1 Samuele 3:1-21
-
Samuele wasalwa kuba musinsimi (1-21)
3 Lino mulombe Samuele wakali kumubelekela+ Jehova mubweendelezi bwa Eli, pele ijwi kuzwa kuli Jehova tiilyakali kumvwika-mvwika mumazuba aayo; zilengaano+ tiizyakadumide pe.
2 Buzuba bumwi Eli wakalilede abusena bwakwe mpaakali koona, alimwi meso aakwe akalibaide; tanaakali kukonzya kubona.+
3 Lambe lya Leza+ tiilyakaningazimwa pe, alimwi Samuele wakalilede mutempele*+ lya Jehova imwakali Bbokesi lya Leza.
4 Jehova lino wakaita Samuele. Mpoonya wakaingula kuti: “Ndime aano mwami.”
5 Eelyo wakazuzila kuli Eli akwaamba kuti: “Ndime aano mwami, tee mulandiita.” Pele wakati kulinguwe: “Tiindakwiita pe. Koya ukoone.” Aboobo wakaunka kukoona.
6 Jehova wakaita alimwi kuti: “Samuele!” Amvwe boobo Samuele wakabuka akuunka kuli Eli akumwaambila kuti: “Ndime aano mwami, tee mulandiita.” Pele walo wakati: “Tiindakwiita mwanaangu. Koya ukoone.”
7 (Lino Samuele tanaakaningamuzyiba Jehova, alimwi ijwi kuzwa kuli Jehova tiilyakaningatalika kuyubununwa kulinguwe.)+
8 Aboobo Jehova wakaita alimwi lwatatu kuti: “Samuele!” Alimwi wakabuka akuunka kuli Eli akumwaambila kuti: “Ndime aano mwami, tee mulandiita.”
Mpoonya Eli wakazyiba kuti ngu Jehova wakali kwiita mulombe.
9 Kumane Eli wakaambila Samuele kuti: “Koya buyo ukoone, lino kuti akwiite alimwi, waambe kuti, ‘Kondaambila Jehova, ndiliswiilide ndemubelesi wako.’” Aboobo Samuele wakajokela nkwaakali koona.
10 Mpoonya Jehova wakaboola alimwi akwiita mbubonya mbuli ziindi ziimbi kuti: “Samuele, Samuele!” Eelyo Samuele wakati: “Kondaambila, nkaambo ndemubelesi wako ndiliswiilide.”
11 Kumane Jehova wakati kuli Samuele: “Bona! Ndilacita cintu cimwi mu Israyeli eeco iciyoopa muntu uuli woonse uuyoocimvwa kuswiimwa mubili.+
12 Mubuzuba oobo ndiyoocitila Eli zintu zyoonse nzyondakaamba kujatikizya ŋanda yakwe, kuzwa kumatalikilo kusikila kumamanino.+
13 Weelede kumwaambila kuti ndilaleta lubeta lutamani kuŋanda yakwe akaambo kamulandu ngwazyi,+ nkaambo bana bakwe basampaula Leza+ pele walo tabakalalili pe.+
14 Nkakaambo kaako ndakonka kujatikizya ŋanda ya Eli kuti mulandu waŋanda yakwe tuukonzyi kulekelelwa kwiinda muzipaizyo naa zituuzyo.”+
15 Samuele wakoona kusikila bwaca; mpoonya wakajalula milyango yaŋanda ya Jehova. Pele Samuele wakaliyoowede kwaambila Eli kujatikizya cilengaano eeci.
16 Pele Eli wakaita Samuele kuti: “Samuele, mwanaangu!” Eelyo walo wakati: “Ndime aano mwami.”
17 Eli wakabuzya kuti: “Ino makani nzi ngaakwaambila? Ndakomba kaka utandisisi pe. Leza akusubule kapati ikuti naa undisise noliba jwi lyomwe akati kamajwi oonse ngaakwaambila.”
18 Aboobo Samuele wakaamba zyoonse nzyaakaambilwa alimwi tanaakamusisa cili coonse. Eelyo Eli wakati: “Ngu Jehova waamba. Amumuleke acite kufwumbwa cimubotela.”
19 Lino Samuele wakali kuyaabukomena alimwi Jehova wakali anguwe.+ Tanaakalekela jwi lyakwe noliba lyomwe kutazuzikizyigwa.*
20 Bana Israyeli boonse kuzwa ku Dani kusikila ku Beere-seba bakazyiba kuti Samuele ngonguwe wakabikkwa kuba musinsimi wa Jehova.
21 Jehova wakazumanana kulibonya ku Silo, nkaambo ooko Jehova wakaliyubununa kuli Samuele ku Silo kwiinda mujwi lya Jehova.+
