1 Samuele 16:1-23
16 Kumane Jehova wakaambila Samuele kuti: “Ino ulamulila ciindi cilamfwu buti Saulo,+ kakuli mebo ndamukaka kuti kaceendelezya mbuli mwami wa Israyeli?+ Kozuzya lwija lwako amafwuta+ wamana wuunke. Ndilakutuma kuli Jese+ muna Betelehemu, nkaambo ndasala umwi wabana bakwe kuti abe mwami.”+
2 Pele Samuele wakati: “Ino inga ndaunka buti? Saulo aamvwa makani aaya, ulandijaya.”+ Eelyo Jehova wakati: “Kotolelezya aŋombe mpwizi iicili nsyoonto alimwi ukaambe kuti, ‘Ndaboola kutuula cipaizyo kuli Jehova.’
3 Amumwiite Jese kucipaizyo; eelyo mebo ndilakwaambila ncoyelede kucita. Weelede kundinanikila yooyo ngonditiikutondezye.”+
4 Kumane Samuele wakacita ncaakaamba Jehova. Lino naakasika ku Betelehemu,+ baalu bamumunzi bakatalika kukankama nobakaswaangana anguwe, alimwi bakamubuzya kuti: “Sena zintu zili kabotu?”
5 Mpoonya walo wakati: “Inzya, zili buyo kabotu. Ndaboola kuzootuula cipaizyo kuli Jehova. Amulisalazye, mwamana tuunke limwi kukutuula cipaizyo.” Kumane wakasalazya Jese abana bakwe basankwa, mpoonya wakabaita kucipaizyo.
6 Lino mbubakanjilila buyo, wakabona Eliabu+ eelyo wakati: “Masimpe ooyu ngomunanike wa Jehova.”
7 Pele Jehova wakati kuli Samuele: “Utalangi mbwaboneka pe alimwi abulamfwu bwakwe,+ nkaambo ndamukaka. Muntu mbwazibona zintu tabusyi mbubo mbwazibona Leza, nkaambo muntu ubona buyo zilibonya ameso, pele Jehova ubona zili mumoyo.”+
8 Mpoonya Jese wakaita Abinadabu+ akumwiinzya kumbele lya Samuele, pele Samuele wakati: “Ayooyu tanaamusala Jehova.”
9 Kuzwa waawo Jese wakainzya Sama,+ pele Samuele wakati: “Ayooyu tanaamusala Jehova.”
10 Aboobo Jese wakainzya bana bakwe basankwa bali ciloba kumbele lya Samuele, pele mbubonya buyo Samuele wakaambila Jese kuti: “Jehova kunyina ngwaasala akati kabaaba.”
11 Mpoonya Samuele wakati kuli Jese: “Sena aaba mbabana basankwa balikke mbojisi?” Eelyo Jese wakati: “Kwasyaala omwe musyoonto;+ uli mukweembela mbelele.”+ Kumane Samuele wakaambila Jese kuti: “Kotuma bantu bakamulete, nkaambo tatukookkala ansi kuti tulye kusikila asike aano.”
12 Aboobo wakatuma bantu kuti bakamwiite, eelyo bakamuleta. Lino mulombe ooyu wakajisi ciwa cibotu alimwi wakali kweebeka kapati.+ Eelyo Jehova wakati: “Konyamuka umunanike, nkaambo ooyu ngonguwe ngundasala!”+
13 Aboobo Samuele wakabweza lwija lwamafwuta+ akumunanika kabalangilila banabokwabo. Mpoonya muuya wa Jehova wakatalika kubeleka ali Davida kuzwa buzuba oobo.+ Kumane Samuele wakanyamuka akuunka ku Rama.+
14 Lino muuya wa Jehova wakalizwide ali Saulo,+ eelyo kwakamusikila muuya mubi kuzwa kuli Jehova iwakamupenzya.+
15 Kumane babelesi ba Saulo bakamwaambila kuti: “Wabona lino kuti muuya mubi uuzwa kuli Leza uli mukukupenzya.
16 Simaleleesu aalailile babelesi bakwe kuti bayandaule muntu uucibwene kulizya kantimbwa.+ Kufwumbwa ciindi muuya mubi wa Leza waboola alinduwe, muntu ooyo uyoolizya kantimbwa eelyo uyoolimvwa kabotu.”
17 Aboobo Saulo wakati kubabelesi bakwe: “Akaka amundiyandawide muntu uucizyi kulizya kantimbwa, mpoonya mumulete kulindime.”
18 Lino umwi wababelesi bakwe wakati: “Ndakamubona mwana wa Jese imuna Betelehemu mbwacibwene kumutwe kulizya kantimbwa, mwaalumi sicamba alimwi ngusikalumamba singuzu.+ Ulicizyi kubandika kabotu, uleebeka+ alimwi Jehova uli anguwe.”+
19 Mpoonya Saulo wakatuma batumwa kuli Jese, wakati: “Konditumina mwanaako Davida, ooyo weembela butanga+ kuti aboole okuno.”
20 Aboobo Jese wakabweza cinkwa, nkomo yawaini yacikutu, akana kampongo akuzibikka ambongolo akuzituma amwanaakwe Davida kuti azitole kuli Saulo.
21 Aboobo Davida wakaboola kuli Saulo akutalika kumubelekela.+ Saulo wakamuyanda kapati, eelyo wakaba sikumunyamwida zilwanyo.
22 Mpoonya Saulo wakatumya mulomo kuli Jese wakuti: “Komuleka Davida azumanane kundibelekela, nkaambo wandibotela.”
23 Kufwumbwa ciindi muuya wa Leza mubi waboola ali Saulo, Davida wakali kubweza kantimbwa akutalika kulizya, aboobo Saulo wakali kulimvwa kabotu alimwi muuya mubi wakali kuzwa alinguwe.+
