1 Samuele 5:1-12
5 Lino ba Filisiti nibakabweza Bbokesi+ lya Leza mwini-mwini, bakalibweza kuzwa ku Ebenezeri akulitola ku Asidodi.
2 Ba Filisiti bakabweza Bbokesi lya Leza mwini-mwini akulileta muŋanda* ya Dagoni akulibikka kumbali lya Dagoni.+
3 Lino bana Asidodi nibakabuka mafwumofwumo buzuba bwakatobela, bakajana Dagoni uliwide kavwunteme ansi kumbele lya Bbokesi lya Jehova.+ Aboobo bakamubweza Dagoni akumupilusya abusena bwakwe.+
4 Nibakabuka mafwumofwumo buzuba bwakatobela, bakajana Dagoni alimwi uliwide kavwunteme ansi kumbele lya Bbokesi lya Jehova. Mutwe amaboko aakwe oonse obilo akalikosokede kaali kumulyango. Kwakasyeede buyo cibili-bili ciboneka mbuli nswi.*
5 Nkakaambo kaako kusikila sunu, bapaizi ba Dagoni abantu boonse aabo ibanjila muŋanda ya Dagoni tabalyati amulyango waŋanda ya Dagoni mu Asidodi.
6 Janza lya Jehova lyakabapenzya bana Asidodi, alimwi wakabanyonyoona kwiinda mukuletela Asidodi azilawo zyanguwo tulonda.*+
7 Lino bana Asidodi nibakabona cakali kucitika bakati: “Mutalekeli Bbokesi lya Leza wa Israyeli kuti kalicikkede andiswe, nkaambo janza lyakwe lyatupenzya kapati swebo alimwi aleza wesu Dagoni.”
8 Aboobo bakatumya mulomo wakwiita bami boonse baba Filisiti akubabuzya kuti: “Ino tulalicita buti Bbokesi lya Leza wa Israyeli?” Kumane bakati: “Alilonzyegwe akutolwa ku Gati.”+ Aboobo bakalilonzya Bbokesi lya Leza wa Israyeli ooko.
9 Nibakamana kulilonzya akulitola ooko, janza lya Jehova lyakabalwana boonse mumunzi akubapa kuyoowa kapati. Eelyo wakabasubula bantu bamumo, bana abapati mpoonya bakaba atulonda.+
10 Aboobo Bbokesi lya Leza mwini-mwini bakalitola ku Ekroni,+ pele Bbokesi lya Leza mwini-mwini mbolyakasikila buyo ku Ekroni, bana Ekroni bakatalika kulila kabati: “Batuletela Bbokesi lya Leza wa Israyeli kuti batujaye abantu besu!”+
11 Mpoonya bakatumya mulomo wakwiita bami baba Filisiti akubaambila kuti: “Amulitole kooko Bbokesi lya Leza wa Israyeli; alijokele kubusena bwalyo kutegwa swebo abantu besu tutajaigwi.” Bakaamba boobo akaambo kakuti kwakaba kuyoowa lufwu mumunzi woonse; ijanza lya Leza mwini-mwini lyakabapenzya citaambiki ooko,+
12 eelyo bantu ibatakafwa, bakapenzyegwa atulonda. Alimwi kulila kwabantu bamumunzi ikwakulomba lugwasyo kwakasika kujulu.
Bupanduluzi buyungizyidwe
^ Naa “mutempele.”
^ Mu Chihebrayo, “Kwakasyeede buyo Dagoni alikke.”
^ Naa “tukoto.”
