1 Samuele 22:1-23
22 Aboobo Davida wakazwa ooko+ akutijila kumpangala ya Adulamu.+ Lino banabokwabo abamuŋanda yabausyi boonse nibakaamvwa makani aayo, bakaunka kulinguwe nkukonya ooko.
2 Lino baalumi boonse ibakali mumapenzi, ibakajisi zikwelete alimwi abaabo boonse ibakakatazyidwe bakabungana kulinguwe, eelyo wakaba silutwe wabo. Baalumi mbaakali limwi bakali kusika ku 400.
3 Mpoonya Davida wakazwa ooko akuunka ku Mizipe kumwami wa Moabu+ akumwaambila kuti: “Ndalomba kuti bataata abamaama bakkale anduwe kusikila ndikazyibe Leza ncayoocita kulindime.”
4 Aboobo wakabasiya kumwami wabana Moabu, eelyo bakakkala anguwe ciindi coonse Davida ncaakali mumpangala.+
5 Mukuya kwaciindi, musinsimi Gadi+ wakati kuli Davida: “Utakkali mumpangala. Kozwa ooko uunke kunyika ya Juda.”+ Aboobo Davida wakazwa ooko akuunka kucisaka ca Hereti.
6 Lino Saulo wakamvwa kuti Davida bamujana abaalumi bakwe. Aciindi eeco Saulo wakalikkede ku Gibea+ munsi aacisamu camusiikka atala aakalundu, kajisi sumo mujanza lyakwe alimwi babelesi bakwe boonse bakalimuzingulukide.
7 Mpoonya Saulo wakaambila babelesi bakwe bakamuzingulukide kuti: “Amuswiilile nywebo nobana Benjamini. Sena mwana wa Jese+ awalo ulakonzya kumupa nyoonse myuunda yakulima amyuunda yamisaansa? Sena nyoonse uyoomubikka kuba basilutwe bazyuulu abasilutwe bamyaanda?+
8 Nyoonse mwandibukila! Kunyina wakandaambila ciindi mwanaangu naakapanga cizuminano amwana wa Jese!+ Kunyina akati kanu uundeetelela akundaambila kuti mwanaangu wayunga mubelesi wangu kuti andiyubilile mbuli mbocibede sunu.”
9 Kumane Doegi+ muna Edomu, iwakali silutwe wababelesi ba Saulo wakaingula ulaamba:+ “Ndakamubona mwana wa Jese ku Nobi kuli Ahimeleki mwana wa Ahitubi.+
10 Eelyo Ahimeleki wakabuzya kuli Jehova kujatikizya nguwe alimwi wakamupa cakulya. Alimwi wakamupa apanga lya Goliati mu Filisiti.”+
11 Mpoonya aawo mwami wakatuma bantu kuyakwiita Ahimeleki mwana wa Ahitubi mupaizi alimwi abapaizi boonse bamuŋanda yabausyi, aabo ibakali mu Nobi. Aboobo boonse bakaboola kumwami.
12 Lino Saulo wakati: “Swiilila yebo omwana wa Ahitubi!” Kumane walo wakati: “Ndime aano mwami.”
13 Mpoonya Saulo wakamwaambila kuti: “Ino nkaambo nzi ncomwandibukila, yebo amwana wa Jese? Ino wakamupeda nzi cinkwa apanga alimwi akumubuzizya makani kuli Leza? Ulandikazya akundiyubilila mbuli mbocibede sunu.”
14 Amvwe boobo Ahimeleki wakavwiila mwami kuti: “Ino nguni akati kababelesi bako boonse uusyomeka mbuli Davida?+ Mukwe wamwami+ alimwi ngusilutwe wabalindizi bako uulemekwa muŋanda yako.+
15 Sena ndatalika sunu kumubuzizya makani kuli Leza?+ Eeci ncoamba tandikonzyi kucicita pe! Omwami utandipi mulandu ndemubelesi wako alimwi abamuŋanda yoonse yabataata, nkaambo makani aaya oonse tandaazyi naaceya ndemubelesi wako.”+
16 Pele mwami wakati: “Ncobeni ulafwa+ Ahimeleki, yebo antoomwe aboonse bamuŋanda yabauso.”+
17 Kumane mwami wakaambila balindizi* bakamuzingulukide kuti: “Kamuboola mubajaye bapaizi ba Jehova akaambo kakuti abalo bali kulubazu lwa Davida! Bakalizyi kuti wakatija buya, pele tiibakandaambila pe!” Pele babelesi bamwami tiibakali kuyanda kubajaya bapaizi ba Jehova.
18 Mpoonya mwami wakaambila Doegi+ kuti: “Koboola ubajaye bapaizi!” Eelyo ndilyonya Doegi muna Edomu+ wakaboola akubajaya bapaizi. Mubuzuba oobo wakajaya baalumi basamide tubaki twabupaizi ibali 85.+
19 Nouba munzi wa Nobi,+ imunzi wabapaizi wakaunyonyoona apanga; wakabajaya apanga baalumi abamakaintu, bana kubikkilizya abavwanda, ŋombe, mbongolo ambelele.
20 Nokuba boobo, mwana omwe wa Ahimeleki mwana wa Ahitubi wazina lya Abiyatara+ wakaloboka akutijila kuli Davida.
21 Mpoonya Abiyatara wakaambila Davida kuti: “Saulo wabajaya bapaizi ba Jehova.”
22 Naakamvwa boobo Davida wakati kuli Abiyatara: “Ndakazyiba mbubonya buzuba obuya+ ciindi Doegi muna Edomu naakaliko kuti masimpe ulamwaambila Saulo. Mebo ndime ndaletelezya lufwu lwabantu boonse bamuŋanda yabauso.
23 Kokkala andime. Utayoowi pe, nkaambo kufwumbwa uuyandaula buumi bwako, nkokuti uyandaula buumi bwangu; mebo ndilakukwabilila.”+
Bupanduluzi buyungizyidwe
^ Mu Chihebrayo, “batumwa.”
