1 Makani 28:1-21
28 Mpoonya Davida wakabunganya basilutwe boonse bana Israyeli ku Jerusalemu: basilutwe bamisyobo, basilutwe bankamu+ zyabaabo ibakali kubelekela mwami, basilutwe babantu bali zyuulu, basilutwe babantu bali myaanda,+ basilutwe bazintu zyoonse azivwubwa zyamwami+ abana bakwe,+ kubikkilizya abasinkuta, baalumi boonse basinguzu alimwi basimide.+
2 Eelyo Mwami Davida wakanyamuka akwaambila bantu kuti:
“Amuswiilile bakwesu andinywe nobantu bangu. Ndakali kuyandisisya mumoyo wangu kuyaka ŋanda molinookkala lyoonse bbokesi lyacizuminano ca Jehova alimwi acilyatilo camaulu aa Leza wesu+ alimwi ndakalibambila kuyaka.+
3 Pele Leza mwini-mwini wakandaambila kuti, ‘Tokooyaka ŋanda yiitwa azina lyangu,+ nkaambo uli muntu walwana nkondo zinji akutila bulowa.’+
4 Nokuba boobo Jehova Leza wa Israyeli wakandisala akati kabantu bamuŋanda yataata boonse kuti ndibe mwami wa Israyeli lyoonse,+ nkaambo wakasala Juda kuti abe musololi,+ alimwi kuzwa muŋanda ya Juda wakasala ŋanda yataata,+ mpoonya akati kabana bataata wakasala ndime kuti ndibe mwami wa Israyeli yoonse.+
5 Alimwi kuzwa akati kabana bangu boonse–nkaambo Jehova wandipa bana banji+–wakasala mwanaangu Solomoni+ kuti akkale acuuno cabwami bwa Jehova mu Israyeli.+
6 “Wakati kulindime, ‘Mwanaako Solomoni nguutiyake ŋanda yangu amabbuwa aangu, nkaambo ndamusala kuti abe mwanaangu, eelyo mebo ndilaba usyi.+
7 Ndiyookkazikizya bwami bwakwe mane kukabe kutamani+ ikuti naa akalomye kutobela milawo yangu ambeta zyangu+ mbubonya mbwacita lino.’
8 Aboobo lino ndamwaambila kubusyu bwabana Israyeli boonse, kubusyu bwambungano ya Jehova alimwi akubusyu bwa Leza wesu kuti: Amubikkile maano kapati akulomya kutobela milawo yoonse ya Jehova Leza wanu, ikutegwa mukone nyika mbotu+ alimwi akuti mukaisiile bana banu kaluli lukono lwabo mane kukabe kutamani.
9 “Lino yebo Solomoni mwanaangu, komuzyiba Leza wauso akumubelekela camoyo woonse+ alimwi amoyo uukkomene,* nkaambo Jehova ulalingaula myoyo yoonse+ akuzyiba mizeezo yoonse muntu njajisi.+ Ikuti wamuyandaula, uyookulekela kuti umujane,+ pele kuti wamusiya, uyookukaka kukabe kutamani.+
10 Lino bona, Jehova wakusala kuti umuyakile ŋanda kaili tempele. Lino koyuma akuubeleka mulimo ooyu.”
11 Mpoonya Davida wakapa mwanaakwe Solomoni malailile+ kujatikizya mboyakeelede kuyakwa ngazi+ alimwi amaanda, ziyobwedo zyangawo, twaanda twamujulu, twaanda twamukati alimwi aŋanda mwakulekeledwa zibi.*+
12 Wakamupa nzila mbozyakeelede kuyakwa zyoonse Davida nzyaakasololelwa amuuya kujatikizya mabbuwa+ aaŋanda ya Jehova, maanda aakulida oonse aakazingulukide tempele, ziyobwedo zyamuŋanda ya Leza mwini-mwini aziyobwedo zyazintu zisalala;*+
13 alimwi ambobakaabanizyidwe munkamu zyabapaizi+ aba Levi, amilimo yoonse mboyakeelede kubelekwa aŋanda ya Jehova alimwi azintu zyoonse zyakubelesya mumulimo waaŋanda ya Jehova;
14 alimwi bulemu bwangolida, nkokuti ngolida yazibelesyo zyoonse ziindene-indene, bulemu bwazibelesyo zyoonse zyansiliva alimwi azibelesyo zyoonse zyamilimo iindene-indene;
15 alimwi bulemu bwaziimikilo zyamalambe+ zyangolida amalambe aazyo aangolida, bulemu bwaziimikilo zyamalambe ziindene-indene amalambe aazyo, alimwi aziimikilo zyamalambe aansiliva, nkokuti bulemu bwaciimikilo camalambe amalambe aaco kweelana amulimo waco;
16 alimwi bulemu bwangolida yamatebulu aazinkwa zyakwiilika,*+ bulemu bwangolida yamatebulu aambi kubikkilizya ansiliva yamatebulu aansiliva,
17 mfwoloko, mitiba, nongo zyangolida iisalalisya, alimwi abulemu bwakatiba kamwi akamwi kangolida+ abulemu bwakatiba kamwi akamwi kansiliva.
18 Alimwi wakapa bulemu bwangolida iisalazyidwe yacipaililo catununkilizyo+ alimwi ayacikozyanyo cankalaki,+ nkokuti bakerubi+ bangolida ibakatandabikide mababa aabo kabavwumbilide bbokesi lyacizuminano ca Jehova.
19 Davida wakati: “Janza lya Jehova lyakali alindime alimwi wakandipa busongo bwakubikka bumpiyompiyo+ bwamayake boonse antoomwe akubulemba.”+
20 Mpoonya Davida wakati kuli Solomoni mwanaakwe: “Koyuma akuba sicamba, uubeleke mulimo ooyu. Utayoowi nokuba kukankama, nkaambo Jehova Leza, Leza wangu, uli anduwe.+ Takakusiyi nokuba kukulekelezya pe,+ pele unooli anduwe kusikila mulimo woonse waŋanda ya Jehova ukamane.
21 Nzyeezyi nkamu zyabapaizi+ aba Levi+ ibayoocita mulimo woonse waŋanda ya Leza mwini-mwini. Ulijisi bantu balyaabide, babelesi ibacibwene kubeleka kufwumbwa mulimo+ kubikkilizya abasololi+ alimwi abantu boonse ibayootobela malailile aako oonse.”
Bupanduluzi buyungizyidwe
^ Naa “uulisungwide.”
^ Naa “aŋanda mumanizyilwa milandu.”
^ Naa “zyazintu zyaabidwe.”
^ Nkokuti, zinkwa zyacitondezyo.
