu kuti: “Kkala kujanza lyangu lyalulyo kusikila ndikabikke basinkondonyoko kunsi aamaulu aako.”’
37 Davida lwakwe umwaamba kuti Mwami, pele ino mbuti mbwakonzya kuba mwanaakwe?”
Eelyo nkamu yabantu mpati yakali kumuswiilila cakukondwa.
38 Aboobo naakali kuyiisya wakati: “Amubacenjelele balembi ibayandisya kweendeenda kabasamide zisani zilamfwu alimwi bayanda kwaanzyigwa cabulemu kumisika
39 alimwi bayandisya zyuuno zyakumbele muzikombelo amasena aalemenede kucilalilo.
40 Mbambabo basaala maanda aabamukabafwu, alimwi cakulicengeezya balapaila mipailo milamfwu; aaba bayoosubulwa kapati.”
41 Mpoonya wakakkala munsi aazibikkilo zyamali akutalika kubona bantu mbobakali kubikka mali muzibikkilo zyamali, bavwubi banji bakali kubikka makkobili manji.
42 Lino kwakaboola mukamufwu mucete iwakabikka tukkobili tobilo tujisi mpindu nsyoonto kapati.
43 Aboobo wakaita basikwiiya bakwe akubaambila kuti: “Ncobeni ndimwaambila kuti mukamufwu ooyu mucete wabikka mali manji kwiinda baabo boonse babikka mali muzibikkilo zyamali.
44 Nkaambo boonse babikka kuzwa kuli yaayo aaindilide, pele walo abucete bwakwe, wabikka oonse ngaajisi, ngaali kuponena.”
