Marko 2:1-28
2 Nokuba boobo, kwiinde mazuba aali mbwaabede alimwi wakanjila mu Kapenauma, aboobo wakamvwugwa kuti uli muŋanda.
2 Aboobo ibanji bakabungana cakunga kwakacinyina busena muŋanda naaba amulyango, mpoonya wakatalika kubaambila makani aa Bwami.
3 Eelyo bakamuletela muntu uulebukide mubili wakatembedwe abaalumi bone.
4 Mbwaanga tiibakali kukonzya kumusisya kuli Jesu akaambo kankamu yabantu, bakabbwalula ciluli aawo mpaakabede. Bamane kubbwalula ciluli bakalengelezya macila aawo mpaakalede muntu uulebukide mubili.
5 Jesu naakabona lusyomo lwabo, wakaambila muntu uulebukide mubili kuti: “Mwanaangu, walekelelwa zibi zyako.”
6 Lino aawo kwakali balembi bamwi ibakakkede kabalyaambauzya mumoyo kuti:
7 “Ino nkaambo nzi muntu ooyu ncaambila boobu? Usampaula Leza. Nguni kunze lya Leza uukonzya kulekelela zibi?”
8 Pele Jesu, mbwaanga wakazyiba mpoonya aawo mumoyo wakwe kuti bakali kuyeeya boobo, wakababuzya kuti: “Ino nkaambo nzi ncomuyeeya zyintu eezyi mumyoyo yanu?
9 Ncili cuuba-uba, kwaambila muntu uulebukide mubili kuti, ‘Walekelelwa zibi zyako,’ naa kwaamba kuti, ‘Nyamuka, bweza macila aako weende’?
10 Pele kutegwa muzyibe kuti Mwana wamuntu ulijisi nguzu zyakulekelela bantu zibi anyika—” wakaambila muntu uulebukide mubili kuti:
11 “Ndati kulinduwe, Nyamuka, bweza macila aako akuya kuŋanda yako.”
12 Aboobo wakanyamuka alimwi cakufwambaana wakabweza macila aakwe akuzwa kabalangilila boonse. Eelyo boonse bakagambwa akulemeka Leza, kabati: “Tatunacibwene cili boobu.”
13 Lino wakaunka alimwi kumbali aalwizi, eelyo makamu aabantu akazumanana kuboola kulinguwe, aboobo wakatalika kubayiisya.
14 Pele naakali kuyaabweenda, wakabona Levi mwana wa Alifayo kakkede kuŋanda iitelelwa, eelyo wakamwaambila kuti: “Koba sikunditobela.” Wakanyamuka akumutobela.
15 Aciindi cimwi, Jesu wakalikkede kutebulu muŋanda ya Levi alimwi basimutelo abasizibi banji bakalikkede a Jesu abasikwiiya bakwe, nkaambo ibanji akati kabo bakaba basikumutobela.
16 Pele balembi baba Falisi nobakabona kuti wakali kulya abasizibi abasimutelo, bakatalika kwaambila basikwiiya bakwe kuti: “Sena ulalya abasimutelo abasizibi?”
17 Naakamvwa boobo, Jesu wakati kuli mbabo: “Bataciswi tabayandiki musilisi, pele aabo baciswa mbabayandika musilisi. Ndakaboolela kwiita bantu basizibi ikutali baluleme.”
18 Lino basikwiiya ba Johane aba Falisi bakali kuliimya kulya. Aboobo bakaboola akumwaambila kuti: “Ino nkaambo nzi basikwiiya ba Johane abasikwiiya baba Falisi balaliimya kulya, pele basikwiiya bako tabaliimyi?”
19 Eelyo Jesu wakabaambila kuti: “Sena balongwe basibwiinga balakonzya kuliimya kulya ciindi sibwiinga nacili ambabo? Kufwumbwa kuti sibwiinga kacili ambabo tabakonzyi kuliimya pe.
20 Pele ciyoosika ciindi ncobayoonyangwa sibwiinga, eelyo bayooliimya mubuzuba oobo.
21 Kunyina muntu uusuma cigamba cacisani cipya kucisani caatala cakaindi. Ikuti wacita boobo, nguzu zyaceeco cipya zilakonzya kukwela cisani cakaindi, aboobo cimonko cilakomena kapati.
22 Alimwi kunyina muntu uubikka waini mupya munkomo zyazipaya zyakaindi. Ikuti wacita boobo, waini ulabbosyola zipaya, eelyo waini ulatika ankomo zilanyonyooka. Pele bantu babikka waini mupya munkomo zyazipaya zipya.”
23 Lino ciindi cimwi mu Sabata naakali kweenda ikwiinda mumyuunda yamaila, basikwiiya bakwe bakatalika kupulula myaangala yamaila nobakali kuyaabweenda.
24 Aboobo ba Falisi bakamwaambila kuti: “Bona! Ino nkaambo nzi ncobacita cintu citazumizyidwe mu Sabata?”
25 Pele wakababuzya kuti: “Sena taakwe buzuba nomwakabala ncaakacita Davida naakabula cakulya, alimwi walo abaalumi mbaakali limwi nobakafwa nzala?
26 Sena tiimwakabala cibalo ca Abiyata silutwe wabapaizi, Davida mbwaakanjila muŋanda ya Leza akulya zinkwa zyazituuzyo akwaabila baabo mbaakali limwi, calo citazumizyidwe kumuntu uuli woonse kulya kunze buyo kwabapaizi?”
27 Eelyo wakabaambila kuti: “Sabata yakaba akaambo kamuntu ikutali kuti muntu wakaba akaambo ka Sabata;
28 aboobo Mwana wamuntu ngo Mwami wa Sabata ayalo.”
