1 Samuele 27:1-12
-
Davida wapegwa Zikilaga aba Filisiti (1-12)
27 Nokuba boobo, Davida wakati mumoyo wakwe: “Buzuba bumwi Saulo uyoondijaya. Cintu cibotu ncondeelede kucita nkutijila+ kunyika yaba Filisiti; mpoonya Saulo uyootyompwa kundiyandaula mucilawo coonse ca Israyeli,+ eelyo ndiyoofwutuka kujanza lyakwe.”
2 Aboobo Davida wakanyamuka abaalumi bali 600 + mbaakali limwi akuunka kuli Akisi+ mwana wa Maoki, imwami wa Gati.
3 Davida wakakkala a Akisi ku Gati, walo abaalumi bakwe, umwi aumwi amukwasyi wakwe. Davida wakali abamakaintu bakwe bobilo, Ahinoamu+ waku Jezreeli a Abigayeli+ muna Karimeli, mukamufwu wa Nabala.
4 Ciindi Saulo naakaambilwa kuti Davida wakatijila ku Gati, wakaleka kumuyandaula.+
5 Mpoonya Davida wakati kuli Akisi: “Ikuti naa wandifwida luzyalo, leka bandipe busena mukanzi kamwi kutegwa ndikakkale ooko. Ino nkaambo nzi ndemubelesi wako ncondeelede kukkala anduwe mumunzi wamwami?”
6 Aboobo Akisi wakamupa Zikilaga+ mubuzuba oobo. Nkakaambo kaako Zikilaga ncuuli munzi wabami ba Juda kusikila sunu.
7 Lino ciindi* Davida ncaakakkala munyika yaba Filisiti cakakkwana mwaka amyezi yone.+
8 Davida wakali kuunka abaalumi bakwe kuyoosaala bana Gesuri,+ bana Girezi abana Amaleki,+ nkaambo bakali kukkala munyika yakali kuzwa ku Telami kusikila ku Suri+ alimwi akusika kunyika ya Egepita.
9 Ciindi Davida naakali kwiilwana minzi tanaakali kusiya mwaalumi naba mukaintu pe,+ pele wakali kubweza mbelele, mpongo, ŋombe, mbongolo, nkamela alimwi azisani, mpoonya wakali kupiluka kuli Akisi.
10 Kumane Akisi wakali kubuzya kuti: “Ino nkuuli nkomwaakusaala sunu?” Davida wakali kwiingula kuti: “Kumusanza* kwa Juda”+ naa “Kumusanza kwanyika yabana Jerameli”+ naa “Kumusanza kwanyika yabana Keni.”+
11 Davida tanaakali kusiya mwaalumi naba mukaintu muumi kuti aletwe ku Gati, nkaambo wakati: “Kutegwa batakatwaambi kuti, ‘Mboobu Davida mbwaakacita.’” (Alimwi oobu mbwaakali kucita ciindi coonse ncaakali munyika yaba Filisiti.)
12 Aboobo Akisi wakamusyoma Davida, eelyo mumoyo wakwe wakati: ‘Masimpe waba cintu cinunka nsu akati kabantu bakwe bana Israyeli, aboobo unooli mubelesi wangu lyoonse.’
