1 Samuele 21:1-15
21 Lino Davida wakaboola ku Nobi+ kuli Ahimeleki mupaizi. Mpoonya Ahimeleki wakatalika kukankama naakaswaangana a Davida eelyo wakamubuzya kuti: “Ino nkaambo nzi ncoli olikke kakunyina ngoli limwi?”+
2 Davida wakaingula Ahimeleki mupaizi kuti: “Mwami wandilailila kucita cintu cimwi pele waamba kuti, ‘Kutabi muntu uuli woonse weelede kuzyiba makani ngondakutuma alimwi amalailile ngondakupa.’ Ndapangana abalombwana bangu kuti tuswaangane abusena bumwi.
3 Lino ikuti naa ulijisi zinkwa zyosanwe naa cintu cili coonse cikonzya kujanika, kondipa.”
4 Pele mupaizi wakaambila Davida kuti: “Kunyina cinkwa cabantu-bantu buyo ncondijisi, pele buyo cinkwa cisalala;+ inga ndakupa ikuti naa balombwana bako bakabatantamuka bamakaintu.”*+
5 Aboobo Davida wakavwiila mupaizi kuti: “Masimpe twalikasya kuli bamakaintu mbubonya mbuli lyoonse notuunka kunkondo.+ Ikuti naa balombwana balasalala nomuba mulweendo lutasetekene, sena inga tiibaindila kusalala sunu nobacita mulimo uusetekene!”
6 Aboobo mupaizi wakamupa zinkwa zisalala+ nkaambo kwakanyina zinkwa zimbi pele buyo zinkwa zyacitondezyo, eezyo izyakagwisyigwa kubusyu bwa Jehova mubuzuba zinkwa zyakaindi nozigwisyigwa akubikka zipya.
7 Lino umwi wababelesi ba Saulo wakaliko buzuba oobo, wakalijatidwe kubusyu bwa Jehova. Izina lyakwe wakali Doegi+ muna Edomu,+ silutwe wabeembezi ba Saulo.
8 Mpoonya Davida wakaambila Ahimeleki kuti: “Sena kuli panga naa sumo ndyojisi? Tiindakabweza panga lyangu naa zilwanyo zyangu nkaambo mulimo wamwami wakali kuyandika kucitwa cakufwambaana.”
9 Eelyo mupaizi wakati: “Panga lya Goliati+ mu Filisiti ngookajaya mu Kkuti* lya Ela+ nkolili, lilivwungaidwe mumulembo, kusyule lyakabaki kabupaizi.+ Ikuti koyanda kulibweza, kolibweza nkaambo taakwe limbi kunze lyandilyo.” Mpoonya Davida wakati: “Kunyina panga limbi lili mbuli ndilyo. Kondipa.”
10 Buzuba oobo Davida wakanyamuka akuzumanana kutija+ Saulo, eelyo wakasika ku Mwami Akisi wa Gati.+
11 Mpoonya babelesi ba Akisi bakaambila Akisi kuti: “Sena ooyu tali Davida mwami wa Israyeli? Sena talinguwe ngubakali kwiimba munyimbo nobakali kuzyana kabaamba kuti,‘Saulo wajaya bantu bali zyuulu,Pele Davida wajaya makumi aazyuulu’?”+
12 Lino Davida wakatalika kwaayeeya majwi aaya, eelyo wakayoowa kapati+ akaambo ka Mwami Akisi wa Gati.
13 Aboobo wakatalika kulicengeezya kubusyu bwabo akucita mbuli muntu uusondokede+ naakali akati kabo.* Wakali kweengaula kuzijazyo zyamulyango wamunzi akulekela mate aakwe kulolomoka kusikila kucilezu.
14 Kumane Akisi wakaambila babelesi bakwe kuti: “Mulibwene kuti muntu ooyu ulisondokede. Ino mwamuletela nzi kulindime?
15 Sena ndabula bantu basondokede ncomwandiletela yooyu kuti azoocite zyabuyanga munsi lyangu? Sena ooyu ngomuntu uunga wanjila muŋanda yangu?”
Bupanduluzi buyungizyidwe
^ Naa “tiibakoonana abamakaintu.”
^ Naa “Cibanda.”
^ Mu Chihebrayo, “mujanza lyabo.”
