1 Samuele 14:1-52
14 Lino bumwi buzuba Jonatani+ mwana wa Saulo wakaambila mubelesi iwakanyamwide zilwanyo zyakwe kuti: “Boola tuzabuke tuye mutala kunkambi yaba Filisiti.” Pele bausyi tanaakabaambila pe.
2 Saulo wakali kukkala kumagolelo aa Gibea+ munsi lyacisamu camapomegranite icili mu Migroni, alimwi wakali abaalumi bali 600.+
3 (Alimwi Ahija mwana wa Ahitubi,+ mwanookwabo a Ikabodi,+ imwana wa Finehasi,+ mwana wa Eli+ mupaizi wa Jehova mu Silo,+ wakanyamwide kabaki kabupaizi.)+ Pele bantu tiibakazyiba kuti Jonatani waunka.
4 Lino akati kazito zyobilo aawo Jonatani mpaakali kuyanda kuzabukila kuti aunke kunkambi yaba Filisiti, kwakali mandomba aali mbuli meno, lyomwe kulubazu oolu, limwi kulubazu lumbi; limwi lyakali kwiitwa kuti Bozezi, mpoonya limbi lyakali kwiitwa kuti Sene.
5 Ndomba lyomwe lyakali musemu wakaimvwi kunyika kalilangene a Mikimasi, eelyo limwi lyakali kumusanza kalilangene a Geba.+
6 Aboobo Jonatani wakaambila sikumunyamwida zilwanyo kuti: “Boola, tuzabuke akuunka kunkambi yabantu aaba batapalwidwe.+ Ambweni Jehova ulatugwasya, nkaambo kunyina cikonzya kulesya Jehova kuvwuna bantu kwiinda mukubelesya bantu banji naa basyoonto.”+
7 Mpoonya sikumunyamwida zilwanyo wakati kulinguwe: “Kocita kufwumbwa cili kumoyo wako. Kounka kufwumbwa nkoyanda, eelyo ndilakutobela kufwumbwa moyo wako nkouyanda.”
8 Kumane Jonatani wakati: “Lino tulazabuka akuunka kubantu baya kutegwa tukalibonye kulimbabo.
9 Ikuti bakatwaambile kuti, ‘Amwiime mpoonya aawo kusikila tuboole kulindinywe!’ swebo tulaima aano mpotubede alimwi tatukokuunka kulimbabo.
10 Pele ikuti bakaambe kuti, ‘Amuboole mutulwane!’ nkokuti tweelede kuunka, nkaambo Jehova uyoobaaba mumaanza eesu. Eeci nceciyooba citondezyo kulindiswe.”+
11 Mpoonya aaba bobilo bakalibonya kunkambi yaba Filisiti. Eelyo ba Filisiti bakati: “Amubone! Ba Hebrayo baboola kuzwa muzilindi mobakayubide.”+
12 Aboobo baalumi bamunkambi eeyo bakaambila Jonatani asikumunyamwida zilwanyo kuti: “Amuboole kulindiswe, eelyo mulacibona sunu!”+ Mpoonya aawo Jonatani wakaambila sikumunyamwida zilwanyo kuti: “Konditobela, nkaambo Jehova ulabaaba mumaanza aabana Israyeli.”+
13 Mpoonya Jonatani wakatanta kayaabukalaba, awalo sikumunyamwida zilwanyo wakali musyule lyakwe; kumane Jonatani wakatalika kubalwana akubajaya ba Filisiti eelyo awalo sikumunyamwida zilwanyo wakali kuboola musyule kayaabujaya aabo ibakasyeede.
14 Lino mukulwana kwakusaanguna, Jonatani asikumunyamwida zilwanyo bakajaya baalumi basika ku 20, mumusinzo uuli mbuli cisela cabulamfwu bwabulimo basune bobilo mbobakonzya kulima buzuba bomwe.
15 Mpoonya basikalumamba ibakali munkambi yamusyokwe abasikalumamba ibakali munkambi bakatalika kuyoowa kapati, alimwi nobaba basikusaala abalo bakakankama.+ Nyika yakatalika kuzungaana, mpoonya Leza wakabapa kuyoowa kapati.
16 Lino balindizi ba Saulo ku Gibea+ waku Benjamini bakabona kuti kwakali kuyaabuba lupyopyongano koonse-koonse.+
17 Kumane Saulo wakaambila bantu mbaakali limwi kuti: “Amubabale bantu mubone naa nguni uutako.” Lino nibakababala bakajana kuti Jonatani asikumunyamwida zilwanyo tiibakaliko pe.
18 Mpoonya Saulo wakati kuli Ahija:+ “Leta Bbokesi lya Leza mwini-mwini afwaafwi!” (Nkaambo Bbokesi lya Leza mwini-mwini aciindi eeco* lyakali abana Israyeli.)
19 Lino Saulo naakali kwaambaula amupaizi, lupyopyongano munkambi yaba Filisiti lwakali kuyaabwiindila. Mpoonya Saulo wakaambila mupaizi kuti: “Leka buyo.”*
20 Aboobo Saulo abantu boonse mbaakali limwi bakabungana akuunka ooko ikwakali nkondo, ooko nkobakajana kuti ba Filisiti bayasana mapanga mulicabo beni, alimwi kwakali lupyopyongano kapati.
21 Abalo ba Hebrayo ibakali kulubazu lwaba Filisiti alimwi abaabo mbobakaboola limwi munkambi bakatalika kuunka kubana Israyeli ibakali kusololelwa a Saulo a Jonatani.
22 Baalumi boonse bana Israyeli ibakayubide+ mumalundu aa Efraimu nobakamvwa kuti ba Filisiti batija, abalo bakaunka kunkondo kuyootandaanya ba Filisiti.
23 Aboobo Jehova wakabavwuna bana Israyeli buzuba oobo,+ alimwi nkondo yakazumanana mane kuyoosika ku Beti-aveni.+
24 Pele bana Israyeli zyakabamana nguzu buzuba oobo nkaambo Saulo wakakonkezya bantu kuti: “Aasinganizyigwe kufwumbwa muntu uulya cakulya* cili coonse kalitanabbila zuba alimwi kanditanabazunda basinkondoma!” Aboobo kunyina muntu wakalabila cakulya.+
25 Lino bantu boonse* bakaboola akunjila mucisaka alimwi kwakali buci ansi.
26 Eelyo bantu nibakanjila mucisaka bakabona buci kabuloka, pele kwakanyina naba omwe iwakalya, nkaambo bakayoowa cikonke.
27 Lino Jonatani tanaakamvwa bausyi nibakakonkezya bantu,+ aboobo wakatandabika musako iwakali mujanza lyakwe akutompa mucimbulwe cabuci. Lino naakalya, meso aakwe akagweemuka.
28 Abone boobo umwi akati kabantu wakati: “Bauso bakonkezya bantu cakusinizya kuti, ‘Aasinganizyigwe kufwumbwa muntu uulya cakulya sunu!’+ Nkakaambo kaako bantu ncobakatede kapati.”
29 Nokuba boobo, Jonatani wakati: “Bataata baletela cisi mapenzi mapati. Amubone meso aangu mbwaagweemuka akaambo kakuti ndalabila tubuci ootu.
30 Nicainda kubota ikuti bantu nibalya zisaalo+ zyabasinkondonyina nzyobajana! Nkaambo nikwali boobo, nikwajaigwa ba Filisiti banji.”
31 Mubuzuba oobo bakazumanana kujaya ba Filisiti kuzwa ku Mikimasi kusikila ku Aijaloni,+ alimwi bantu bakakatala kapati.
32 Aboobo cabulyato bantu bakawuumukila kukusaala zintu akubweza mbelele, ŋombe alimwi atoombe, eelyo bakazijaya ansi, mpoonya bakalya nyama antoomwe abulowa.+
33 Aboobo bantu bakaambila Saulo kuti: “Amubone, bantu batalika kubisizya Jehova kwiinda mukulya nyama antoomwe abulowa.”+ Eelyo walo wakati: “Mwacita cakutasyomeka. Amukunkulisye bbwe lipati kulindime ino-ino.”
34 Kumane Saulo wakati: “Kamuya akati kabantu, mubaambile kuti, ‘Umwi aumwi wanu weelede kuleta mupoho wakwe ambelele yakwe akuzijaya okuno mpoonya akuzilya. Mutabisizyi Jehova kwiinda mukulya nyama antoomwe abulowa.’”+ Aboobo masiku aayo umwi aumwi wabo wakaleta mupoho ngwaakajisi akumujaya nkukonya ooko.
35 Mpoonya Saulo wakayakila Jehova cipaililo.+ Eeci ncecipaililo cakusaanguna ncaakayakila Jehova.
36 Nikwakainda ciindi Saulo wakati: “Atubaunkile ba Filisiti masiku akubasaala kusikila mafwumofwumo. Tatukasiyi naba omwe akati kabo.” Eelyo bakati: “Kocita kufwumbwa cibotu mumeso aako.” Mpoonya mupaizi wakati: “Atubuzye makani kuli Leza mwini-mwini abusena aano.”+
37 Eelyo Saulo wakabuzya Leza kuti: “Sena ndibaunkile ba Filisiti?+ Sena ulabaaba mumaanza aabana Israyeli?” Pele Leza tanaakamwiingula buzuba oobo.
38 Aboobo Saulo wakati: “Amuboole nywebo nyoonse nobasilutwe babantu, muvwuntauzye cibi icacitwa sunu.
39 Nkaambo masimpe mbubonya Jehova mbwali muumi, ooyo iwakafwutula bana Israyeli, nokuba kuti kwajanika kuti ngu Jonatani mwanaangu, weelede kufwa.” Pele kunyina naba omwe akati kabantu iwakamuvwiila.
40 Mpoonya wakaambila bana Israyeli boonse kuti: “Nywebo mulaba kulubazu lomwe, eelyo mebo amwanaangu Jonatani tulaba kulubazu lumwi.” Eelyo bantu bakati kuli Saulo: “Kocita kufwumbwa cibotu mumeso aako.”
41 Mpoonya Saulo wakati kuli Jehova: “O Leza wa Israyeli, kotupa bwiinguzi kwiinda mu Tumimu!”+ Eelyo cisolo cakawida Jonatani a Saulo, aboobo bantu bakaanguluka.
42 Kumane Saulo wakati: “Amuume cisolo+ akati kandime amwanaangu Jonatani.” Eelyo cisolo cakawida Jonatani.
43 Mpoonya Saulo wakaambila Jonatani kuti: “Kondaambila, ino ncinzi ncoocita?” Aboobo Jonatani wakamwaambila kuti: “Ndalabila buyo tubuci tusyoonto kumpela aamusako uuli mujanza lyangu.+ Ndime aano! Ndililibambilide kufwa!”
44 Mpoonya Saulo wakati: “Leza andisubule kapati ikuti naa utafwi Jonatani.”+
45 Pele bantu bakaambila Saulo kuti: “Sena Jonatani weelede kufwa–ooyo iwaleta luzundo* lupati+ boobu mu Israyeli? Tacikonzyi kuba boobo pe! Jehova mbwali muumi, kunyina nokaba kasusu kakumutwe wakwe ikatiiwide ansi, nkaambo Leza nguwamugwasya muliceeci ncaacita sunu.”+ Aboobo bantu bakamuvwuna Jonatani, tanaakafwa pe.
46 Mpoonya Saulo wakaleka kubatandaanya ba Filisiti, eelyo ba Filisiti bakajokela kucisi cabo.
47 Lino Saulo wakasitikizya bwami bwakwe mu Israyeli alimwi wakabalwana basinkondonyina boonse, bana Moabu,+ bana Amoni,+ bana Edomu,+ bana Zoba+ aba Filisiti;+ kufwumbwa nkwaaunka wakali kubazunda.
48 Alimwi wakalwana cabusicamba akuzunda bana Amaleki+ akuvwuna bana Israyeli kumaanza aabasikubasaala.
49 Bana basankwa ba Saulo bakali ba Jonatani, Jisivi a Malikisuwa.+ Wakalijisi bana basimbi bobilo; mupati wakali Merabu,+ imusyoonto wakali Mikala.+
50 Izina lyamukaintu wa Saulo wakali Ahinoamu mwana wa Ahimaazi. Izina lyasilutwe wampi yabasikalumamba bakwe wakali Abineri+ imwana wa Neri, mwanookwabo abausyi Saulo.
51 Usyi Saulo wakali Kisi,+ eelyo usyi Abineri+ wakali Neri mwana wa Abiyeli.
52 Lino kwakali nkondo mbyaabi akati ka Saulo+ aba Filisiti mazuba oonse aabulelo bwakwe. Kufwumbwa mwaalumi muyumu naa sicamba ngwaakabona Saulo, wakali kumubweza kuti abe sikalumamba wakwe.+
Bupanduluzi buyungizyidwe
^ Mu Chihebrayo, “mubuzuba oobo.”
^ Mu Chihebrayo, “Gwisya janza lyako.”
^ Mu Chihebrayo, “cinkwa.”
^ Mu Chihebrayo, “nyika yoonse.”
^ Naa “lufwutuko.”
