Marko 5:1-43
5 Mpoonya bakasika mutala lyalwizi mucisi caba Gelasa.
2 Mbwaakazwida buyo mubwato, wakaswaanganya muntu uunjidwe muuya uusofweede kazwa kunamaumbwe.
3 Wakali kukkala kunamaumbwe, alimwi kusikila kuciindi eeco, kunyina naba omwe wakali kukonzya kumwaanga niiba nketani.
4 Nkaambo ziindi zinji wakali kwaangwa nsimbi anketani, pele nketani wakali kuzidunsaula azyalo nsimbi wakali kuzityolaula, alimwi taakwe wakali kukonzya kumujata.
5 Alimwi lyoonse, masiku asyikati wakali koongolola kunamaumbwe amumalundu, alimwi wakali kulinengaula amabwe.
6 Pele naakamubona Jesu kacili alamfwu, wakamubalikila akuyoomufwugamina.
7 Mpoonya wakoongolola ajwi pati ategwa: “Ino ndijisi kaambo nzi anduwe Jesu, O Mwana wa Leza Mupatikampatila? Kokonka muzyina lya Leza kuti tokoondipenzya.”
8 Nkaambo wakali kuwaambila kuti: “Kozwa mumuntu ooyu, yebo omuuya uusofweede.”
9 Kumane wakatalika kumubuzya kuti: “Nduweni zyina?” Wakaingula kuti: “Ndime Banji nkaambo tuli banji.”
10 Alimwi wakamukombelezya ziindi zinji kuti ataitandi myuuya kuzwa mucisi.
11 Lino kwakali butanga bwangulube amulundu izyakali kulya.
12 Aboobo myuuya yakamulomba kayaamba kuti: “Kotutandila mungulube kutegwa tunjile mulinzizyo.”
13 Wakaizumizya kunjila. Mpoonya myuuya iisofweede yakazwa akunjila mungulube, eelyo butanga bwangulube zibalilwa ku 2,000, bwakabalikila kujeleele lyalwizi, alimwi zyoonse zyakaliwaala mulwizi akufwa.
14 Pele beembezi bakatija akuyooluula makani aaya mumunzi amutunzi, eelyo bantu bakaboola kuti babone cakacitika.
15 Aboobo bakaboola kuli Jesu, eelyo bakabona mwaalumi ooyo wakanjidwe madaimona manji ulikkede kasamide alimwi kabateme, mpoonya bakayoowa kapati.
16 Alimwi aabo bakalibonena bakabaambila eeci mbocakacitika kumwaalumi wakanjidwe madaimona alimwi amakani aangulube.
17 Aboobo bakatalika kumulomba kuti azwe muzyooko zyabo.
18 Lino naakali kutanta bwato, mwaalumi ooyo wakanjidwe madaimona wakatalika kumulomba kuti baunke limwi.
19 Nokuba boobo, tanaakamuzumizya pe, pele wakamwaambila kuti: “Koya kumunzi kuli bamukwasyi wako, ukabaambile zyintu zyoonse Jehova nzyaakucitila ambwaakufwida luzyalo.”
20 Aboobo wakaunka akutalika kwaambilizya mu Dekapole zyintu zyoonse Jesu nzyaakamucitila, eelyo bantu boonse bakagambwa.
21 Mpoonya Jesu naakajoka mutala limwi kali mubwato, kwakayoboloka nkamu yabantu mpati kulinguwe, alimwi wakali kumbali aalwizi.
22 Lino umwi wabeendelezi bacikombelo wazyina lya Jailo wakaboola, eelyo naakamubona Jesu, wakamufwugamina
23 akumukombelezya ziindi zinji kati: “Mwanaangu musimbi ufwumba bulamfwu. Ndalomba kuti uboole umwaampe amaanza aako kuti umufwutule apone.”
24 Mpoonya wakaunka anguwe. Alimwi nkamu yabantu mpati yakali kumuccilila akumusyaanikizya.
25 Lino kwakali mukaintu wakali kuciswa kalobola kwamyaka iili kkumi aibili,
26 wakapenga kapati mumaanza aabasilisi banji alimwi wakasowa lubono lunji, nokuba boobo tanaakagwasyigwa pe, pele bulwazi bwakaindila.
27 Naakamvwa mpuwo ya Jesu, wakaboola munkamu kusyule lyakwe akujata cisani cakwe caatala,
28 nkaambo wakali kulyaambauzya kuti: “Kuti ndijate buyo cisani cakwe caatala ndilapona.”
29 Mpoonya aawo bulowa bwakali kuzwa bwakaleka, alimwi wakalimvwa kuti waponesyegwa bulwazi bwakamukatazyide kapati.
30 Mpoonya aawo Jesu wakalimvwa kuti nguzu zyamuzwa, alimwi wakaceba munkamu akubuzya kuti: “Ino nguni wajata cisani cangu caatala?”
31 Pele basikwiiya bakwe bakamwaambila kuti: “Uliibwene nkamu yabantu eeyi mboikusyaanikizya, sena inga wabuzya kuti, ‘Nguni wandijata?’”
32 Lino wakali kulanga-langa kutegwa abone yooyo wakamujata.
33 Pele mukaintu kayoowede alimwi kakankama, kazyi cakamucitikila, wakaboola akufwugama kumbele lyakwe akumwaambila makani oonse mubwini.
34 Jesu wakamwaambila kuti: “Mwanaangu, lusyomo lwako lwakuponya. Koya, ube aluumuno, akupona kabotu alimwi bulwazi oobu ibwali kukukatazya butakakupenzyi kabili.”
35 Naakacili kwaambaula, bantu bamwi kuzwa kuŋanda yamweendelezi wacikombelo bakaboola akwaamba kuti: “Mwanaako musimbi wafwa kale! Nkaambo nzi ncocimukatazya Mwiiyi?”
36 Pele Jesu wakabamvwa nobakali kwaambaula, eelyo wakaambila mweendelezi wacikombelo kuti: “Utayoowi pe; kosyoma buyo.”
37 Lino tanaakazumizya muntu uuli woonse kumutobela ccita buyo Petulo, Jakobo alimwi a Johane imunyina Jakobo.
38 Aboobo bakasika kuŋanda yamweendelezi wacikombelo, mpoonya wakaabona manyongwe alimwi abaabo bakali kulila akoomoka,
39 eelyo naakanjila muŋanda, wakababuzya kuti: “Nkaambo nzi ncomunyongana akulila? Ooyu mwana tafwide pe, pele uloona.”
40 Aboobo bakatalika kumuweela. Pele naakabatandila anze boonse, wakabweza usyi wamwana abanyina antoomwe abaabo mbaakali limwi, akunjila ooko kwakali mwana.
41 Kumane wakajata janza lyamwana akumwaambila kuti: “Talita kkumi,” calo caamba kuti: “Musimbi, ndikwaambila kuti, ‘Buka!’”
42 Mpoonya aawo mwana musimbi wakabuka akutalika kweenda. (Musimbi ooyu wakali amyaka iili kkumi aibili.) Eelyo babone buyo boobo, bakakkomana kapati.
43 Pele wakabalailila cakwiinduluka-induluka kuti kutabi muntu naba omwe uuzyiba makani aaya, mpoonya Jesu wakati musimbi ooyo apegwe cakulya.
