1 Petro 1:1-25
1 Ndime Petro, imwaapostolo+ wa Jesu Kristo, nendilembela ndinywe nobeenzu batakkalilili nomumwaikide mu Ponto, Galatiya, Kapadokiya,+ Asiya alimwi amu Bituniya, nywebo nomwakasalwa
2 kwiinda mukuzyibilwa limwi a Leza Taata,+ akusalazyigwa amuuya,+ ikutegwa mumumvwide alimwi akuti musansailwe bulowa bwa Jesu Kristo ikuti:+
Amuyungizyilwe luzyalo lwa Leza alimwi aluumuno.
3 Aatembaulwe Leza alimwi Usyi wa Mwami wesu Jesu Kristo, nkaambo muluse lwakwe lupati wakatupa kuzyalwa kupya+ kuti tube abulangizi bupona+ kwiinda mububuke bwa Jesu Kristo kuzwa kubafwu,+
4 kuti mube alukono lutanyonyooki, lunyina kampenda alimwi lutajujuki.+ Mwakayobodwa lukono oolu kujulu,+
5 nywebo nomukwabililwa anguzu zya Leza kwiinda mulusyomo kutegwa mukafwutuke mulufwutuko iluyooyubununwa kuciindi cakumamanino.
6 Akaambo kaceeci mulakondwa kapati, nokuba kuti kwaciindi cisyoonto mwapenzyegwa amasunko aaindene-indene,+
7 ikutegwa lusyomo lwanu lusunkidwe,+ oolo luyandika kapati kwiinda ngolida iinyonyooka nokuba kuti yasolwa* mumulilo, lukamupe kutembaulwa, bulemu akulemekwa kuciindi cakuyubununwa kwa Jesu Kristo.+
8 Nokuba kuti kunyina nomwakamubona, mulamuyanda. Nokuba kuti kwaciindi cino tamumubwene, pele mulamusyoma alimwi mulakondwa kapati alukkomano lutaambiki alimwi lwabulemu,
9 eelyo nomusika ambaakani yalusyomo lwanu, nkokuti lufwutuko lwanu.*+
10 Ikujatikizya lufwutuko oolu, ibasinsimi ibakasinsima zyaluzyalo lwa Leza ndomwakeelede kutambula bakayandaulisya akuvwuntauzya kabotu-kabotu.+
11 Bakazumanana kuvwuntauzya ciindi cini-cini naa mbobwakali kuyooba bukkale kweelana amuuya iwakali mulimbabo mbowakali kubatondezya kujatikizya Kristo,+ nowakali kupeda limwi bumboni kujatikizya mapenzi aa Kristo+ alimwi abulemu ibwakali kuyootobela.
12 Bakayubunudwa kuti tiibakali kulibelekela lwabo beni pe, pele bakali kubelekela ndinywe zintu eezyo lino izyaambilizyigwa kulindinywe abaabo ibakaambilizya makani mabotu kulindinywe amuuya uusalala iwakatumwa kuzwa kujulu.+ Izintu eezyi nzizyonya ibangelo balayandisisya kuzibona.
13 Aboobo mumizeezo yanu amulibambile kucita milimo canguzu;+ amupakamane cakumaninina lyoonse;+ amube abulangizi muluzyalo lwa Leza ndomuyooletelwa kuciindi cakuyubununwa kwa Jesu Kristo.
14 Mbomuli bana baswiilila, amuleke kutobela zisusi nzyomwakajisi musyule mukutazyiba kwanu,
15 pele mbuli Yooyo Uusalala iwakamwiita, amusalale mubukkale bwanu boonse,+
16 nkaambo kulilembedwe kuti: “Mweelede kusalala, nkaambo mebo ndilasalala.”+
17 Alimwi ikuti naa mulomba Taata uubeteka cakutasalulula+ kweelana amulimo wamuntu umwi aumwi, amulilemeke cakuyoowa+ ciindi nomuli beenzu batakkalilili.
18 Nkaambo mulizyi kuti teensyi zintu zinyonyooka, nkokuti nsiliva naa ngolida, nzyomwakaangununwa*+ anzizyo kubukkale bwanu bwabuyo oobo mbumwakatambula kuzwa kuli bamauso.*
19 Pele mwakanununwa abulowa+ buyandisi buli mbuli bwamwanaambelele uunyina kampenda nokaba kabala,+ nkokuti bwa Kristo.+
20 Masimpe, wakazyibilwa limwi nyika kaitanabako,+ pele wakayubununwa kumamanino aaciindi akaambo kandinywe.+
21 Ikwiinda mulinguwe nywebo musyoma muli Leza,+ ooyo iwakamubusya kuzwa kubafwu+ akumupa bulemu,+ ikutegwa nywebo mube alusyomo abulangizi muli Leza.
22 Lino mbwaanga mwalisalazya nobeni* kwiinda mukuswiilila kasimpe alimwi mwaba aluyando lwabunyina ilutali lwakuupaupa ameso,+ amuyandane kapati kuzwa ansi aamoyo.+
23 Nkaambo mwapegwa kuzyalwa kupya+ ikutali ambuto iinyonyooka pele ambuto iitanyonyooki,*+ kwiinda mujwi lya Leza uupona alimwi uuliko lyoonse.+
24 Nkaambo “zyoonse* izijisi mubili wanyama zili mbuli bwizu, alimwi bulemu bwanzizyo boonse buli mbuli duba lyamusyokwe; ibwizu bulayuma, alimwi duba lilaloka,
25 pele ijwi lya Jehova* linooliko lyoonse mane kukabe kutamani.”+ Lino eeli “jwi” ngamakani mabotu aayo aakaambilizyigwa kulindinywe.+
Bupanduluzi buyungizyidwe
^ Naa “yeengwa.”
^ Naa “lufwutuko lwabuumi bwanu.”
^ Mu Chigiriki, “nzyomwakanununwa.”
^ Naa “mbumwakatambula kwiinda mutunsiyansiya.”
^ Naa “mwasalazya buumi bwanu.”
^ Nkokuti, mbuto iikonzya kuzyala micelo.
^ Naa “bantu boonse.”
^ Amubone Makani Aayungizyidwe A5.
