1 Makani 18:1-17
18 Mukuya kwaciindi, Davida wakabazunda ba Filisiti akubakoma, eelyo ba Filisiti wakabanyanga munzi wa Gati+ aminzi misyoonto* yanguwo.+
2 Mpoonya wakazunda bana Moabu,+ eelyo bana Moabu bakaba babelesi ba Davida alimwi bakali kumupa mutelo.+
3 Davida wakazunda Mwami Hadadezeri+ wa Zoba+ afwaafwi aku Hamati+ ciindi naakali kuunka kuyooyumya bulelo bwakwe ku Mulonga wa Firate.+
4 Davida wakanyanga Hadadezeri nkalaki zili 1,000, basimabbiza bali 7,000 alimwi abasikalumamba beenda amaulu ibali 20,000.+ Mpoonya wakakosaula milambi yamabbiza oonse aakwela nkalaki,+ pele wakasiya buyo aali 100.
5 Ciindi bana Siriya baku Damasiko nibakaboola kugwasya Mwami Hadadezeri wa Zoba, Davida wakajaya bana Siriya bali 22,000.+
6 Mpoonya Davida wakabikka impi mu Siriya yaku Damasiko, eelyo bana Siriya bakaba babelesi ba Davida alimwi bakali kumupa mutelo. Jehova wakapa Davida luzundo* kufwumbwa nkwaakali kuunka.+
7 Alimwi Davida wakabweza ntobo zyangolida kuzwa kubabelesi ba Hadadezeri akuzileta ku Jerusalemu.
8 Kuzwa ku Tibati aku Kuni, iminzi ya Hadadezeri, Davida wakabweza mukuba munji kapati. Solomoni wakabelesya mukuba ooyo kupanga Zyiba lyamukuba,+ misemu azibelesyo zyamukuba.+
9 Mwami Tou wa Hamati naakamvwa kuti Davida wakaizunda mpi yabasikalumamba yoonse ya Mwami Hadadezeri+ wa Zoba,+
10 mpoonya aawo wakatuma Hadoramu* mwanaakwe ku Mwami Davida kuti akamwaanzye akumulumbaizya akaambo kakulwana Hadadezeri akumuzunda (nkaambo ziindi zinji Hadadezeri wakali kulwana Tou), alimwi wakatolelezya azintu ziindene-indene zyansiliva, zyangolida azyamukuba.
11 Mwami Davida wakazyaaba zintu eezyi kuli Jehova+ antoomwe ansiliva alimwi angolida nzyaakabweza kuzwa kumisyobo yoonse: kuzwa kubana Edomu, bana Moabu, bana Amoni,+ ba Filisiti+ abana Amaleki.+
12 Lino Abisai+ mwana wa Zeruya+ wakajaya bana Edomu ibali 18,000 mu Kkuti lya Munyo.+
13 Wakabikka basikalumamba mu Edomu, eelyo bana Edomu boonse bakaba babelesi ba Davida.+ Jehova wakapa Davida luzundo* kufwumbwa nkwaakali kuunka.+
14 Davida wakazumanana kweendelezya bana Israyeli boonse,+ alimwi wakali kubeteka bantu bakwe boonse cabululami.+
15 Joabu mwana wa Zeruya wakali silutwe wampi yabasikalumamba,+ Jehosafati+ mwana wa Ahiludi wakali sikulemba makani,
16 Zadoki mwana wa Ahitubi alimwi a Ahimeleki mwana wa Abiyatara bakali bapaizi, mpoonya Savisa wakali mulembi.
17 Benaya mwana wa Jehoyada wakali silutwe wabana Kereti+ abana Peleti.+ Bana ba Davida bakali balupati-pati kuzwa kumwami.
