1 Makani 29:1-30
29 Lino Mwami Davida wakaambila mbungano yoonse kuti: “Imwanaangu Solomoni ooyo Leza ngwaasala+ ucili muniini, tajisi luzyibo*+ alimwi mulimo mupati, nkaambo talili tempele* lyamuntu pe, pele ndilya Jehova Leza.+
2 Alimwi ndabeleka cakulitakata kubamba zibelesyo zyaŋanda ya Leza wangu, ndabamba ngolida yazintu zyangolida, nsiliva yazintu zyansiliva, mukuba wazintu zyamukuba, butale bwazintu zyabutale+ amapulanga+ aazintu zyamapulanga; amabwe aaonikisi, mabwe aakumatika, mabwe meebesi aaindene-indene, mabwe mayandisi aamisyobo yoonse amabwe luuma manji kapati.
3 Kuyungizya waawo, akaambo kakuyandisya ŋanda ya Leza wangu,+ ndicijisi lubono lwangu lundigeme+ lwangolida ansiliva ndondiyanda kupa kuŋanda ya Leza wangu, atala aazyeezyo nzindakabambila ŋanda iisalala,
4 kubikkilizya amatalenta* aangolida yaku Ofiri+ aali 3,000 amatalenta aansiliva yeengedwe aali 7,000, izyakuziluluzya malambo aamaanda aatempele,
5 angolida yazintu zyangolida, nsiliva yazintu zyansiliva alimwi ayamilimo yoonse yeelede kucitwa abasyaazibwene mukupanga zintu. Ino nguni sunu uunga walisungula kupa cipego kuli Jehova?”+
6 Aboobo basilutwe baziinga zyabamausyi, basilutwe bamisyobo ya Israyeli, basilutwe babantu bali zyuulu ababantu bali myaanda+ alimwi abasilutwe bamilimo yamwami+ bakalisungula.
7 Eelyo bakapa zyakubelesya kumulimo waŋanda ya Leza mwini-mwini: matalenta aangolida aali 5,000, amadariki* aali 10,000, matalenta aansiliva aali 10,000, matalenta aamukuba aali 18,000 alimwi amatalenta aabutale aali 100,000.
8 Kufwumbwa wakajisi mabwe mayandisi wakaapa kuciyobwedo caŋanda ya Jehova icakali kulanganizyigwa a Jehieli+ muna Gerisoni.+
9 Bantu bakasekelela akaambo kakusanga kwabo cakuliyandila, nkaambo bakapa zyakusanga camoyo woonse kuli Jehova,+ naba Davida mwami awalo wakasekelela kapati.
10 Mpoonya Davida wakatembaula Jehova kumeso aambungano yoonse. Eelyo Davida wakati: “Kotembaulwa O Jehova Leza wa Israyeli taateesu lyoonse alyoonse mane kukabe kutamani.*
11 Yebo O Jehova, bupati,+ nguzu,+ bweebesi, lulemeko abulemu nzizyako,+ nkaambo zintu zyoonse kujulu alimwi aanyika nzizyako.+ Bwami mbubwako, O Jehova.+ Yebo ndonduwe oosumpukide mbuli silutwe wazyoonse.
12 Buvwubi abulemu zizwa kulinduwe,+ nduwe weendelezya zintu zyoonse,+ alimwi mujanza lyako mozibede nguzu+ abupati,+ alimwi janza lyako lilakonzya kusumpula+ akupa nguzu kuli boonse.+
13 Lino O Leza wesu, twakulumba akutembaula zina lyako libotu.
14 “Alimwi ino mebo ndime ni alimwi abantu bangu mbaani, kuti tukonzye kupa zyakusanga zyakuliyandila mbuli zyeezyi? Nkaambo zintu zyoonse zizwa kulinduwe, alimwi zintu nzitwakupa zizwa mujanza lyako.
15 Nkaambo tuli beenzu kubusyu bwako alimwi tuli basimutuntuli mbubonya mbobakabede bamatata boonse.+ Maumi eesu munyika ali mbuli cinzimweemwe+–kunyina bulangizi pe.
16 O Jehova Leza wesu, lubono loonse oolu lutalivwulili ndotwabambila mulimo wakuyaka ŋanda yiitwa azina lyako lisalala luzwa mujanza lyako alimwi loonse ndulwako.
17 Ndilizyi kabotu, O Leza wangu, kuti ulalingula myoyo+ alimwi akuti ulakukkomanina kusyomeka.*+ Mubululami bwamoyo wangu, ndapa zintu zyoonse eezyi cakuliyandila, alimwi ndilikkomene kapati kubona bantu bako bali waano kabapa zyakusanga cakuliyandila kulinduwe.
18 O Jehova, Leza wa Abrahamu, Izaka a Israyeli bamatata, kogwasya bantu bako kuti bazumanane kuba amuuya uuli boobu mumyoyo yabo lyoonse alimwi akuti bakubelekele amyoyo yabo yoonse.+
19 Alimwi Solomoni mwanaangu komupa moyo uumaninide+ kutegwa abambe milawo yako,+ ziyeekezyo zyako amalailile aako akuzicita zintu zyoonse eezyi alimwi akuyaka tempele* ndindabambila zintu eezyi.”+
20 Mpoonya Davida wakaambila mbungano yoonse kuti: “Lino amutembaule Jehova Leza wanu.” Eelyo mbungano yoonse yakatembaula Jehova Leza wabamausyi alimwi bakakotama akuvwuntama ansi kuli Jehova akumwami.
21 Bakazumanana kutuula zipaizyo kuli Jehova akutuula zituuzyo zyuumpwa+ kuli Jehova buzuba bwakatobela, bapoho bali 1,000, bagutu bali 1,000, abagutu bacili bana ibali 1,000 azituuzyo zyabo zinyugwa;+ bakatuula zipaizyo zinji kapati zyabana Israyeli boonse.+
22 Kumane bakazumanana kulya akunywa kubusyu bwa Jehova mubuzuba oobo akusekelela kupati,+ alimwi lwabili bakaambilizya kuti Solomoni mwana wa Davida waba mwami eelyo bakamunanika kubusyu bwa Jehova kuti abe musololi+ alimwi a Zadoki kuti abe mupaizi.+
23 Mpoonya Solomoni wakakkala acuuno cabwami ca Jehova+ kali mwami mubusena bwa Davida usyi eelyo wakazwidilila alimwi bana Israyeli boonse bakali kumumvwida.
24 Basilutwe boonse,+ basikalumamba basinguzu+ abana boonse ba Mwami Davida+ bakalibombya kumwami Solomoni.
25 Lino Jehova wakamusumpula kapati Solomoni kubusyu bwabana Israyeli boonse akumupa bulemu bwabwami ibwatakalinapedwe kumwami uuli woonse wakamusaangunina mu Israyeli.+
26 Aboobo Davida mwana wa Jese wakalela bana Israyeli boonse,
27 eelyo ciindi* ncaakatola kalela mu Israyeli cakakkwana myaka iili 40. Mu Hebroni wakalela myaka iili ciloba,+ eelyo mu Jerusalemu wakalela myaka iili 33.+
28 Lino Davida wakafwa musyule lyakupona myaka minji*+ akukkutila abuvwubi abulemu; eelyo mwanaakwe Solomoni wakaba mwami mubusena bwakwe.+
29 Makani oonse aakaindi aamba zya Mwami Davida, kuzwa kumatalikilo kusikila kumamanino alilembedwe akati kamakani aa Samuele sikubona zyakumbele, Natani+ musinsimi alimwi a Gadi+ sizilengaano,
30 antoomwe abwami bwakwe boonse, nguzu zyakwe alimwi azintu izyakamucitikila, walo a Israyeli alimwi amami oonse aakamuzingulukide.
Bupanduluzi buyungizyidwe
^ Naa “tajisi nguzu.”
^ Naa “ngazi; ŋanda yamwami.”
^ Talenta lyomwe lyakali kulema makkilogilamu aali 34.2. Amubone Makani Aayungizyidwe B14.
^ Madariki akali mali aangolida aabana Persia. Amubone Makani Aayungizyidwe B14.
^ Naa “kuzwa lili alili mane kukabe kutamani.”
^ Naa “kuloma; kululama.”
^ Naa “ngazi; ŋanda yamwami.”
^ Mu Chihebrayo, “mazuba.”
^ Mu Chihebrayo, “mazuba manji.”
