Marko 6:1-56
6 Aboobo wakazwa ooko abasikwiiya bakwe akuboola kumunzi okwabo.
2 Mu Sabata, wakatalika kuyiisya mucikombelo, lino bantu banji ibakali kuswiilila bakagambwa akubuzya kuti: “Ino muntu ooyu wakazijana kuli zyintu eezyi? Alimwi nkaambo nzi busongo oobu ncobwakapegwa kulinguwe, alimwi amilimo mipati eeyi nciicitilwa amuntu ooyu?
3 Sena ooyu tali sikufwala mapulanga, imwana wa Maliya alimwi imunyina Jakobo, Josefa, Judasi alimwi a Simoni? Alimwi sena bacizyi bakwe tatuli limwi aano?” Aboobo bakamukaka.
4 Pele Jesu wakabaambila kuti: “Musinsimi ulalemekwa kuli koonse pele ikutali mumunzi okwabo, kuli bamukowa naa muŋanda yakwe.”
5 Aboobo tanaakali kukonzya kucita mulimo mupati ooko, ccita buyo kubikka maanza abalwazi basyoonto akubaponya.
6 Masimpe, kubula lusyomo kwabo kwakamugambya. Alimwi wakeenda kuminzi yoonse iizingulukide iili kubusena ooko kayaabuyiisya.
7 Mpoonya wakaita bali kkumi ababili akutalika kubatuma bobilo-bobilo, alimwi wakabapa nguzu zyakutanda myuuya iisofweede.
8 Alimwi wakabalailila kuti kutabi cintu ncobatolelezya mulweendo lwabo ccita buyo nkoli—tiibakeelede kutolelezya cakulya, nkomo yakubikkila cakulya, naaba mali mumpotomona zyabo—
9 pele bakeelede buyo kusama mpato alimwi tiibakeelede kusama zisani zyobilo.
10 Kumane wakabaambila kuti: “Kufwumbwa nkomunjila muŋanda, amukkale oomo kusikila mukazwe kubusena oobo.
11 Alimwi kufwumbwa kubusena nkobatakamutambuli naa kumuswiilila, mwaakuzwa ooko amukakunkumune lusuko kumaulu aanu kuti bukabe bumboni kuli mbabo.”
12 Mpoonya bakaunka akutalika kukambauka kutegwa bantu beempwe,
13 alimwi bakali kutanda madaimona manji akunanika balwazi banji mafwuta akubaponya.
14 Lino Mwami Heloda wakamvwa cakali kucitika, nkaambo izyina lya Jesu lyakamwaika koonse, alimwi bantu bakali kwaamba kuti: “Johane Mubbapatizi wabusyigwa kubafwu, nkakaambo kaako ncakonzya kucita milimo mipati.”
15 Pele bamwi bakali kwaamba kuti: “Ngu Elija.” Alimwi bamwi bakali kwaamba kuti: “Musinsimi mbuli umwi wabasinsimi bakaindi.”
16 Pele Heloda naakamvwa zyanguwe, wakatalika kwaamba kuti: “Ooyu ngu Johane ngundakakosola mutwe, wabusyigwa.”
17 Nkaambo Heloda kumugama nguwakatuma bantu kuyoojata Johane akumwaanga muntolongo akaambo ka Helodiya imukaintu wa Filipo imunyina, akaambo kakuti Heloda wakalimukwete.
18 Nkaambo Johane wakali kumwaambila lyoonse Heloda kuti: “Tacizumizyidwe pe kukwata mukamunyoko.”
19 Pele Helodiya wakali mubikkilide Johane alimwi wakali kuyanda kuti amujaye, pele tanaakali kukonzya.
20 Nkaambo Heloda wakali kumuyoowa Johane, wakamuzyi kuti muntu uululeme alimwi uusalala, alimwi wakali kumubamba kabotu. Naakali kumuswiilila wakali kubula cakucita, pele lyoonse cakali kumukonda kumvwa nzyaakali kwaamba.
21 Pele bwakasika ibuzuba bweelede Heloda naakaba apobwe mubuzuba bwakuzyalwa kwakwe ndyaakabambila balupatipati bakwe abeendelezi babasikalumamba, alimwi ankumenkume zyaku Galilaya.
22 Alimwi mwana musimbi wa Helodiya wakaboola akuzyana cakuti Heloda wakakondwa abaabo mbaakakkede limwi. Mwami wakaambila musimbi ooyu kuti: “Kondaambila kufwumbwa ncoyanda, ndilakupa.”
23 Aboobo, wakamukonkezya kuti: “Kufwumbwa ncotiindilombe, ndilakupa, kusikila kucisela cabwami bwangu.”
24 Aboobo wakaunka anze kuyoobuzya banyina kati: “Ncinzi nconditiilombe?” Bakaingula kuti: “Mutwe wa Johane Mubbapatizi.”
25 Ndilyonya wakanjila kabalika kuya kumwami akumulomba kuti: “Ndiyanda kuti mundipe lino aawa mutwe wa Johane Mubbapatizi mumutiba.”
26 Nokuba kuti eeci cakamupa kuusa kapati, mwami tanaakali kukonzya kumukakila akaambo kakuti wakakonka kabamvwide aabo mbaakakkede limwi kabalya kutebulu.
27 Aboobo ndilyonya eelyo mwami wakatuma sikumulindilila akumulailila kuti amuletele mutwe wa Johane. Eelyo wakaunka akumukosola mutwe Johane muntolongo
28 akuuleta mutwe mumutiba akuupa musimbi, awalo musimbi wakaupa banyina.
29 Basikwiiya bakwe nibakaamvwa makani aaya, bakaboola akubweza mubili wakwe baakuuzikka mucuumbwe.
30 Lino batumwa bakabungana kuli Jesu akumwaambila zyintu zyoonse nzibakacita anzibakayiisya.
31 Mpoonya wakabaambila kuti: “Atweende tukkalile kubusena bunyina bantu mulyookezye aniini.” Nkaambo mbanji bakali kuboola akuunka, cakunga bakabula aciindi cakupumuna kuti balye.
32 Aboobo bakatanta bwato akuya kubusena bunyina bantu kutegwa bakabe buyo balikke.
33 Pele bantu bakababona kabaunka alimwi banji bakazyiba, alimwi bakayoboloka kuzwa muminzi yoonse akubaindila baakusaanguna mbabo kusika kubusena ooko.
34 Lino naakaseluka wakabona nkamu mpati yabantu, aboobo wakabeetelela nkaambo bakali mbuli mbelele zitajisi mweembezi. Mpoonya wakatalika kubayiisya zyintu zinji.
35 Kumabbililo aazuba, basikwiiya bakwe bakaboola kulinguwe akumwaambila kuti: “Okuno nkuusyokwe, alimwi ciindi caunka kale.
36 Kobaambila baunke kutegwa baye mutunzi amuminzi yeengelede bakalyuulile zyakulya.”
37 Wakabaingula kuti: “Amubape zyakulya.” Balo bakamubuzya kuti: “Sena tuunke tukaakuule zinkwa zyuulwa madinali aali 200 akubapa bantu kuti balye?”
38 Wakababuzya kuti: “Ino mujisi zinkwa zyongaye? Kamuya mukalange!” Nibakalanga, bakati: “Zyosanwe answi zyobilo.”
39 Mpoonya wakaambila bantu boonse kuti bakkale mutubunga-bunga aamweemvwe.
40 Aboobo bakakkala mutubunga mumwi kabali mwaanda mumwi kabali makumi osanwe.
41 Lino naakabweza zinkwa zyosanwe answi zyobilo wakalanga kujulu akulumba. Amane wakakomoona zinkwa akuzipa basikwiiya bakwe kutegwa babape bantu, azyalo nswi eezyi zyobilo wakazyaabanya akati kabo boonse.
42 Aboobo boonse bakalya akukkuta,
43 alimwi bakabweza mitaanga iili kkumi aibili yakazwide bufwefwelenga bwakacaala, kutabikkilizya bwanswi.
44 Aabo bakalya zinkwa bakali baalumi bali 5,000.
45 Mpoonya kakunyina kusowa ciindi, wakaambila basikwiiya bakwe kuti batante mubwato basolole kuya mutala ku Betesaida, walo naakacili kumwaya nkamu yabantu.
46 Naakamana kubalaya, wakatanta acilundu kuyoopaila.
47 Lino nikwakaba kulubundubundu, bwato bwakali akati kalwizi pele walo wakacili mutala alikke.
48 Mpoonya naakabona kuti cabakatazya kukwasula, nkaambo guwo lyakali kubbubbula kuletezya nkobakali kuya, kubucedo wakaboola kuli mbabo, keenda atala lyamaanzi mulwizi, pele wakacita mbuli kuti wakali kuyanda kubaindilila.
49 Mbobakamubonena buyo keenda atala aamaanzi mulwizi bakati: “Ncilengaano!” Eelyo bakoongolola.
50 Nkaambo boonse bakamubona alimwi bakayoowa. Pele ndilyonya eelyo wakaambaula ambabo akubaambila kuti: “Amukkazyike myoyo! Ndime; mutayoowi pe.”
51 Mpoonya wakatanta mubwato mobakabede, aboobo guwo lyakaleka. Eeci cakabagambya kapati,
52 nkaambo tiibakamvwisya ncozyakali kwaamba zinkwa, alimwi mumyoyo cakacili cintu ciyumu kuli mbabo ikumvwisya.
53 Lino nibakazabuka mutala bakasika ku Genesalete alimwi bakaimika bwato acito munsi akooko.
54 Pele mbobakazwida buyo mubwato, bantu bakamuzyiba,
55 mpoonya bakabilingana mucooko eeco coonse akutalika kuleta bantu aabo bakali kuciswa amacila ooko nkobakamvwa kuti nkwabede.
56 Alimwi kufwumbwa naakali kunjila muminzi naa muminzi mipati naa mutunzi, bakali kuleta balwazi mumisika akumulomba kuti bajate buyo maaya aacisani cakwe caatala. Eelyo boonse ibakaajata bakaponesyegwa.
