Marko 7:1-37
7 Lino ba Falisi abalembi bamwi ibakazwa ku Jelusalemu bakamubunganina.
2 Eelyo nobakabona basikwiiya bakwe bamwi kabalya cakulya amaanza aasofweede, nkokuti kabatasambide kumaanza—
3 nkaambo ba Falisi aba Juda tabalyi ccita kuti basamba kumaanza kusika kutukokola, kuccilila tunsiyansiya twabasikale,
4 alimwi bazwa kumusika tabalyi ccita kuti balisalazya kwiinda mukulisansaila maanzi, alimwi kuli atumwi tunsiyansiya tunji ntobakatambula kuti kabatuccilila, mbuli kunyika nkomeki, nongo azibelesyo zyamukuba mumaanzi.—
5 Aboobo ba Falisi abalembi aaba bakamubuzya kuti: “Ino nkaambo nzi basikwiiya bako ncobataccilili tunsiyansiya twabasikale, pele balya cakulya amaanza aasofweede?”
6 Wakabaingula kuti: “Nobasikuupaupa ameso, Izaya wakaliluzi naakasinsima kwaamba ndinywe mbuli mbokulembedwe kuti: ‘Aaba bantu balandilemeka amilomo yabo, pele myoyo yabo ili kule andime.
7 Kundikomba kwabo nkwabuyo, nkaambo bayiisya milawo yabantu kuba njiisyo zya Leza.’
8 Musiya mulawo wa Leza akuccilila tunsiyansiya twabantu.”
9 Alimwi wakabaambila kuti: “Cabucenjezu mubikka ambali mulawo wa Leza kutegwa muzumanane atunsiyansiya twanu.
10 Mucikozyanyo, Musa wakaamba kuti, ‘Lemeka bauso abanyoko,’ alimwi akuti, ‘Ooyo uusampaula bausyi naa banyina ajaigwe.’
11 Pele nywebo nobantu mwaamba kuti: ‘Kuti muntu waambila bausyi naa banyina kuti: “Kufwumbwa ncejisi icikonzya kumugwasya ngu kkobbani (nkokuti, cipego caabidwe kuli Leza),”’
12 nywebo tamucimuzumizyi kucitila bausyi naa banyina mulimo uuli woonse.
13 Mupa kuti jwi lya Leza libe lyabuyo akaambo katunsiyansiya ntumusiila bamwi. Alimwi nzinji zyintu nzyomucita zikozyenye azyeezyi.”
14 Aboobo naakaita nkamu yabantu alimwi, wakabaambila kuti: “Amundiswiilile nywebo nyoonse, alimwi mumvwisye caambwa.
15 Taakwe cinjila mumuntu cikonzya kumusofwaazya, pele zyintu zizwa mumuntu nzyezyintu zimusofwaazya.”
16 * ——
17 Lino naakasiya nkamu yabantu akunjila muŋanda, basikwiiya bakwe bakatalika kumubuzya makani aajatikizya cikozyanyo eeci.
18 Aboobo wakababuzya kuti: “Sena andinywe tamumvwisyi mbuli mbabo? Sena tamuzyi kuti taakwe cinjila mumuntu cikonzya kumusofwaazya,
19 mbwaanga cilanjila ikutali mumoyo wakwe, pele mwida kusikila limwi cazwa anze?” Eelyo mukwaamba boobo wakacisalazya kuti zyakulya zyoonse zilasalala.
20 Alimwi wakati: “Eeco cizwa mumuntu ncecisofwaazya muntu,
21 nkaambo mukati, mumoyo wamuntu, momuzwa mizeezo mibi, bwaamu, bubbi, bujayi,
22 bumambe, kulikumbuzya, bubi, lweeno, bukkale busesemya, ibbivwe, kusampaula, kulisumpula alimwi abufwubafwuba.
23 Zyoonse zyintu zibi eezyi zizwa mukati alimwi zilamusofwaazya muntu.”
24 Kumane wakanyamuka akutozya kumasena aali muzyooko zya Tulo a Sidoni. Ooko wakanjila muŋanda imwi alimwi tanaakali kuyanda kuti kube muntu uuzyiba, pele bantu bakazyiba.
25 Mpoonya aawo mukaintu iwakajisi mwana musimbi wakanjidwe muuya uusofweede wakamvwa kuti nkwali, eelyo wakaboola akumufwugamina kumaulu.
26 Mukaintu ooyo wakali mu Giliki waku Fonike yaku Siliya, eelyo wakaluujisi kumulomba kuti alitande daimona lili mumwanaakwe.
27 Pele wakamwaambila kuti: “Koleka bana bakkute saansi, nkaambo tacili cibotu kubweza cinkwa cabana akuciwaalila tubwa.”
28 Eelyo mukwiingula mukaintu wakati: “Inzya Mwami, pele tubwa tuli munsi aatebulu tulalya bufwefwelenga buloka nobalya bana.”
29 Kumane Jesu wakamwaambila kuti: “Akaambo kakuti waamba boobo, koya; idaimona lyazwa mumwanaako musimbi.”
30 Aboobo wakaunka nkwazwa akujana kuti mwana ulilede abulo alimwi daimona lyakalizwide.
31 Jesu naakajoka kuzwa kuzyooko zya Tulo, wakainda mu Sidoni kuya ku Lwizi lwa Galilaya akwiinda muzyooko zya Dekapole.
32 Ooku bakamuletela musinkematwi alimwi wakali sikamaama, mpoonya bakamukombelezya kuti abikke maanza alinguwe.
33 Eelyo wakamutola ambali kuzwa munkamu, akunjizya minwe yakwe mumatwi aamuntu ooyu, mpoonya amane kuswida mate, wakamujata amulaka.
34 Mpoonya naakalanga kujulu, wakaswa ciya akumwaambila kuti: “Efata,” nkokuti “Sinkuka.”
35 Eelyo matwi aakwe akasinkuka, alimwi eeco cakaangide mulaka wakwe cakaangululwa, mpoonya wakatalika kwaambaula kabotu.
36 Kumane boobo wakabalailila kuti bataambili muntu uuli woonse, pele naakali kubalailila boobo, balo bakali kwiindilizya buya kwaambilizya makani aayo.
37 Masimpe bakagambwa kapati, eelyo bakati: “Wazicita kabotu zyintu zyoonse. Basinkematwi ulabasinkula abasyaataambi ulabapa kwaambaula.”
