1 Samuele 4:1-22
4 Lino Samuele wakazumanana kwaambila bana Israyeli boonse jwi lya Leza.
Mpoonya bana Israyeli bakaunka kuyoolwana ba Filisiti; bakayaka nkambi afwaafwi a Ebenezeri, eelyo ba Filisiti bakayaka nkambi mu Afeki.
2 Kumane ba Filisiti bakalibambila kuti bakalwane bana Israyeli. Nkondo yakayuma kapati alimwi ba Filisiti bakazunda bana Israyeli akujaya baalumi basika ku 4,000 munkondo.
3 Lino basikalumamba nobakapiluka kunkambi, baalu babana Israyeli bakaamba kuti: “Ino nkaambo nzi Jehova ncaalekela kuti sunu swebo tuzundwe* kuba Filisiti?+ Atulitolelezye bbokesi lyacizuminano ca Jehova kuzwa ku Silo+ kutegwa libe akati kesu akuti lituvwune kumaanza aabasinkondoma.”
4 Aboobo bakatuma bantu ku Silo, eelyo bakaakulibweza bbokesi lyacizuminano ca Jehova wamakamu, uukkede acuuno cakwe atala* aabakerubi.+ Lino bana ba Eli bobilo, Hofeni a Finehasi,+ abalo bakaliko ooko antoomwe abbokesi lyacizuminano ca Leza mwini-mwini.
5 Lino mbolyakasikila buyo munkambi bbokesi lyacizuminano ca Jehova, bana Israyeli boonse bakoongolola kapati cakuti nyika yakazungaana.
6 Lino ba Filisiti nibakamvwa koongolola ooko bakati: “Ino nkaambo nzi ncokuli koongolola kupati boobu munkambi yaba Hebrayo?” Kumane bakazyiba kuti Bbokesi lya Jehova lyasika munkambi.
7 Ba Filisiti bakayoowa, nkaambo bakati: “Leza waboola munkambi!”+ Eelyo bakati: “Maawe twapenga, nkaambo cintu cili boobu tacinacitikide pe!
8 Maawe twapenga! Nguni utiitufwutule kujanza lya Leza ooyu uugambya? Ooyu ngo Leza wakajaya bana Egepita banji munkanda.+
9 Eelyo nywebo noba Filisiti amube basicamba akucita mbuli baalumi ncobeni, kutegwa mutabi bazike baba Hebrayo mbubonya balo mbobakali bazike banu.+ Amube baalumi ncobeni, mulwane!”
10 Aboobo ba Filisiti bakalwana, alimwi bana Israyeli bakazundwa,+ eelyo umwi aumwi wakatijila kutente lyakwe. Kwakajaigwa bantu banji; kulubazu lwabana Israyeli, kwakafwa basikalumamba beenda amaulu bali 30,000.
11 Kuyungizya waawo, Bbokesi lya Leza lyakatolwa, alimwi bana iba Eli, Hofeni a Finehasi bakafwa.+
12 Lino mwaalumi umwi muna Benjamini wakatija kuzwa kunkondo, eelyo wakasika ku Silo mubuzuba oobo zisani zyakwe kazizapaukide alimwi wakali avwu mumutwe.+
13 Lino mwaalumi ooyu naakasika, Eli wakalikkede acuuno mumbali aanzila kalangila, nkaambo moyo wakwe wakalipengede kapati akaambo ka Bbokesi lya Leza mwini-mwini.+ Mwaalumi ooyo wakanjila mumunzi kutola mulumbe, eelyo bantu boonse mumunzi bakatalika kulila.
14 Lino Eli naakamvwa kulila, wakabuzya kuti: “Ino lupyopyongano oolo lumvwika lwaamba nzi?” Mpoonya mwaalumi ngoonya ooyu wakazuza kuli Eli akumwaambila mulumbe ooyu.
15 (Aciindi aawa Eli wakali amyaka iili 98 alimwi meso aakwe akalangide kumbele, pele tanaakali kubona.)+
16 Mpoonya mwaalumi ooyo wakati kuli Eli: “Ndime ndazwa kunkondo. Ndatija buya kuzwa kunkondo sunu.” Kumane Eli wakabuzya kuti: “Ino ncinzi cacitika mwanaangu?”
17 Aboobo sikuleta mulumbe wakati: “Bana Israyeli batija kuba Filisiti, alimwi bantu besu bazundwa kapati:+ abana bako bobilo Hofeni a Finehasi bafwa,+ alyalo Bbokesi lya Leza mwini-mwini lyatolwa.”+
18 Lino mbwaakaambila buyo makani aa Bbokesi lya Leza mwini-mwini, Eli wakawa acuuno kutozya kumakosi kakkede kumbali aamulyango, eelyo nsingo yakwe yakatyoka mpoonya wakafwa, nkaambo wakalicembeede alimwi wakalineneede. Wakabeteka bana Israyeli myaka iili 40.
19 Mukamwanaakwe, imukaintu wa Finehasi wakalimitide alimwi wakali afwaafwi kutumbuka. Lino naakamvwa makani aakuti Bbokesi lya Leza mwini-mwini lyatolwa akuti bausyizyala alimwi amulumaakwe bafwa, mpoonya aawo wakasintama nkaambo wakamyongwa cakutayeeyelwa eelyo wakatumbuka.
20 Lino naakali afwaafwi kufwa, bamakaintu ibakaimvwi munsi lyakwe bakati: “Utayoowi, nkaambo wazyala mwana musankwa.” Tanaakavwiila alimwi tanaakabikkila maano.*
21 Pele mwana wakamuulika kuti Ikabodi,*+ kaamba kuti: “Bulemu bwazwa mu Israyeli akuunka kucisi cimbi,”+ wakaamba oobo akaambo ka Bbokesi lya Leza mwini-mwini ilyakatolwa alimwi akaambo kabausyizyala alimwi amulumaakwe ibakafwa.+
22 Wakaamba kuti: “Bulemu bwazwa mu Israyeli akuunka kucisi cimbi, nkaambo Bbokesi lya Leza mwini-mwini lyatolwa.”+
Bupanduluzi buyungizyidwe
^ Mu Chihebrayo, “Ino nkaambo nzi Jehova ncaatuzunda?”
^ Naa ambweni, “akati.”
^ Naa “alimwi tanaakabikka moyo wakwe kumakani aayo.”
^ Nkokwaamba kuti “Ino Bulemu Buli Kuli?”
