Marko 16:1-20
16 Aboobo buzuba bwa Sabata nibwakainda, Maliya Magadalene, Maliya banyina Jakobo alimwi a Salome bakaula tununkilizyo kutegwa bakananike mubili wakwe.
2 Mpoonya mubuzuba bwakusaanguna bwansondo, bakafwuma kusika kucuumbwe, izuba nolyakazwa.
3 Alimwi bakali kubuzyanya kuti: “Nguni uutiitukunkulisyile bbwe lili kumulyango wacuumbwe?”
4 Pele nobakalanga bakajana kuti ibbwe lyakunkulisyigwa kale nokuba kuti lyakali lipati kapati.
5 Nibakanjila mucuumbwe bakabona mulombwana kakkede kulubazu lwakululyo kasamide cisani cilamfwu cituba, eelyo bakagambwa kapati.
6 Wakabaambila kuti: “Mutagambwi. Ndilizyi kuti muyandaula Jesu waku Nazaleta ooyo wakagagailwa acisamu. Wabusyigwa; tako pe muno. Amulange! Mpaawa mpobakamulazikide.
7 Pele kamuya; mukaambile basikwiiya bakwe a Petulo kuti, ‘Wamusolweda kuya ku Galilaya; ookuya muyoomubona mbubonya mbwaakamwaambila.’”
8 Aboobo nobakazwa, bakatija kuzwa kucuumbwe, kabakankama akugambwa kapati. Alimwi kunyina ngobakaambila nkaambo bakaliyoowede.
MAKANI MASYOONTO AAMAMANINO
Mabbuku aansiku ama Bbaibbele amwi aakalembwa kumbele ajisi makani masyoonto aamamanino aaya kuli Maako 16:8
Zyintu zyoonse nzyobakalaililwa bakazyaamba mubufwaafwi kuli baabo bakali a Petulo. Kunze lyaboobo, nozyakainda zyintu eezyi, Jesu mwini wakabatuma kuyooambilizya mulumbe uusalala alimwi uutanyonyooki walufwutuko lutamani kuzwa kujwe kusikila kumbo.
MAKANI MANJI AAMAMANINO
Mabbuku amwi aansiku (Codex Alexandrinus, Codex Ephraemi, Codex Bezae) alimwi ama Bbaibbele (Latin Valgate, Curetonian Syriac, Syriac Peshitta) ajisi makani manji aamamanino pele aatajaniki mumabbuku aansiku aa Codex Sinaiticus, Codex Vaticanus, Sinaitic Syriac codex, alimwi a Armenian Version, aaya aakuti:
9 Naakabusyigwa mafwumofwumo mubuzuba bwakusaanguna bwansondo, wakasaanguna kulibonya kuli Maliya Magadalene ngwaakagusya madaimona aali ciloba.
10 Eelyo walo wakaunka kuyooambila aabo bakali a Jesu, ibakali mubuumba akulila.
11 Pele balo nobakamvwa kuti wakabusyigwa akuti wakamubona, tiibakasyoma.
12 Kunze lyaboobo, nozyakacitika zyintu eezyi wakalibonya muciimo cimbi kuli basikwiiya bakwe bobilo nobakali kweenda kuya muminzi;
13 alimwi bakajokela akwaambila batumwa bamwi boonse. Aaba abalo tiibakabasyoma pe.
14 Kumane wakalibonya kuli bali kkumi aumwi nobakakkede kabalya kutebulu, wakabaseka akaambo kakubula lusyomo akutaswiilila nkaambo tiibakabasyoma aabo ibakamubona kabusyidwe kubafwu.
15 Mpoonya wakabaambila kuti: “Kamuya munyika yoonse mukakambauke makani mabotu kuzilenge zyoonse.
16 Ooyo uyoosyoma akubbapatizyigwa uyoofwutuka, pele ooyo uutakasyomi uyoonyonyoonwa.
17 Kuyungizya waawo, zitondezyo eezyi ziyoolibonya kuli baabo basyoma: Kwiinda muzyina lyangu bayootanda madaimona, baya kwaambaula mumilaka,
18 alimwi bayoojata nzoka, alimwi kuti banywa musamu uujaya kunyina mbobaya kuba. Baya kubikka maanza aabalwazi, eelyo aaba bayoopona.”
19 Aboobo Mwami Jesu naakamana kubaambila, wakatolwa kujulu akuyookkala kujanza lyalulyo lya Leza.
20 Aboobo bakaunka akukambauka mumasena oonse awalo Mwami wakali kubeleka ambabo akutondezya kuti mulumbe ngwancobeni kwiinda muzitondezyo.
