Marko 4:1-41
4 Mpoonya wakatalika alimwi kuyiisya kumbali aalwizi, alimwi kwakamubunganina nkamu mpati yabantu. Aboobo wakatanta akukkala mubwato akuzwa kunkomwe, pele nkamu yoonse yakali mumbali, aankomwe yalwizi.
2 Mpoonya wakatalika kubayiisya zyintu zinji kwiinda muzikozyanyo alimwi mukuyiisya kwakwe wakabaambila kuti:
3 “Amuswiilile. Amubone! Sikuminza umwi wakaunka kuyoominza.
4 Naakali kuminza, mbuto zimwi zyakawida mumbali aanzila, mpoonya bayuni bakaboola akuzilya.
5 Alimwi mbuto zimwi zyakawida amwala aawo aatakali bulongo bunji, mpoonya zyakamena cakufwambaana akaambo kakuti bulongo tiibwakali bunji.
6 Pele izuba nolyakabala zyakaneta alimwi akaambo kakutaba amiyanda zyakayuma.
7 Alimwi mbuto zimwi zyakawida mumamvwa, mpoonya mamvwa akakomena akuzisyanikizya, aboobo tiizyakazyala micelo.
8 Pele zimwi zyakawida mubulongo bubotu, eelyo nozyakamena akukomena, zyakatalika kuzyala micelo, zimwi zyakali kuzyala makumi otatwe, zimwi makumi aali cisambomwi, zimwi mwaanda.”
9 Mpoonya wakayungizya kuti: “Ooyo ujisi matwi aaswiilila, aaswiilile.”
10 Lino naakaba alikke, aabo mbaakali limwi antoomwe abatumwa bali kkumi ababili bakatalika kumubuzya kujatikizya zikozyanyo.
11 Eelyo wakabaambila kuti: “Nywebo mulaamvwisya maseseke aa Bwami bwa Leza, pele kuli bamwi zyintu zyoonse zili muzikozyanyo,
12 kutegwa nokuba kuti kulanga balakonzya kulanga pele tabakonzyi kubona, nokuba kuti kumvwa balakonzya kumvwa, pele tabamvwisyi caambwa; alimwi kunyina nobayoosanduka kutegwa balekelelwe.”
13 Alimwi wakabaambila kuti: “Tamucizyi cikozyanyo eeci, aboobo ino mbuti mbomukonzya kumvwisya zikozyanyo zimwi zyoonse?
14 “Sikuminza uminza jwi.
15 Aboobo, aaba nembuto zyakaminzwa mumbali aanzila ooko jwi nkolyakaminzwa, pele mbobalitambwida buyo, Saatani ulaboola akulibweza jwi liminzidwe muli mbabo.
16 Mbubonya buyo aaba nembuto zyakaminzwa amwala; mbobalimvwida buyo jwi, balalitambula calukkomano.
17 Nokuba boobo, tabajisi miyanda, pele balazumanana kwakaindi kaniini; mpoonya mbwaasikila buyo mapenzi akupenzyegwa akaambo kajwi, balatyompwa.
18 Alimwi nkozili azimwi mbuto zyakaminzwa mumamvwa. Eezyi mbaabo ibakalimvwa jwi,
19 pele kulibilika kwamubweende bwazyintu oobu akoongelezya kwalubono akuyandisya zyintu zimwi zyoonse kulabweza busena akusyanikizya jwi, mpoonya talicizyali micelo.
20 Mpoonya mbuto zyakaminzwa mubulongo bubotu mbaabo ibaswiilila jwi akulitambula camaanza obilo akuzyala micelo iili makumi otatwe, makumi aali cisambomwi, alimwi amwaanda.”
21 Alimwi wakabaambila kuti: “Sena ilambe noliyasyigwa livwumbwa lusuwo nikuba kubikkwa mujungusi lyabulo? Sena talibikkwi acibikkilo calambe?
22 Nkaambo kunyina cintu cisisidwe citakayubununwi; kunyina cintu civwumbidwe kabotu-kabotu citakabi antangalala.
23 Kufwumbwa uujisi matwi aamvwa, aamvwe.”
24 Kumane wakabaambila kuti: “Amubikkile maano kuli zyeezyo nzyomutiimvwe. Cipimyo ncimupimya, ncomuyoopimizyigwa andinywe, inzya muyooyungizyilwa.
25 Nkaambo ooyo uujisi uyoopegwa azimwi, pele ooyo uutajisi, noziba zyeezyo nzyajisi uyoonyangwa.”
26 Aboobo wakazumanana kwaamba kuti: “Munzila eeyi Bwami bwa Leza buli mbuli muntu nasyanga mbuto mubulongo,
27 kumane woona masiku akubuka nobwaca, mbuto zyamena akukomena—pele mbozyamena walo tazyi.
28 Bulongo kubugama bulazyala micelo buce-buce, kusaanguna busonga mpoonya makunka, kumamanino kulaba nseke kumakunka.
29 Pele mbwaatubila buyo maila, ulatalika kwaacesa asikela nkaambo ciindi cakutebula casika.”
30 Alimwi wakaamba kuti: “Ino tulabukozyanisya anzi Bwami bwa Leza, naa ncikozyanyo nzi ncotutiibelesye kubupandulula?
31 Buli mbuli nseke yamusitada, yalo aciindi noyasyangwa mubulongo iili nenseke nsyoonto kunseke zyoonse zili anyika,
32 pele yasyangwa, ilamena akukomena kapati kwiinda zisyango zyoonse akuba amitabi mipati cakuti bayuni bauluka mujulu balajana aakukkala mucimvwule cayo.”
33 Aboobo wakali kubaambila jwi lya Leza kwiinda muzikozyanyo zinji zyamusyobo ooyu, kufwumbwa buyo kuti kabakonzya kumvwa.
34 Masimpe, taakwe naakali kubaambila kakunyina cikozyanyo, pele kumbali wakali kubapandulwida basikwiiya bakwe zyintu zyoonse.
35 Alimwi mubuzuba oobo, nokwakaba kumangolezya, wakabaambila kuti: “Atuzabukile mutala.”
36 Eelyo nobakaambila nkamu yabantu kuti baunke, bakamutantika mubwato alimwi kwakali mato aambi.
37 Lino kwakaba guwo pati, amayuwe akali kulipwaya kubwato, aboobo maanzi akatalika kunjila mubwato cakunga bwakatiibbile.
38 Pele walo wakalilede kusyule lyabwato, kabikkide mutwe acilitulisyo. Aboobo bakamubusya akumubuzya kuti: “Mwiiyi, sena unyina makani kuti tuyanda kufwa?”
39 Eelyo wakabuka akukalalila guwo akwaambila lwizi kuti: “Umuna! Batama!” Mpoonya guwo lyakaleka, alimwi kwakaumuna wi.
40 Aboobo wakababuzya kuti: “Nkaambo nzi ncomuyoowa boobu? Sena tamunaba alusyomo?”
41 Pele bakayoowa kapati, alimwi bakalibuzya kuti: “Ino nguni ooyu? Noliba guwo alwizi zilamumvwida.”
