1 Samuele 6:1-21
-
Ba Filisiti balipilusya Bbokesi ku Israyeli (1-21)
6 Lino Bbokesi+ lya Jehova lyakali munyika yaba Filisiti kwamyezi iili ciloba.
2 Eelyo ba Filisiti bakaita bapaizi abasondi+ akubabuzya kuti: “Ino tulalicita buti Bbokesi lya Jehova? Amutwaambile mbotukonzya kulipilusya kumunzi wandilyo.”
3 Bakaingula kuti: “Ikuti muyanda kulipilusya bbokesi lya cizuminano ca Jehova Leza wa Israyeli, mutalipilusyi kakunyina cituuzyo pe. Mweelede kutolelezya acituuzyo camilandu kulinguwe.+ Lilikke mwacita boobo, nomutiipone alimwi mulazyiba kaambo janza lyakwe ncolyatali kuzwa alindinywe.”
4 Aboobo bakababuzya kuti: “Ino ncituuzyo nzi camilandu ncotweelede kumutolela?” Bakabavwiila kuti: “Mweelede kutola zikozyanyo zyatulonda* zyangolida zyosanwe azikozyanyo zyambeba zyangolida zyosanwe kweelana amweelwe wabami baba Filisiti,+ nkaambo cipenzyo icamusikila nywebo abami banu ncimwi.
5 Mweelede kupanga zikozyanyo zyatulonda twanu azikozyanyo zyambeba+ zyanu izinyonyoona nyika, alimwi mweelede kupa bulemu kuli Leza wa Israyeli. Ambweni ulagwisya janza lyakwe alindinywe, ali leza wanu alimwi aanyika yanu.+
6 Nkaambo nzi ncomuyanda kuyumya myoyo yanu mbuli mbobakacita bana Egepita alimwi a Farao?+ Naakabasubula citaambiki Leza,+ ndendilyo nobakabaleka bana Israyeli kuti baunke.+
7 Lino amubambe ŋola mpya akubweza ŋombe zyobilo zinyonsya zitanapopedwe. Mwamana muzipope kuŋola, pele boombe banzizyo mubapilusye kuŋanda kutegwa batatobeli.
8 Amubweze Bbokesi lya Jehova akulibikka muŋola, alimwi azyalo zikozyanyo zyangolida nzyomweelede kutolela Leza kazili cituuzyo camilandu mweelede kuzibikka mubbokesi limbi akulibikka kumbali lyabbokesi lya Leza.+ Mwamana mulitumye lyuunke,
9 eelyo kamulangilila: Ikuti naa ŋola igame kunzila iiya ku Beti-semesi,+ mucilawo candilyo, nkokuti tulazyiba kuti ngonguwe wakatucitila bubi oobu bupati. Pele kuti kakutali boobo, tulazyiba kuti talili janza lyakwe lyakatucitila zintu eezyi; nintenda buyo yakatucitikila.”
10 Baalumi aabo bakacita mbubonya oobo. Bakabweza ŋombe zinyonsya zyobilo akuzipopa kuŋola, boombe banzizyo bakabajalila kuŋanda.
11 Mpoonya bakabikka Bbokesi lya Jehova muŋola, abbokesi eelyo limbi mwakali mbeba zyangolida alimwi azikozyanyo zyatulonda twabo.
12 Lino ŋombe zyakatalika kweenda munzila iitozya ku Beti-semesi.+ Zyakeenda mumugwagwa omwe kaziyaabulila, alimwi tiizyakaleya kululyo naa kulumwensyi pe. Pele bami baba Filisiti bakali kuyaabuzitobela kusikila kumunyinza wa Beti-semesi.
13 Bantu baku Beti-semesi bakali kutebula wiiti mucibanda. Nobakatambya meso aabo akubona Bbokesi, bakasekelela kapati.
14 Lino ŋola yakasika kumuunda wa Joshua muna Beti-semesi akwiima afwaafwi abbwe lipati. Aboobo bakapapaula mapulanga aaŋola, eelyo ŋombe+ eezyo bakazituula kacili cituuzyo cuumpwa kuli Jehova.
15 Mpoonya ba Levi+ bakaselusya Bbokesi lya Jehova abbokesi limbi ilyakali muŋola, oomo imwakali zikozyanyo zyangolida, eelyo bakalibikka abbwe lipati. Kumane bantu baku Beti-semesi+ bakatuula zituuzyo zyuumpwa, alimwi bakazumanana kutuula zipaizyo kuli Jehova buzuba oobo.
16 Eelyo bami bosanwe baba Filisiti nobakazibona zintu zyoonse eezyi, bakapiluka ku Ekroni buzuba oobo.
17 Lino nzyeezyi zikozyanyo zyatulonda izyangolida ba Filisiti nzyobakaleta kazili zituuzyo zyamilandu kuli Jehova:+ comwe cakali ca Asidodi,+ comwe cakali ca Gaza, comwe cakali ca Asikeloni, comwe cakali ca Gati,+ comwe cakali ca Ekroni.+
18 Mweelwe wambeba zyangolida wakaleelene amweelwe waminzi yoonse yaba Filisiti iyakali yabami bosanwe, kuzwa kuminzi iikwabilidwe kusikila kutunzi twanjiyo.
Alimwi ibbwe lipati aakabikkwa Bbokesi lya Jehova lilapa bumboni kusikila sunu mumuunda wa Joshua imuna Beti-semesi.
19 Pele Leza wakajaya bantu baku Beti-semesi akaambo kakulanga Bbokesi lya Jehova. Wakajaya akati kabo bantu bali 50,070,* eelyo bantu bakatalika kulila akaambo kakuti Jehova wakajaya bantu banji alunyonyooko lupati.+
20 Aboobo bantu baku Beti-semesi bakabuzya kuti: “Ino nguni uukonzya kwiima kumbele lya Jehova Leza ooyu uusalala,+ alimwi ino inga waunka kuli bani ikuti wazwa kulindiswe?”+
21 Kumane bakatuma batumwa kubantu baku Kiriyati-jearimu+ akubaambila kuti: “Ba Filisiti balipilusya Bbokesi lya Jehova. Amuboole muzoolibweze, akulitola nkomuzwa.”+
Bupanduluzi buyungizyidwe
^ Naa “zyatukoto.”
^ Mu Chihebrayo, “baalumi bali 70, baalumi bali 50,000.”
