1 Samuele 13:1-23
13 Saulo wakali amyaka iili . . .* naakaba mwami,+ alimwi wakalela myaka yobilo mu Israyeli.
2 Lino Saulo wakasala baalumi bali 3,000 mu Israyeli; ibali 2,000 bakali a Saulo ku Mikimasi amumalundu aa Beteli, eelyo ibali 1,000 bakali a Jonatani+ ku Gibea+ wa Benjamini. Kumane boonse ibakasyaala wakabapilusya umwi aumwi kutente lyakwe.
3 Mpoonya Jonatani wakanyonyoona nkambi yabasikalumamba yaba Filisiti+ iyakali ku Geba,+ eelyo ba Filisiti bakaamvwa makani aaya. Kumane Saulo wakalizya mweembo+ munyika yoonse kaamba kuti: “Abaswiilile ba Hebrayo!”
4 Bana Israyeli boonse bakaamvwa makani aakuti: “Saulo wanyonyoona nkambi yaba Filisiti alimwi lino bana Israyeli baba bantu banunka nsu kuba Filisiti.” Aboobo bantu bakaitwa kuti batobele Saulo ku Giligala.+
5 Abalo ba Filisiti bakabungana antoomwe kuti balwane bana Israyeli, bakajisi nkalaki zyankondo zili 30,000, basimabbiza bali 6,000 abasikalumamba banji bali mbuli musenga wakunkomwe yalwizi;+ eelyo bakaunka akutalika kuyaka nkambi ku Mikimasi kujwe lya Beti-aveni.+
6 Mpoonya bana Israyeli bakabona kuti bakali mumapenzi nkaambo bakafwundilizyigwa; eelyo bantu bakatalika kuyuba mumampangala,+ muzilindi, mundomba, mutwaanda twaansi amumigoti.
7 Ba Hebrayo bamwi bakazabuka Jordano akuya kunyika ya Gadi a Gileadi.+ Pele walo Saulo wakacili ku Giligala, alimwi bantu boonse bakali kumutobela kabakankama.
8 Lino wakazumanana kulindila mazuba aali ciloba kusikila ciindi ncaakaambide* Samuele, pele Samuele tanaakaboola ku Giligala, eelyo bantu bakatalika kumwaikizyanya.
9 Mpoonya Saulo wakati: “Amundiletele zipaizyo zyuumpwa azipaizyo zyalumvwano.” Kumane wakatuula cipaizyo cuumpwa.+
10 Pele mbwaakamanina buyo kutuula cipaizyo cuumpwa, Samuele wakasika. Aboobo Saulo wakaunka kuyoomucinga akumutambula.
11 Mpoonya Samuele wakati: “Ino ncinzi eeci ncoocita?” Saulo wakaingula kuti: “Ndabona kuti bantu bandimwaika+ akaambo kakuti yebo tiiwaboola muciindi cakabikkidwe, alimwi ba Filisiti bali mukubungana antoomwe ku Mikimasi.+
12 Aboobo ndayeeya kuti, ‘Ba Filisiti lino balandilwana ku Giligala, alimwi tiindalomba kuti atufwide luzyalo* Jehova.’ Nkakaambo kaako ndalimvwa kuti ndeelede kutuula cipaizyo cuumpwa.”
13 Mpoonya Samuele wakati kuli Saulo: “Wacita cabufwubafwuba. Tiiwatobela mulawo wa Jehova Leza wako ngwaakakupa.+ Niwautobela, Jehova naayumya bwami bwako mu Israyeli kukabe kutamani.
14 Pele lino bwami bwako tabukazumanani pe.+ Jehova uyoolijanina imwaalumi weendelana amoyo wakwe,+ eelyo Jehova uyoomubikka kuba mweendelezi wabantu bakwe,+ nkaambo yebo tiiwatobela ncaakakulailila Jehova.”+
15 Mpoonya Samuele wakanyamuka kuzwa ku Giligala akuunka ku Gibea wa Benjamini, eelyo Saulo wakabala bantu; aabo mbaakacili limwi, bakali kusika ku 600.+
16 Lino Saulo amwanaakwe Jonatani, alimwi abantu mbobakacili limwi bakali kukkala ku Geba+ wa Benjamini, ba Filisiti bakayakide nkambi ku Mikimasi.+
17 Lino basikusaala bakali kuzwa kunkambi yaba Filisiti munkamu zyotatwe. Nkamu yakusaanguna yakali kutozya nzila iiya ku Ofira kunyika ya Syuali;
18 nkamu iimbi yakali kutozya nzila ya Beti-horoni;+ eelyo nkamu yatatu yakali kutozya nzila yakumunyinza uulangene akkuti lya Zeboimu, kulubazu lulangene ankanda.
19 Lino kwakanyina mufwuzi naba omwe munyika ya Israyeli, nkaambo ba Filisiti bakaambide kuti: “Kutegwa ba Hebrayo batakonzyi kufwula panga naa sumo.”
20 Alimwi bana Israyeli boonse bakali kuunka kuba Filisiti kuyookwenga milomo yamapulawu, maamba, tweembe naa masikela.
21 Lino kukwengezya milomo yamapulawu, maamba, mfwoloko zijisi meno otatwe, tweembe akubambya zibinzyo zyaŋombe bakali kubbadela pimu* lyomwe.
22 Lino mubuzuba bwankondo, tiikwakajanwa panga naa sumo kumuntu uuli woonse iwakali a Saulo a Jonatani;+ alikke Saulo amwanaakwe Jonatani mbabakajisi zilwanyo.
23 Lino nkamu yabasikalumamba yaba Filisiti yakazwa munkambi akuunka kucito caku Mikimasi.+
Bupanduluzi buyungizyidwe
^ Aawa kunyina myaka iilembedwe mumabbuku aa Chihebrayo.
^ Naa “ncaakabikkide.”
^ Naa “tiindatontozya busyu bwa.”
^ Pimu ncipimyo cakaindi icakali kulema magilamu aatandila kulusele.
