Marko 15:1-47
15 Mbobwakaceda buyo basilutwe babapaizi antoomwe abapati abalembi, nkokuti Nkuta Mpati Yaba Juda yoonse, bakalivwiya-vwiya akumwaanga Jesu bamane bakamutola akumusiya mumaanza aa Pilato.
2 Aboobo Pilato wakamubuzya kuti: “Sena uli Mwami waba Juda?” Wakamwiingula kuti: “Yebo omwini waamba.”
3 Pele basilutwe babapaizi bakali kumutamikizya twaambo tunji.
4 Lino Pilato wakatalika kumubuzya alimwi kuti: “Sena tojisi bwiinguzi? Bona twaambo tunji ntobakutamikizya.”
5 Pele Jesu tanaakaingula kabili, cakuti Pilato wakagambwa kapati.
6 Kufwumbwa kwaba Pobwe lya Kwiindilila, wakali kubaangunwida mwaange ngobakali kuyanda.
7 Aciindi eeco, imuntu uutegwa Balaba wakali muntolongo abeenzinyina basikuzangila mfwulumende, aabo mubuzangi bwabo ibakajisi mulandu wakujaya muntu.
8 Aboobo nkamu yabantu yakaboola akutalika kulomba Pilato kuti abacitile kweelana ambwaakali kubacitila lyoonse.
9 Wakabaingula kwiinda mukubabuzya kuti: “Sena muyanda kuti ndimwaangunwide Mwami waba Juda?”
10 Nkaambo wakalizyi kuti basilutwe babapaizi bakamwaaba akaambo kamunyono.
11 Pele basilutwe babapaizi bakatyungilila nkamu yabantu kutegwa abaangunwide Balaba kuleka Jesu.
12 Alimwi Pilato wakabaingula kwiinda mukubabuzya kuti: “Ino ndimucite buti ooyu ngomwaamba kuti Mwami waba Juda?”
13 Alimwi bakoongolola kuti: “Mugagaile acisamu!”
14 Pele Pilato wakababuzya kuti: “Nkaambo nzi? Ino ncibi nzi ncaakacita?” Bakazumanana koongolola kabati: “Mugagaile acisamu!”
15 Aboobo Pilato kayanda kuti bantu cibakonde, wakabaangunwida Balaba alimwi amane kumukwibbauzya Jesu, wakabapa kutegwa bakamugagaile.
16 Lino basikalumamba bakamutola mulubuwa lwaŋanda yamweendelezi, eelyo bakaita impi yoonse,
17 alimwi bakamusamika cisani cacisombo akuluka musini wamamvwa akumusamika.
18 Mpoonya bakatalika kumwaanzya kabati: “Wabonwa, O Mwami waba Juda!”
19 Kunze lyaboobo, bakali kumuuma tete amutwe akumuswida mate, alimwi bakali kumufwugamina akumukotamina.
20 Bamane kumufwubaazya, bakamusamununa cisani eeco cacisombo akumusamika cisani cakwe caatala. Mpoonya bakamutola kuti akagagailwe.
21 Alimwi bakasinikizya simweenda nzila uutegwa Simoni muna Kulene, iwakali kuzwida muminzi, bausyi Alekizanda a Lufo, kuti anyamune cisamu cakupenzyezya ca Jesu.
22 Aboobo bakamuleta kubusena butegwa Gologota, ibbala lyaamba kuti “Busena bwa Cipapa Camutwe” lyasandululwa.
23 Ooko bakasoleka kumupa waini uuvweledwe musamu uukola uutegwa mulo, pele wakakaka.
24 Bakamugagaila acisamu akwaabana zisani zyakwe zyaatala kwiinda mukuuma cisolo kutegwa babone ncatiibweze aumwi.
25 Lino cakali ciindi cawoola lyatatu,* alimwi bakamugagaila acisamu.
26 Alimwi mabala ngobakalemba atala aamutwe wakwe ikwaamba mulandu ngobakamupa ngakuti: “Mwami Waba Juda.”
27 Kunze lyaboobo, kwakali zigwebenga zyobilo nzyaakali limwi azisamu, cimwi kululyo lwakwe acimwi kulumwensyi lwakwe.
28 * —
29 Alimwi aabo bakali kwiinda bakali kumusampaula akugunya-gunya mitwe kabaamba kuti: “Ehee! Yebo ookonzya kumwaya tempele akwiiyakulula mumazuba otatwe,
30 kolifwutula useluke acisamu cakupenzyezya.”
31 Mbubonya buyo, abalo basilutwe babapaizi abalembi bakali kumufwubaazya kabati: “Bamwi wakali kubafwutula; pele walo takonzyi kulifwutula!
32 Aaseluke acisamu cakupenzyezya ooyo Kilisito, Mwami wa Isilayeli kutegwa tubone akusyoma.” Nibaba baabo mbocakali limwi azisamu bakali kumusampaula.
33 Nocakaba ciindi cawoola lyacisambomwi,* kwakaba mudima munyika yoonse kusikila kuwoola lyafwuka.*
34 Eelyo muwoola lyafwuka, Jesu wakoongolola kuti: “Eli, Eli, lama sabakitani?” Eeci casandululwa caamba kuti: “Leza wangu, Leza wangu, ino wandilekelezyela nzi?”
35 Mpoonya bamwi babaabo ibakaimvwi munsi-munsi nibakamvwa boobo, bakatalika kwaamba kuti: “Amumvwe! Wiita Elija.”
36 Mpoonya umwi wakabalika akunyika nsinsa muwaini uulula, waibikka kulutete akumupa kuti anywe kati: “Amumuleke! Tulabona naa Elija ulaboola kumuselusya.”
37 Pele Jesu wakoongolola kumane wakafwa.
38 Eelyo mulembo wamutempele wakayauka akati kuzwa mujulu kusikila ansi.
39 Lino silutwe wabasikalumamba iwakaimvwi munsi lyakwe naakabona cakacitika naakafwa, wakati: “Ncobeni imuntu ooyu wali Mwana wa Leza.”
40 Kwakali abamakaintu ibakali kulangilila alaale, akati kabo kwakali Maliya Magadalene a Maliya banyina Jakobo Muniini a Jose alimwi a Salome
41 mbocakali kweenda limwi, alimwi bakali kumukutaukila naakali ku Galilaya, alimwi abamakaintu bambi banji mbocakaboola limwi ku Jelusalemu.
42 Lino mbwaanga zuba lyakali afwaafwi kubbila alimwi bwakali Buzuba bwa Kulibambila, nkokuti buzuba kaitanatalika Sabata,
43 kwakasika Josefa waku Alemateya umwi wa Nkuta Mpati Yaba Juda uulemekwa, ooyu awalo wakali kulindila Bwami bwa Leza. Wakalisungula kuya kuli Pilato akulomba mubili wa Jesu.
44 Pele Pilato tanaakali kuyeeya kuti inga kafwide kale, aboobo wakaita silutwe wabasikalumamba akumubuzya naa wakalifwide kale.
45 Aboobo naakazyiba kuzwa kuli silutwe wabasikalumamba, wakazumizya Josefa kubweza mubili.
46 Kumane Josefa wakaula mulembo mubotu akumwaangula, mpoonya wakamuzambaila mumulembo ooyo akumuzikka mucuumbwe ncobakasyide mumwala, amane wakakunkulisya bbwe akusinka kumulyango wacuumbwe.
47 Pele Maliya Magadalene a Maliya banyina Jose tiibakaleka kulanga aawo mpaakazikkilwa.
Bupanduluzi buyungizyidwe
^ Afwaafwi a 9 kiloko yamafwumofwumo, kutalika kubala kuzwa mpolizwida zuba.
^ Afwaafwi a 12 kiloko isyikati, kutalika kubala kuzwa mpolizwida zuba.
^ Afwaafwi a 3 kiloko yakumazuba, kutalika kubala kuzwa mpolizwida zuba
