1 Petro 3:1-22
3 Mbubonya buyo, anywebo nobakaintu, amulibombye kubalumi banu,+ ikutegwa naa kuli bataliswiilili ijwi, bakonzye kukwelelezyegwa kakunyina kubelesya jwi pele kwiinda mubukkale bwabakaintu babo,+
2 akaambo kakulibonena bukkale bwanu busalala+ antoomwe akuba abulemu kapati.
3 Kulisakatizya kwanu kutabi buyo kwaatala—kwakoosa masusu akusama zintu zyangolida+ naa zisani zidula kapati—
4 pele akube kulisakatizya kwamuntu wamukati kamoyo uusamide cisani citanyonyooki camoyo uukkede alimwi mubombe,+ ooyo uuyandika kapati mumeso aa Leza.
5 Nkaambo oobu mbobakali kulisakatizya bamakaintu basalala ibakali kulangila Leza kaindi, kabalibombya lwabo beni kubalumi babo,
6 mbubonya Sara mbwaakali kumvwida Abrahamu, akumwiita kuti mwami.+ Lino nywebo mwaba bana bakwe kufwumbwa kuti muzumanane kucita zibotu akutayoowa cintu cili coonse.+
7 Mbubonya buyo anywebo nobalumi, amuzumanane kukkala ambabo kweelana aluzyibo.* Amubape bulemu+ mbubonya mbuli cibelesyo cipwaika buyo, mbobali bakaintu, nkaambo alimwi muli basikukonanyina ambabo+ ibabuumi bupegwa akaambo kaluzyalo lwa Leza, ikutegwa mipailo yanu itasinkilwi.
8 Camamanino, nyoonse amube amuzeezo omwe,+ amweetelelane, amutondezye luyando lwabunyina, amube amoyo mutete walubomba+ alimwi amulicesye.+
9 Mutapilusyi cibi kucibi+ naa matusi kumatusi.+ Muciindi caboobo, amuleleke,+ nkaambo mwakaitilwa bukkale oobu, ikutegwa mukakone cileleko.
10 Nkaambo “kufwumbwa ooyo uuyanda buumi akubona mazuba mabotu weelede kuujata mulaka wakwe kukwaamba zintu zibyaabi+ amilomo yakwe kukwaamba zyalweeno.
11 Azifwutatile zintu zibi+ akucita zibotu;+ ayandaule luumuno akusungwaala kulutobela.+
12 Nkaambo meso aa Jehova* alangide balulami, amatwi aakwe alaswiilila mipailo yabo yakukombelezya,+ pele busyu bwa Jehova* mbukali kulibaabo bacita zibi.”+
13 Nkaambo ncobeni, ino nguni uunga wamucisa ikuti kamuli basungu mukucita zibotu?+
14 Pele nokuba kuti mulakonzya kupenga akaambo kabululami, mulakkomana.+ Nokuba boobo, mutayoowi ncobayoowa balo,* nokuba kunyongana.+
15 Pele mumyoyo yanu amubone Kristo kuti Mwami akuti ulasalala, kamulibambilide lyoonse kuliiminina kumuntu uuli woonse uukonzya kumubuzya kaambo kajatikizya bulangizi mbomujisi, pele amucite boobo amoyo mubombe+ alimwi abulemu kapati.+
16 Amuzumanane kuba amanjezyeezya mabotu+ ikutegwa kufwumbwa nobamwaamba zintu zibi, aabo bamwaamba zintu zibi bafwe nsoni+ akaambo kabukkale bwanu bubotu mbomuli basikutobela Kristo.+
17 Nkaambo cili kabotu kupenga akaambo kakuti mucita zibotu,+ ikuti Leza wayanda kucizumizya, ikutali akaambo kakuti mucita zibi.+
18 Nkaambo Kristo wakafwa ciindi comwe buyo kukabe kutamani kujatikizya zibi,+ muntu uululeme kufwida bantu bataluleme,+ kutegwa amusololele kuli Leza.+ Wakajaigwa kali amubili wanyama+ pele wakabusyigwa amubili wamuuya.+
19 Alimwi muciimo eeci nciconya wakaunka akuyookambaukila myuuya muntolongo,+
20 eeyo yatakali kuswiilila ciindi Leza naakali kulindila cakukkazika moyo kumazuba aa Nowa,+ ibwato nobwakali kupangwa,+ oomo bantu basyoonto buyo, nkokuti bantu bali lusele mobakafwutulwa kumaanzi.+
21 Lubbapatizyo, ilukozyenye aceeci, alwalo lulamufwutula lino (ikutali kusamba tombe lyaamubili pe, pele ikulomba manjezyeezya mabotu kuli Leza),+ kwiinda mububuke bwa Jesu Kristo.
22 Walo wakaunka kujulu eelyo lino uli kujanza lyalulyo lya Leza,+ alimwi bangelo, beendelezi abasinguzu bakabikkwa ansi aanguwe.+
Bupanduluzi buyungizyidwe
^ Naa “kubabikkila maano; kubamvwisya.”
^ Amubone Makani Aayungizyidwe A5.
^ Amubone Makani Aayungizyidwe A5.
^ Naa ambweni, “mutayoowi kukonga nkobamukonga.”
