Marko 13:1-37
13 Naakali kuzwa mutempele, umwi wabasikwiiya bakwe wakati kulinguwe: “Mwiiyi, bona! Imabwe aaya, mayake aaya!”
2 Pele Jesu wakamubuzya kuti: “Sena ulanga mayake aaya mapati? Taakwe bbwe liyoocala aano atala aabbwenyina kakunyina kukolomonwa.”
3 Mpoonya naakakkede a Cilundu ca Maolifa kalilibonya tempele, Petulo, Jakobo, Johane alimwi a Anduleya bakatalika kumubuzya kumbali kuti:
4 “Kotwaambila, Ino ndilili zyintu eezyi noziyooba alimwi ncinzi ciyooba citondezyo cituzyibya mamanino aazyintu zyoonse eezyi?”
5 Aboobo Jesu wakatalika kubaambila kuti: “Amulangisye kuti kutabi uumweena.
6 Banji bayooboola muzyina lyangu, kabati, ‘Ndime nguwe,’ eelyo baya kweena banji.
7 Kunze lyaboobo, mwaakumvwa nkondo mumasena aali afwaafwi amasena aali kule, mutakayoowi; eezyi zyintu zyeelede kucitika, pele mamanino taanasika.
8 “Nkaambo cisi ciyoobukila cisinyina abwami buyoobukila bwaminyina; kuyooba mizuzumo yanyika mumasena aaindene-indene; kuyooba nzala. Eezyi ngamatalikilo aamapenzi aali mbuli kumyongwa kwamukaintu.
9 “Pele nywebo, amucenjele; bantu bayoomutola kunkuta, alimwi muyooumwa muzikombelo akubetekwa kubeendelezi akubami akaambo kandime kuti bukabe bumboni kuli mbabo.
10 Alimwi mumasi oonse, makani mabotu aleelede kusaanguna kukambaukwa.
11 Pele nobamutola kunkuta, mutalibiliki kuti muyooamba nzi, pele kufwumbwa ncomuyoopegwa aciindi eeco, amukaambe, nkaambo tamuli ndinywe mwaambaula pe, pele muuya uusalala.
12 Kunze lyaboobo, muntu uyooaba munyina kuti ajaigwe, ausyi uyooaba mwanaakwe, abana bayoobukila bazyali babo akubajazya.
13 Alimwi muyoosulwa abantu boonse akaambo kazyina lyangu. Pele ooyo uuliyumya kusikila kumamanino nguuyoofwutulwa.
14 “Pele mwaakubona cisesemyo cinyonyoona kaciimvwi abusena mpociteelede (ooyo uubala abelesye bupampu), mpoonya aabo bali mu Judaya bakatalike kutijila kumalundu.
15 Muntu uuli aciluli caŋanda atakaseluki naa kunjila muŋanda yakwe kuzwisya cintu cili coonse,
16 awalo muntu uuli mumuunda atakapiluki kuzyintu nzyaasiya kuyoobweza cisani cakwe caatala.
17 Maawe kubakaintu bamitide abaabo banyonsya bana kumazuba aayo!
18 Kamuujisi kupaila kutegwa kutakabi kuciindi camupeyo,
19 nkaambo mazuba aayo ayooba mazuba aamapenzi aatanacitikide kuzwa kumatalikilo aazilenge, eezyo nzyaakalenga Leza kusikila sunu, alimwi kunyina naayooba limbi.
20 Mubwini, ikuti Jehova naatakaafwiinsya mazuba aayo, kunyina muntu wakali kukonzya kufwutuka. Pele akaambo kabasale aabo mbasalide, waafwiinsya mazuba.
21 “Alimwi ikuti umwi akamwaambile kuti, ‘Amubone! Ngooyu Kilisito,’ naa, ‘Amubone! Nguulya,’ mutakasyomi pe.
22 Nkaambo ba Kilisito bakubeja abasinsimi bakubeja bayoobuka akucita zitondezyo azyintu zigambya kutegwa beene, ikuti kacikonzyeka, abasale.
23 Pele nywebo amucenjele; ndamwaambila zyintu zyoonse kazitanacitika.
24 “Pele kumazuba aayo, aakwiinda mapenzi aayo, izuba liyoosizyigwa, mwezi taukamuniki,
25 nyenyeezi ziyooloka kujulu alimwi nguzu zyakujulu ziyoozungaanizyigwa.
26 Mpoonya bayoobona Mwana wamuntu kaboola mumakumbi kajisi nguzu zinji abulemu.
27 Aboobo uyootuma bangelo alimwi bayoobunganya basale bakwe antoomwe kuzwa kumbazu zyone, kuzwa kumagolelo aanyika kusikila kumagolelo aajulu.
28 “Lino amwiiye cikozyanyo eeci kuzwa kumukuyu: Mboyatalikila buyo kusyuuka mitabi yanguwo akuba amatuvwu, mulazyiba kuti mainza ali afwaafwi.
29 Mbubonya buyo, mwaakubona zyintu eezyi kazicitika, amukazyibe kuti uli afwaafwi, uli amulyango.
30 Ncobeni ndimwaambila kuti izyalani eeli talikooyoomana kusikila zyintu zyoonse eezyi zikacitike.
31 Julu anyika ziyoomana, pele majwi aangu taakamani pe.
32 “Kujatikizya buzuba oobo naa ciindi, kunyina uuzizyi pe, nobaba bangelo kujulu naba Mwana, ccita buyo Taata.
33 Amulangile, amupakamane, nkaambo tamuzyi ciindi cibikkidwe nociyoosika.
34 Cili mbuli muntu wakaya kucisi cimbi iwakasiya ŋanda yakwe akupa nguzu bazike bakwe, aumwi wakapegwa mulimo wakwe akulailila sikulindila mulyango kuti kapakamene.
35 Aboobo amulangile, nkaambo tamuzyi Simalelo mukamwini ŋanda naboola, naa uyooboola kumangolezya naa akati kamasiku naa kubucedo naa mafwumofwumo,
36 kutegwa asika cakutayeeyelwa, atamujani muloona.
37 Pele ncondimwaambila, ndaambila boonse kuti: Amulangile.”
