1 Samuele 11:1-15
11 Lino Nahasi muna Amoni+ wakaunka kuyooyaka nkambi ku Gileadi kuti alwane bana Jabesi.+ Bana Jabesi boonse bakaambila Nahasi kuti: “Kopanga cizuminano andiswe eelyo tunookubelekela.”
2 Nahasi muna Amoni wakati: “Ndilapanga cizuminano andinywe ikuti naa mwazumina kuti: meso aanu oonse aakululyo adonkolwe. Ndilacita oobo kutegwa abe masampu kubana Israyeli boonse.”
3 Baalu babana Jabesi bakamwiingula kuti: “Kotupa mazuba aali ciloba kutegwa tutume batumwa mucilawo coonse ca Israyeli. Eelyo ikuti kubule uutufwutula, tuyoolyaaba kulinduwe.”
4 Lino batumwa bakasika ku Gibea+ wa Saulo akwaambila bantu majwi aaya, eelyo bantu boonse bakatalika koongolola kulila.
5 Lino Saulo wakali kuyaabuboola kabinga butanga kuzwa musyokwe, eelyo wakati: “Ino ncinzi cacitika kubantu? Ino balila nzi?” Aboobo bakamwaambila majwi oonse ngobakaamba bantu baku Jabesi.
6 Lino muuya wa Leza wakamupa nguzu Saulo+ ciindi naakamvwa majwi aaya, alimwi wakanyema kapati.
7 Aboobo wakabweza bapoho bobilo akubakosaula muzibeela-beela, mpoonya wakatuma zibeela-beela eezyi mucilawo coonse ca Israyeli kwiinda mubatumwa kati: “Kufwumbwa uutakokumutobela Saulo a Samuele, oobu mboziyoocitwa ŋombe zyakwe!” Aboobo buyoofwu bwa Jehova bwakabasikila bantu, eelyo bakaboola camoyo omwe.*
8 Mpoonya wakababala ku Bezeki, lino bana Israyeli bakali 300,000 alimwi baalumi baku Juda bakali 30,000.
9 Lino bakaambila batumwa aabo ibakaboolede kuti: “Mboobu mbomweelede kuyakwaambila bana Jabesi ku Gileadi, ‘Juunza lyaakutwa mwaaba, muyoofwutulwa.’” Aboobo batumwa bakaunka akuyakwaambila bana Jabesi, eelyo bakakondwa kapati.
10 Aboobo bana Jabesi bakaambila bana Amoni kuti: “Juunza tuyoolyaaba kulindinywe, alimwi muyootucita kufwumbwa ciyoomubotela.”+
11 Lino buzuba bwakatobela Saulo wakabikka bantu munkamu zyotatwe, eelyo bakanjila munkambi kubucedo* akutalika kujaya bana Amoni+ kusikila mpolitwa mwaaba. Lino aabo bakasyaala bakamwaikizyanya cakuti kunyina bantu bobilo bakasyaala antoomwe.
12 Mpoonya bantu bakaambila Samuele kuti: “Ino mbaani bali kwaamba kuti, ‘Sena Saulo ulakonzya kuba mwami wesu?’+ Amubalete bantu aabo kutegwa tubajaye.”
13 Nokuba boobo, Saulo wakati: “Kunyina naba omwe weelede kujaigwa sunu, nkaambo buzuba obuno+ Jehova wabafwutula bana Israyeli.”
14 Kumbele Samuele wakaambila bantu kuti: “Amuboole tuunke ku Giligala+ kutegwa tukaambilizye alimwi kuti Saulo ngomwami.”+
15 Aboobo bantu boonse bakaunka ku Giligala alimwi bakabikka Saulo kuba mwami kubusyu bwa Jehova mu Giligala. Mpoonya bakatuula zipaizyo zyalumvwano nkukonya ooko kubusyu bwa Jehova,+ eelyo Saulo abana Israyeli boonse bakasekelela cakukondwa kapati.+
Bupanduluzi buyungizyidwe
^ Mu Chihebrayo, “mbuli muntu omwe.”
^ Nkokuti, kutalikila 2 koloko yamasiku kusikila ku 6 koloko yamafwumofwumo.
