1 Makani 17:1-27
17 Lino mbwaakakkalikana buyo Davida muŋanda* yakwe, wakaambila Natani+ musinsimi kuti: “Bona, mebo ndikkede muŋanda iiyakidwe amasamu aakkedari+ kakuli bbokesi lyacizuminano lya Jehova likkede mutente.”+
2 Natani wakavwiila Davida kuti: “Kocita kufwumbwa cili mumoyo wako, nkaambo Leza mwini-mwini uli anduwe.”
3 Lino masiku ngoonya aayo Leza wakaambila Natani kuti:
4 “Koya ukamwaambile mubelesi wangu Davida kuti, ‘Mboobu mbwaamba Jehova: “Toli nduwe uutiindiyakile ŋanda yakuti ndikkale mumo.+
5 Nkaambo nsinakkede muŋanda kuzwa buzuba nindakagwisya bana Israyeli mu Egepita kusikila buzuba obuno, pele lyoonse ndali kweendela mutente lyakukombela kuzwa kubusena bumwi abumwi.*+
6 Ciindi coonse eeci ncindali kweendeenda akati kabana Israyeli boonse, sena kuli jwi noliba lyomwe ndyondakaambilide umwi wababetesi babana Israyeli mbondakasala kweembela bantu bangu kuti, ‘Ino nkaambo nzi ncomwatakandiyakila ŋanda yamasamu aakkedari?’”’
7 “Lino mboobu mboyelede kumwaambila mubelesi wangu Davida, ‘Jehova wamakamu waamba kuti: “Ndakakubweza kumacelelo nkowakali kweembelela mbelele kuti ube musololi wabantu bangu bana Israyeli.+
8 Ndinooli anduwe kufwumbwa nkowaunka+ alimwi ndiyoobanyonyoona basinkondonyoko boonse kubusyu bwako;+ alimwi ndiyookupangila zina mbuli zina lyabantu bali aampuwo kapati munyika.+
9 Ndiyoosala busena bwabantu bangu bana Israyeli akubabikka kuti bakkale ooko, alimwi bayookkala kakunyina kunyonganizyigwa; basizibi tabakabapenzyi* limbi mbuli mbobakabacita kusaanguna,+
10 kuzwa buzuba nondakabikka babetesi kuti beendelezye bantu bangu bana Israyeli.+ Alimwi ndiyoobabombya basinkondonyoko boonse.+ Kuyungizya waawo, ndikwaambila kuti, ‘Jehova uyookuyakila ŋanda.’*
11 “‘“Lino waakufwa akuzikkwa mbubonya mbuli bamauso, ndiyoobusya lunyungu lwako, nkokuti umwi wabana bako,+ alimwi ndiyookkazikizya bwami bwakwe.+
12 Ngonguwe uuyoondiyakila ŋanda,+ alimwi ndiyookkazikizya cuuno cakwe cabwami kukabe kutamani.+
13 Mebo ndiyooba bausyi, eelyo walo uyooba mwanaangu.+ Tandikalugwisyi luyando lwangu lutamani kulinguwe+ mbuli mbondakalugwisya kuli yooyo iwakakusaangunina.+
14 Ndiyoopa kuti aime nji muŋanda yangu alimwi amubwami bwangu mane kukabe kutamani,+ alimwi cuuno cabwami bwakwe cinooliko mane kukabe kutamani.”’”+
15 Natani wakaambila Davida majwi aaya oonse alimwi acilengaano eeci coonse.
16 Mpoonya Mwami Davida wakaboola akukkala kubusyu bwa Jehova akwaamba kuti: “Ino mebo ndime ni, O Jehova Leza? Alimwi ino ciinga cangu ncinzi cakuti inga wacicitila zintu zyoonse eezyi?+
17 Kuyungizya aali zyeezyi, O Leza, alimwi waamba kuti ciinga camubelesi wako cicinakwiimvwi nji amuya myaka,+ alimwi undibona mbuli muntu iweelede kusumpulwa* kwiinda waawa, O Jehova Leza.
18 Ino ncinzi cimbi ncondikonzya kwaamba kulinduwe mebo nde Davida mubelesi wako kujatikizya bulemu mboondipa mbwaanga yebo ulindizyi kabotu ndemubelesi wako?+
19 O Jehova, akaambo kandime ndemubelesi wako alimwi kweelana ancowayanda moyo wako* wacita zintu zipati zyoonse eezyi kwiinda mukuyubununa bupati bwako.+
20 O Jehova, kunyina uuli mbuli nduwe,+ alimwi kunyina Leza uumbi kunze lyanduwe;+ zyoonse nzyotwakamvwa amatwi eesu zilacisinizya eeci.
21 Alimwi ino nguuli musyobo anyika uuli mbuli bantu bako bana Israyeli?+ Yebo O Leza mwini-mwini wakaunka akubafwutula kuti babe bantu bako.+ Wakalipangila zina kwiinda mumilimo yako mipati alimwi iiyoosya,+ kwiinda mukutanda misyobo kubusyu bwabantu bako,+ aabo mbookafwutula kuzwa ku Egepita.
22 Wakacita bana Israyeli kuti babe bantu bako lyoonse;+ alimwi yebo O Jehova wakaba Leza wabo.+
23 Lino O Jehova, cisyomezyo ncookaamba kujatikizya mubelesi wako alimwi aciinga cakwe acisyomeke lyoonse, alimwi kocita mbubonya mbookasyomezya.+
24 Izina lyako alisyomeke akulemekwa+ kukabe kutamani kutegwa bantu baambe kuti, ‘Jehova wamakamu, Leza wa Israyeli, ngu Leza wabana Israyeli,’ alimwi ciinga camubelesi wako Davida aciime nji kubusyu bwako.+
25 Nkaambo yebo O Leza wangu, wayubunwida mubelesi wako makanze aako aakumuyakila ŋanda.* Nkakaambo kaako mubelesi wako ncajisi lusyomo lwakupaila boobu kulinduwe.
26 Lino O Jehova, nduwe Leza mwini-mwini, alimwi wasyomezya zintu eezyi zibotu kumubelesi wako.
27 Aboobo acikukkomanisye kulongezya ŋanda yamubelesi wako kutegwa iime nji kubusyu bwako kukabe kutamani, nkaambo yebo O Jehova walongezya, alimwi wailongezya kukabe kutamani.”
Bupanduluzi buyungizyidwe
^ Naa “muŋanda yamwami.”
^ Ambweni nkokwaamba kuti “kuzwa kubusena bumwi bwamatente kuya kuli bumbi akuzwa kubusena bumwi bwakukkala kuya kuli bumbi.”
^ Mu Chihebrayo, “tabakabadyaaminini.”
^ Naa “mulongo wabami.”
^ Naa “kupegwa cuuno caatala.”
^ Naa “kweelana akuyanda kwako.”
^ Naa “mulongo wabami.”
