1 Samuele 31:1-13
-
Lufwu lwa Saulo abana bakwe botatwe (1-13)
31 Lino ba Filisiti bakali kulwana abana Israyeli.+ Eelyo baalumi bana Israyeli bakatija kuzwa kuba Filisiti, alimwi banji bakajaigwa a Cilundu ca Giliboa.+
2 Ba Filisiti bakali kuyaabuswena afwaafwi kuli Saulo abana bakwe, mpoonya bakajaya Jonatani,+ Abinadabu a Malikisuwa, ibana ba Saulo.+
3 Lino nkondo yakamuyumina Saulo alimwi basimata bakamweenzya akumucisa kapati.+
4 Mpoonya Saulo wakati kuli sikumunyamwida zilwanyo: “Somona panga lyako undiyase kutegwa baalumi aaba batapalwidwe+ batabooli kundiyasa akundipenzya.”* Pele sikumunyamwida zilwanyo wakakaka nkaambo wakaliyoowede kapati. Aboobo Saulo wakabweza panga akuwida alindilyo.+
5 Sikumunyamwida zilwanyo naakabona kuti Saulo wafwa,+ awalo wakawida apanga lyakwe akufwa antoomwe anguwe.
6 Aboobo Saulo, bana bakwe botatwe, sikumunyamwida zilwanyo alimwi abaalumi bakwe boonse bakafwa buzuba oobo.+
7 Lino bana Israyeli ibakali mucibanda abaabo ibakali mucilawo ca Jordano nobakabona kuti basikalumamba bana Israyeli batija akuti Saulo abana bakwe bafwa, bakatalika kusiya minzi yabo akutija;+ mpoonya ba Filisiti bakaboola akukkala mulinjiyo.
8 Buzuba bwakatobela, eelyo ba Filisiti nobakaboola kuzoosaala zintu zyabaabo ibakafwa, bakajana Saulo abana bakwe botatwe balifwide a Cilundu ca Giliboa.+
9 Aboobo bakamukosola mutwe akubweza zilwanyo zyakwe alimwi bakatuma mulumbe+ koonse-koonse mucisi caba Filisiti ikuzyibya bantu mumaanda* aamituni+ yabo alimwi akubantu.
10 Kumane bakabikka zilwanyo zyakwe muŋanda yazikozyanyo zya Asitoreti, eelyo mutunta wakwe bakawaangilila kubwaanda bwa Beti-sani.+
11 Ciindi bana Jabezi-gileadi+ nobakamvwa mbubakamucita Saulo ba Filisiti,
12 basikalumamba boonse bakanyamuka akweenda masiku oonse, mpoonya bakaubweza mutunta wa Saulo amitunta yabana bakwe kuzwa kubwaanda bwa Beti-sani. Bakapiluka ku Jabesi akuyuumpa nkukonya ooko.
13 Kumane bakabweza mafwuwa aabo+ akwaazikka munsi aacisamu camusiikka mu Jabesi,+ alimwi bakaliimya kulya mazuba aali ciloba.
