1 Johane 3:1-24
3 Amubone mboluli lupati luyando ndwaatutondezya Taata,+ mukutupa coolwe cakwiitwa kuti bana ba Leza!+ Alimwi oobo mbotubede ncobeni. Nkakaambo kaako swebo nyika taituzyi pe,+ nkaambo walo taimuzyi pe.+
2 Nobayandwa, lino tuli bana ba Leza,+ pele takunayubununwa pe mbotuyooba kumbele.+ Tulizyi kuti aakuyubununwa tuyooba mbuli nguwe, nkaambo tuyoomubona mbubonya mbwabede ncobeni.
3 Alimwi muntu woonse uujisi bulangizi oobu mulinguwe ulalisalazya mwini+ mbubonya mbwasalala ooyo.
4 Muntu woonse uuzumanana kucita cibi nkokuti alimwi utyola mulawo, aboobo cibi nkutyola mulawo.
5 Alimwi mulizyi kuti walo wakayubununwa kutegwa agwisye zibi zyesu,+ alimwi kunyina cibi pe mulinguwe.
6 Muntu woonse uukamantene lyoonse anguwe tazumanani kucita cibi;+ muntu uuzumanana kucita cibi tanamubona alimwi tanamuzyiba pe.
7 Nobana bangu bayandwa, kutabi muntu uumweena; ooyo uucita bululami uliluleme, mbubonya mbwaluleme awalo uulya.
8 Ooyo uuzumanana kucita cibi uzwa kuli Diabolosi, nkaambo Diabolosi wali kubisya kuzwa kumatalikilo.*+ Nkakaambo kaako Mwana wa Leza ncaakayubunwidwa ikutegwa anyonyoone milimo ya Diabolosi.+
9 Muntu woonse uuzyedwe kuli Leza tazumanani kucita cibi,+ nkaambo mbuto* ya Leza moili mumuntu ooyu lyoonse, alimwi takonzyi kuzumanana kucita cibi nkaambo uzyedwe kuli Leza.+
10 Lino bana ba Leza abana ba Diabolosi balazyibwa munzila eeyi: Kufwumbwa muntu uutazumanani kucita bululami tazwi kuli Leza pe, ncimwi buyo ayooyo uutayandi munyina.+
11 Nkaambo ooyu ngomulumbe ngomumvwide kuzwa kumatalikilo, wakuti tweelede kuyandana;+
12 ikutali kuba mbuli Kaini iwakazwa kuli yooyo mubi alimwi iwakajaya munyina.+ Alimwi ino ncinzi ncaakamujaila? Nkaambo milimo yakwe yakali mibi,+ pele eeyo yamunyina yakaliluleme.+
13 Bakwesu, mutagambwi pe kuti nyika ilamusulaika.+
14 Tulizyi kuti twakazwa kulufwu akuya kubuumi,+ nkaambo tulabayanda bakwesu.+ Ooyo uutatondezyi luyando ulazumanana mulufwu.+
15 Muntu woonse uusulaika munyina mujayi,+ alimwi mulizyi kuti kunyina mujayi uuzumanana kuba abuumi butamani mulinguwe.+
16 Lino eeci ncecatupa kuzyibya luyando, nkaambo ooyo wakaaba buumi bwakwe akaambo kandiswe,+ eelyo aswebo tweelede kwaaba buumi bwesu akaambo kabakwesu.+
17 Pele ikuti ooyo uujisi lubono lwamunyika eeyi wabona munyina uupengede nokuba boobo tayandi kumufwida luzyalo, ino luyando lwa Leza inga lwazumanana buti mulinguwe?+
18 Nobana bangu bayandwa, luyando lwesu lutabi lwamajwi buyo naa lwaamulomo pe,+ pele alube lwamumilimo+ amukasimpe.+
19 Kwiinda muliceeci tunoozyi kuti tuli kulubazu lwakasimpe, alimwi tunoosyomezya myoyo yesu kumbele lyakwe
20 kujatikizya cili coonse myoyo yesu mwiikonzya kutupa mulandu, nkaambo Leza mupati kwiinda myoyo yesu alimwi ulizyi zintu zyoonse.+
21 Nobayandwa, ikuti myoyo yesu kaitatupi mulandu, tulakonzya kwaamba cakutayoowa kuli Leza;+
22 alimwi kufwumbwa ncotulomba tulacitambula kuzwa kulinguwe,+ nkaambo tubamba milawo yakwe alimwi tucita zintu zibotu mumeso aakwe.
23 Ncobeni, ooyu ngomulawo wakwe: wakuti tube alusyomo muzina lya Mwanaakwe Jesu Kristo+ akuti katuyandana,+ mbubonya mbwaakatulailila.
24 Kunze lyaboobo, ooyo uubamba milawo yakwe ulazumanana kukamantana anguwe alimwi awalo ulakamantana amuntu ooyo.+ Alimwi kwiinda mumuuya ooyo ngwaakatupa, tulizyi kuti ulikamantene andiswe lyoonse.+
