1 Samuele 26:1-25
26 Mukuya kwaciindi bantu baku Zifi+ bakaboola kuli Saulo ku Gibea+ akumwaambila kuti: “Davida uliyubide mucilundu ca Hakila, icilangene a Jesimoni.”*+
2 Aboobo Saulo wakanyamuka akuunka kunkanda ya Zifi, kali abaalumi bali 3,000 ibakasalidwe akati kabana Israyeli, kuti akalangaule Davida munkanda ya Zifi.+
3 Saulo wakayaka nkambi mumbali aanzila mucilundu ca Hakila, icilangene a Jesimoni. Aciindi eeco Davida wakali kukkala munkanda alimwi wakamvwa kuti Saulo wamuboolela munkanda.
4 Aboobo Davida wakatuma basikutwela kuti asinizye naa Saulo wamuboolela ncobeni.
5 Kuzwa waawo Davida wakanyamuka akuunka kunkambi nkwaakabede Saulo, eelyo Davida wakaabona mpaakalede Saulo alimwi a Abineri+ mwana wa Neri, silutwe wampi yabasikalumamba bakwe; Saulo wakalede munkambi kazingulukidwe abasikalumamba bakwe.
6 Mpoonya Davida wakati kuli Ahimeleki muna Heti+ akuli Abisai+ imwana wa Zeruya,+ mwanookwabo a Joabu: “Nguni utiiunke andime kuli Saulo munkambi?” Abisai wakaingula kuti: “Mebo ndilaunka anduwe.”
7 Aboobo masiku Davida a Abisai bakaunka kuli basikalumamba ba Saulo, eelyo bakajana Saulo ulilede munkambi, isumo lyakwe kaliyasidwe ansi kumbali aamutwe wakwe; Abineri abasikalumamba bakalilede kabamuzingulukide.
8 Lino Abisai wakaambila Davida kuti: “Sunu Leza wamwaaba sinkondonyoko mumaanza aako.+ Lino leka ndimuyase ciindi comwe buyo asumo mane likayasilizye aansi, alimwi nsikokwiinduluka pe.”
9 Nokuba boobo Davida wakati kuli Abisai: “Utamuyasi pe, nkaambo nguni uukonzya kutandabika janza lyakwe akujaya munanike wa Jehova+ akutaba amulandu?”+
10 Davida wakazumanana kwaamba kuti: “Masimpe Jehova mbwali muumi, Jehova nguuyoomujaya,+ naa buzuba bwakwe buyoosika eelyo uyoofwa,+ naa uyakuunka kunkondo akufwida nkuko.+
11 Tandeelede naaceya pe mumeso aa Jehova kuti nditandabike janza lyangu akujaya munanike wa Jehova!+ Kobweza buyo sumo lili kumbali aamutwe wakwe akankuli kamaanzi mpoonya tweende.”
12 Aboobo Davida wakabweza sumo akankuli kamaanzi ikakali kumbali aamutwe wa Saulo, mpoonya bakaunka. Kunyina iwakababona+ naa kuzyiba naa kubuka, nkaambo boonse bakalilede, akaambo kakuti iŋonzi izyakazwa kuli Jehova zyakali bajisi kapati.
13 Kumane Davida wakaunka kulubazu lumwi akwiima atala aacilundu kulaale, eelyo kakuli busena bupati akati kabo.
14 Mpoonya Davida wakatalika koongolola kuli basikalumamba ba Saulo akuli Abineri+ mwana wa Neri kati: “Abineri, sena tokokwiingula?” Eelyo Abineri wakaingula akwaamba kuti: “Ino nduwe ni yebo ooyita mwami?”
15 Kumane Davida wakati kuli Abineri: “Sena toli mwaalumi? Ino nguni uuli mbuli nduwe mu Israyeli? Aboobo nkaambo nzi ncootali kulinda mwami simalelaako? Nkaambo sikalumamba umwi waliboolede kumwami simalelaako kuti amujaye.+
16 Eeci ncoocita tacili kabotu pe. Mbubonya Jehova mbwali muumi, weelede kujaigwa nkaambo tiiwamukwabilila simalelaako, imunanike wa Jehova.+ Lino koyandaula! Ino sumo lyamwami akankuli kamaanzi+ izyali kumbali aamutwe wakwe zili kuli?”
17 Mpoonya Saulo wakalizyiba jwi lya Davida akwaamba kuti: “Sena eeli ndijwi lyako mwanaangu Davida?”+ Eelyo Davida wakaingula kuti: “Inzya, ndijwi lyangu omwami simalelaangu.”
18 Alimwi Davida wakati: “Ino nkaambo nzi simalelaangu ncoyaabunditobela ndemubelesi wako?+ Ino ndakacita nzi alimwi mulandu nzi ngondijisi?+
19 Lino omwami simalelaangu, koswiilila jwi lyangu ndemubelesi wako: Ikuti kali Jehova wakutuma kuti undilwane, nkokuti acitambule* cituuzyo cangu camaila. Pele kuti kabali bantu ibakuyunga,+ balisinganizyidwe kubusyu bwa Jehova nkaambo sunu banditanda kuti ndibule lubazu mulukono lwa Jehova,+ kabati, ‘Koya ukabelekele baleza bambi!’
20 Aboobo lino utalekeli kuti bulowa bwangu butilwe kule abusyu bwa Jehova, nkaambo mwami wa Israyeli waunka kuyooyandaula ntabwa yomwe,+ mbuli kuti utandaanya kwale mumalundu.”
21 Kumane Saulo wakati: “Ndabisya.+ Piluka mwanaangu Davida, tandikakucitili cintu cibi alimwi, nkaambo buumi bwangu mbuyandisi kulinduwe+ asunu. Inzya, ndacita cabufwubafwuba alimwi ndalubizya kapati.”
22 Mpoonya Davida wakavwiila akwaamba kuti: “Ndeeli sumo lyamwami. Akuboole mulombe omwe azoolibweze.
23 Jehova ngonguwe utiikalumbule umwi aumwi kweelana abululami bwakwe+ akusyomeka kwakwe, nkaambo sunu Jehova walikwaabide mumaanza aangu, pele tiindayanda kutandabika janza lyangu kujaya munanike wa Jehova.+
24 Bona! Mbubonya buumi bwako mbobwali buyandisi mumeso aangu sunu, abwalo buumi bwangu bube buyandisi mumeso aa Jehova, alimwi aandivwune kumapenzi oonse.”+
25 Saulo wakaingula Davida kuti: “Leza akulongezye mwanaangu Davida. Masimpe uyoocita milimo mipati alimwi masimpe uyoozwidilila.”+ Kumane Davida wakaunka, eelyo awalo Saulo wakapiluka kwabo.+
