Marko 9:1-50
9 Kunze lyaboobo, wakabaambila kuti: “Ncobeni ndimwaambila kuti: Nkobali bamwi ibaimvwi aano batakafwi kusikila bakasaangune kubona Bwami bwa Leza kabulela anguzu.”
2 Aboobo nokwakainda mazuba aali cisambomwi, Jesu wakabweza Petulo, Jakobo alimwi a Johane akubatola balikke atala acilundu cilamfwu. Mpoonya wakasanduka kabalangilila,
3 alimwi zisani zyakwe zyaatala zyakamweka, zyakatuba bu kwiinda sikuwasya zisani uuli woonse waansi aano mbwakonzya kuzitubya.
4 Alimwi Elija a Musa bakalibonya kuli mbabo, alimwi aaba bakali kubandika a Jesu.
5 Mpoonya Petulo abone boobo, wakaambila Jesu kuti: “Labbi, ncibotu kuti tukkale aano, aboobo atubikke matente otatwe, lyako, lya Musa alya Elija.”
6 Mubwini tanaakazyi ncaakeelede kucita, nkaambo bakaliyoowede kapati.
7 Mpoonya kwakaba kkumbi lyakabavwumbilila, alimwi mukkumbi mwakamvwugwa jwi lyakati: “Ooyu Mwanaangu ngweyandisya; amumuswiilile.”
8 Pele mpoonya aawo, nobakalanga ooku akooku bakajana kuti taakwe ngobakacili limwi ccita buyo Jesu.
9 Lino nobakali kuselemuka kuzwa acilundu, wakabalailila kuti batasoli kwaambila muntu naba omwe ncibabona kusikila Mwana wamuntu akabusyigwe kubafwu.
10 Eelyo bakaayobola makani aaya mumoyo, pele bakabandika mulicabo ncokwakali kwaamba ooku kubuka kubafwu.
11 Aboobo bakatalika kumubuzya kuti: “Nkaambo nzi balembi ncobaamba kuti Elija uleelede kusaanguna kuboola?”
12 Wakabaambila kuti: “Elija ulasaanguna kuboola akubambulula zyintu zyoonse, pele ino eeci ceendelana buti aceeco cilembedwe kujatikizya Mwana wamuntu kuti weelede kwiinda mumapenzi manji akunyansyigwa?
13 Pele ndimwaambila kuti: Elija wakaboola kale alimwi bakamucitila kufwumbwa ncibakali kuyanda, mbuli mbokulembedwe kujatikizya nguwe.”
14 Lino nobakasika kuli basikwiiya bambi, bakabona nkamu yabantu mpati yakabazingulukide kubikilizya abalembi kabakazyanya ambabo.
15 Pele mboyakamubonena buyo nkamu yabantu, bakagambwa kapati, mpoonya bakamubalikila kuti bamwaanzye.
16 Eelyo wakababuzya kuti: “Ncinzi ncomukazyanya ambabo?”
17 Lino umwi munkamu wakamwiingula kuti: “Mwiiyi, ndaletede mwanaangu musankwa nkaambo unjidwe muuya uumulesya kwaambaula,
18 alimwi kufwumbwa mpuwamujatila, ulamuusya ansi, alimwi ulazwa ccovwu kumulomo akuluma ntwino akubula nguzu. Ndalibaambilide basikwiiya bako kuti bautande, pele baalilwa.”
19 Aboobo wakabaambila kuti: “Nywebo nozyalani linyina lusyomo, ino ndilakkala andinywe kwaciindi cilamfwu buti? Ino ndimukkazyikile moyo kwaciindi cilamfwu buti? Amumulete kuno, kulindime.”
20 Aboobo bakamuleta kulinguwe musankwa ooyo. Pele mbowakamubonena buyo Jesu, muuya ooyo wakamusuntula mwana, mpoonya naakawa ansi wakatalika kwaalabana, akuzwa ccovwu kumulomo.
21 Mpoonya wakabuzya bausyi kuti: “Ino kwainda ciindi cilamfwu buti kacimucitikila eeci?” Bakaingula kuti: “Kuzwa kubwana,
22 alimwi ciindi aciindi umusuntwida mumulilo amumaanzi kutegwa umunyonyoone. Pele kuti kokonzya kucita cintu cili coonse, kotufwida luzyalo, utugwasye.”
23 Jesu wakamwaambila kuti: “Aayo majwi aakuti, ‘Kuti kokonzya’! Langa, zyintu zyoonse zilakonzyeka kumuntu uuli alusyomo.”
24 Mpoonya aawo bausyi bamwana bakoongolola balaamba: “Ndijisi lusyomo! Kondigwasya mpondibulide lusyomo!”
25 Lino Jesu abone kuti nkamu yabantu yakali kuguumukila kuli mbabo, wakaukalalila muuya ooyu uusofweede kati: “Iwe omuuya syaataambi alimwi omusinke matwi, ndakulailila kuti, kozwa mulinguwe alimwi utakamunjili kabili.”
26 Lino muuya wakazwa nowakamana kumoongolozya akumusuntusya mwana ziindi zinji, mpoonya mwana wakaba mbuli kuti ulifwide cakunga ibanji bakali kwaamba kuti: “Wafwa!”
27 Pele Jesu wakamujata kujanza akumwiimika, mpoonya wakaima.
28 Aboobo naakanjila muŋanda, basikwiiya bakwe bakamubuzya kumbali kuti: “Ino nkaambo nzi swebo ncotwatali kukonzya kuutanda?”
29 Eelyo wakabaingula kuti: “Ooyu musyobo ulakonzya kuzwa kwiinda buyo mumupailo.”
30 Kumane bakazwa ooko akwiinda mu Galilaya, pele tanaakali kuyanda kuti muntu uuli woonse azyibe.
31 Wakali kuyiisya basikwiiya bakwe akubaambila kuti: “Mwana wamuntu uyooabwa mumaanza aabantu, eelyo bayoomujaya, pele nokuba kuti akajaigwe, uyoobuka kwaakwiinda mazuba otatwe.”
32 Pele tiibakacimvwisya ncaakali kwaamba, alimwi bakali kuyoowa kumubuzya.
33 Lino bakasika ku Kapenauma. Naakali muŋanda wakababuzya kuti: “Ino ncinzi ncomwali kukazyanya munzila?”
34 Bakaile kuumuna, nkaambo munzila bakali kukazyanya kuti ino nguni mupati akati kabo.
35 Aboobo wakakkala ansi akubaita bali kkumi ababili akubaambila kuti: “Ikuti muntu kayanda kuba mutaanzi, weelede kuba musyaalizi kuli boonse alimwi mubelesi waboonse.”
36 Kumane wakabweza mwana musyoonto, wamwiimika akati kabo, wamukumbata akubaambila kuti:
37 “Kufwumbwa uutambula mwana musyoonto mbuli yooyu muzyina lyangu, ulanditambula, alimwi kufwumbwa ooyo uunditambula, tatambuli buyo ndime, pele ulamutambula ayooyo wakandituma.”
38 Johane wakamwaambila kuti: “Mwiiyi, twakabona muntu umwi katanda madaimona kwiinda mukubelesya zyina lyako, mpoonya twakasola kumukasya nkaambo tanaakali kweenda andiswe.”
39 Pele Jesu wakati: “Mutasoli kumukasya, nkaambo kunyina muntu uucita milimo mipati muzyina lyangu uukonzya kutalika kundisampaula ndilyonya,
40 nkaambo ooyo uutatulwani uli kulubazu lwesu.
41 Nkaambo kufwumbwa uumupa nkomeki yamaanzi kuti munywe akaambo kakuti muli ba Kilisito, ncobeni ndimwaambila kuti, kunyina nayoosweekelwa bulumbu bwakwe.
42 Pele kufwumbwa uutyompya umwi wabasyoonto aaba ibasyoma, inga cainda kubota kuti aangwe ziyo munsingo mbuli leelyo lizingulusyigwa ambongolo akuwaalwa mulwizi.
43 “Alimwi kuti janza lyako kalikulebya, kolikosola; ncibotu kuti ukanjile mubuumi kokosokede janza kwiinda kuba amaanza obilo akunjila mu Gehena,* mumulilo uutakonzyi kuzimwa.
44 ——
45 Alimwi kuti kuulu kwako kakukulebya, kokukosola; ncibotu kuti ukanjile mubuumi kolemene kwiinda kuba amaulu obilo akuyoowaalwa mu Gehena.
46 ——
47 Alimwi kuti liso lyako kalikulebya, kolisowa; ncibotu kuti ukanjile acimbolyo mu Bwami bwa Leza kwiinda kuba ameso obilo akuyoowaalwa mu Gehena,
48 oomo mvwunyu mozitafwi alimwi amulilo muutazimwi.
49 “Nkaambo aumwi uyoolungwa munyo wamulilo.
50 Munyo mubotu, pele ikuti munyo wasampuka, ino inga mwaucita buti kuti utalike kulula alimwi? Amube amunyo mubuumi bwanu akuba aluumuno akati kanu.”
Bupanduluzi buyungizyidwe
^ Amubone Makani Aayungizyidwe 9.
